Leviticus 20 - Sranan Tongo Bible 2016

¹ MASRA taigi Moses taki:

² “Taigi den sma fu Israel taki: ‘Den sa kiri ibri Israelitisma noso ibri doroseisma di e libi na ini Israel, di tyari wan pikin fu en leki ofrandi gi Molok. A folku sa fringi ston na en tapu te leki a dede.

³ Misrefi sa drai Mi baka gi sowan sma. Mi sa yagi en fu têgo kmoto na mindri fu den Israelitisma fu di a tyari wan pikin fu en leki ofrandi gi Molok. Tapu a fasi dati a e doti a santa presi fu Mi èn a e afrontu Mi santa nen.

⁴ Efu a folku e tapu en ai gi a sani disi èn den no kiri a man, ma den libi en fu tyari wan pikin fu en leki ofrandi gi Molok,

⁵ dan Mi sa drai Mi baka gi a man disi nanga en heri famiri. Mi sa yagi en fu têgo kmoto na mindri fu den Israelitisma makandra nanga ala den sma di e waka na en baka. Bika den e huru gi Mi nanga a dini di den e dini Molok.

⁶ Mi sa drai Mi baka gi iniwan sma èn Mi sa yagi en fu têgo kmoto na mindri fu den Israelitisma, efu a huru gi Mi fu go suku yepi na den yeye fu dedewan noso na yeye di e taigi sma sani di de fu kon.

⁷ Un mus sorgu taki un santa èn un mus tan santa, bika Mi na MASRA, un Gado.

⁸ Un sa hori unu finifini na den sani di un mus tan du. Mi na MASRA, na Mi poti un aparti.

⁹ Un sa kiri a sma di fluku en papa noso en mama. Na ensrefi suku en dede efu a fluku en papa noso en mama.

¹⁰ Un sa kiri a man di go na bedi nanga wan tra man frow. Un sa kiri en nanga a frow nanga san a go na bedi.

¹¹ Efu wan man go na bedi nanga a frow fu en papa, a e gi en papa syen nanga dati. Un sa kiri den ala tu. Na densrefi suku den dede.

¹² Efu wan man go na bedi nanga a frow fu en manpikin, un sa kiri den ala tu. Na wan trutru hogri sani den du. Na densrefi suku den dede.

¹³ Efu wan man go na bedi nanga wan tra man, leki fa yu e go na bedi nanga wan uma, un sa kiri den ala tu. Na wan groskin sani den du. Na densrefi suku den dede.

¹⁴ Na wan trutru syen sani efu wan man go na bedi nanga wan uma èn nanga a mama fu a uma dati. Un sa bron den ala dri fu puru a syen dati na un mindri.

¹⁵ Un sa kiri a man di go na bedi nanga wan meti. Un sa kiri a meti tu.

¹⁶ Wan uma no sa go na wan meti tu fu go nanga a meti na bedi. Un sa kiri a uma nanga a meti dati. Den no sa tan na libi. Na densrefi suku den dede.

¹⁷ Na wan syen sani efu wan man teki en eigi sisa noso en afu sisa fu libi, dan a go na bedi nanga en. Den sa yagi den fu têgo kmoto na mindri fu den Israelitisma, leti na ala sma fesi. A man fiti fu kisi strafu fu di a go na bedi nanga en eigi sisa.

¹⁸ Efu wan man sribi nanga wan uma di abi en munsiki, un mus yagi a man nanga a uma dati fu têgo kmoto na mindri fu den Israelitisma. Bika a man opo a krosi fu a uma, meki a presi fu pe a uma e brudu de fu si èn a uma ben wani dati tu.

¹⁹ Yu no sa go na bedi nanga a sisa fu yu mama noso nanga a sisa fu yu papa. Bika nanga dati yu e gi yu famiri syen. Den fiti fu kisi strafu.

²⁰ A man di go na bedi nanga en tanta e gi en omu syen. Den fiti fu tyari a strafu fu den sondu. Den no sa kisi pikin.

²¹ Na wan trutru syen sani efu wan man teki wan frow libi nanga san en brada ben e libi fosi. A e gi en brada syen nanga dati. Den no sa kisi pikin.

²² Ma un mus du ala den sani di un mus tan du èn un mus tan hori unsrefi finifini na ala den sani fu Mi. Efu un no du dati, a kondre pe Mi e tyari un go fu libi, sa spiti un puru.

²³ Un no sa du den sani di a folku ben e du di Mi sa yagi puru na un fesi. Bika na fu di den ben e du ala den sani disi meki Mi no wani si den srefsrefi moro