Leviticus 25 - Sranan Tongo Bible 2016

Den spesrutu yari

¹ MASRA taigi Moses tapu a Sinaibergi taki:

² “Taigi den sma fu Israel taki: ‘Te un doro ini a kondre di Mi sa gi unu, un sa meki a gron rostu. Na wan sabat gi MASRA.

³ Siksi yari un sa sai un pranigron. Siksi yari un sa koti den taki fu den bon ini un droifidyari èn koti nyanyan fu a gron.

⁴ Ma a di fu seibi yari un mus meki a gron rostu trutru. Na wan sabat-yari gi MASRA. Un no sa sai un pranigron èn un no sa koti den taki fu den bon ini un droifidyari.

⁵ Un no sa koti a nyanyan di gro kon fu ensrefi èn un no sa puru den droifi di gro kon na den taki di un no koti puru na den droifibon. A sa de wan yari pe un sa meki a pranigron rostu.

⁶ A nyanyan di gro kon a yari dati ini un gron, sa de nyanyan gi unu, gi den man nanga umasrafu fu unu, gi den sma di un e pai fu wroko gi unu nanga gi den sma di e tan nanga unu.

⁷ A sa de nyanyan tu gi den meti di un e kweki nanga gi den krasi meti di e libi ini un kondre.

⁸ Un mus teri seibi sabat-yari. Seibi leisi seibi yari. Fotenti-na-neigi yari musu psa.

⁹ Dan un mus bro den tutu tapu a di fu tin dei fu a di fu seibi mun. Tapu a Spesrutu Dei Fu Meki En Bun Nanga Gado un sa bro den tutu ini a heri kondre.

¹⁰ A di fu feifitenti yari sa de wan spesrutu yari gi unu. Ini a heri kondre un sa fri ala sani. A sa de wan yari fu gi baka. Ini a yari disi ala sma sa kisi baka san ben de fu den èn den srafu kan drai go baka na den famiri.

¹¹ A di fu feifitenti yari sa de wan yari fu gi baka gi unu. Un no sa sai a yari dati èn a nyanyan san gro kon fu ensrefi un no sa koti. Un no sa koti den taki fu den droifibon a yari dati èn un no sa piki den droifi.

¹² A yari dati sa de wan yari fu gi baka gi unu. A sa de wan spesrutu yari gi unu. Un kan nyan a nyanyan di gro kon fu ensrefi ini a gron a yari dati.

¹³ Ini a yari dati ala sma sa kisi den sani fu den baka.

¹⁴ Te un e seri wan sani gi wan kondreman fu unu, noso te un e bai wan sani fu en, a wan no sa bedrigi a trawan.

¹⁵ Te yu e bai a gron fu en, yu sa luku olanga a yari fu gi baka psa kba èn a sma di e seri a gron sa luku omeni leisi a koti nyanyan fu a gron kba.

¹⁶ A gron sa moro diri efu furu yari de fu go miti a yari fu gi baka di de fu kon. Efu furu yari no de fu go miti a tra yari fu gi baka, dan a gron no sa diri so. Bika yu e pai gi den tron di yu o man koti nyanyan fu a gron.

¹⁷ Un no sa bedrigi makandra. Un sa lespeki un Gado, bika Mi na MASRA, un Gado.

¹⁸ Un mus du den sani di un mus tan du èn un mus hori unsrefi finifini na den sani fu Mi. Dan un no abi fu frede gi noti ini a kondre.

¹⁹ A gron sa gi nyanyan èn un sa nyan te un bere furu. Un no sa abi fu frede gi noti ini a kondre.

²⁰ Efu un e aksi unsrefi taki: Dan san un o nyan ini a di fu seibi yari? Bika un no abi primisi fu sai noso fu koti nyanyan.

²¹ Dan un mus sabi taki Mi sa blesi un sowan fasi ini a di fu siksi yari, taki un o koti nofo nyanyan gi dri yari.

²² Ini a di fu aiti yari un sa sai baka, ma a yari dati un sa nyan ete fu san un ben koti na fesi. Ini a di fu neigi yari un sa nyan ete fu san un ben koti na fesi tu, te leki un koti nyanyan di un ben prani a yari dati.

²³ Un no sa seri wan gron sondro taki a okasi de fu bai en baka. Bika a gron na fu Mi èn unu na doroseisma di e tan na Mi. Na tan un e tan sranga nanga Mi.

²⁴ Ini a heri kondre di o de fu unu, un sa gi sma a okasi fu bai en gron baka.

²⁵ Te wan fu unu kon pina taki a abi fu seri wan pisi fu en gron, wan krosbei famiri fu en abi a plekti fu bai a gron baka. A famiri fu en sa bai baka san a sma ben abi fu seri.

²⁶ Efu wan sma no abi krosbei famiri di kan teki a plekti na en tapu, ma baka wan pisten ensrefi kon abi nofo moni fu bai en gron baka,

²⁷ dan a mus luku omeni yari psa kba di a ben seri a gron. A sa pai a sma di ben bai a gron fu den yari di libi ete fu go miti a yari fu gi baka. Dan a sa kisi en gron baka.

²⁸ Efu a no feni nofo moni fu bai en gron baka, dan a gron sa tan fu a sma di bai en, te leki a yari fu gi baka. Te a yari fu gi baka doro, a gron fu en sa kon fri, dan a sa kisi en gron baka.

²⁹ Efu wan sma seri wan oso ini wan foto di abi wan skotu lontu en, dan a sa teri wan yari kmoto fu a dei di a seri a oso. Ini a wan yari dati a abi a okasi fu bai a oso baka. Wan yari nomo a abi a okasi fu bai en oso baka.

³⁰ Efu a no bai a oso baka fosi a yari psa, dan a oso dati, di de ini a foto nanga a skotu, o de fu têgo fu a sma di bai en nanga en famiri. A oso no sa kon fri ini a yari fu gi baka.

³¹ Ma den oso di de ini den dorpu di no abi skotu lontu den, de wan pisi fu a gron tapu san den tnapu. Dati wani taki tak' a sma di seri en kan bai en baka. Den oso disi e kon fri tu ini a yari fu gi baka.

³² Den Lefitiman sa abi a okasi ala ten fu bai den oso baka ini den foto di den leki Lefitiman ben kisi fu tan.

³³ Wan Lefitiman kan bai a oso fu wan tra Lefitiman, ma efu a oso de ini wan foto di den leki Lefitiman kisi fu tan, dan a sma di seri a oso sa kisi en oso baka ini a yari fu gi baka. Disi sa de so, fu di den oso di de ini den foto fu den Lefitiman, e tan fu den.

³⁴ A gron di de fu den foto fu den Lefitiman no sa seri tu, bika fu têgo a gron na fu den.

³⁵ Efu wan fu unu bigin e pina taki a no man sorgu gi ensrefi moro, dan un sa langa wan anu gi en leki fa un bo yepi wan doroseisma noso wan sma di kon tan wan pisten nanga unu.

³⁶ Un no sa leni en wan sani, dan un aksi en pikinso moro na en tapu fu di un leni en. Un sa lespeki un Gado, fu langa wan anu gi en.

³⁷ Un no sa leni en moni noso nyanyan, dan un teki en baka nanga pikinso na en tapu fu di un ben leni en.

³⁸ Mi na MASRA, un Gado, di puru un na ini Egiptekondre, fu gi un a kondre Kanaan èn fu kan de un Gado.

³⁹ Efu wan fu unu e pina taki a abi fu seri ensrefi gi yu, dan yu no sa meki a wroko leki srafu.

⁴⁰ Yu mus si en leki wan sma di yu yuru fu wroko gi yu noso leki wan sma di e tan fu wan pisten nanga yu. A sa wroko gi yu te leki a yari fu gi baka.

⁴¹ Baka dati a kan gwe. En nanga den pikin fu en. A sa drai go baka na en famiri èn a sa kisi den sani baka di den afo fu en libi gi en na baka.

⁴² Den sma fu Israel na knekti fu Mi, di Mi puru na ini Egiptekondre. Dat' meki sma no kan seri den leki fa den e seri srafu.

⁴³ Un no sa basi a sma di seri ensrefi. Tapu sowan fasi un e sori lespeki gi un Gado.

⁴⁴ Den mansrafu nanga den umasrafu fu unu di un abi, sa de sma fu den folku lontu unu. Den man nanga den umasrafu di un bai sa de sma fu den folku dati.

⁴⁵ Un kan bai doroseisma tu di e tan fu wan pisten nanga unu, noso den pikin fu den di den kisi ini a kondre fu unu. Dan den sa de fu unu.

⁴⁶ Yu kan libi den srafu disi leki wan gudu na baka gi den pikin fu yu. Dan den sa de fu den pikin fu yu. Fu têgo den sa wroko gi unu. Ma efu na wan fu unu, wan sma fu Israel, un no sa basi en.

⁴⁷ Efu wan doroseisma noso wan sma di e tan fu wan pisten nanga unu kon gudu, èn wan fu unu kon pina taki a abi fu seri ensrefi gi a doroseisma, gi a sma di e tan fu wan pisten nanga unu noso gi wan famiri fu a doroseisma,

⁴⁸ dan na un plekti fu bai en puru baka. Wan brada fu en kan bai en puru baka.

⁴⁹ Wan omu fu en kan bai en puru tu noso a manpikin fu en omu noso wan tra famiri. Efu ensrefi kon abi nofo moni fu bai ensrefi puru, dan a kan du dati tu.

⁵⁰ Makandra nanga a sma di ben bai en, den sa luku oten a ben seri ensrefi te go miti a yari fu gi baka. A sa abi fu pai fu den yari di libi ete fu go miti a yari fu gi baka. Dati sa de a srefi moni di a bo pai wan wrokoman di sma kan yuru fu wroko gi en.

⁵¹ Efu furu yari libi ete, dan a sa abi fu pai a moni di fiti fu pai wan wrokoman di yu kan yuru.

⁵² Efu furu yari no de moro go miti a yari fu gi baka, den sa luku omeni libi ete dan a man sa pai a moni di fiti den yari dati.

⁵³ A sma di ben bai wan fu unu mus si unu leki wan wrokoman di sma kan yuru fu wroko. A no sa basi unu.

⁵⁴ Ma efu sma no ben man bai en puru baka, dan en nanga den pikin fu en sa kon fri te a yari fu gi baka doro.

⁵⁵ Bika den sma fu Israel na knekti fu Mi. Den na Mi knekti, di Mi puru na ini Egiptekondre. Mi na MASRA, un Gado.’ ”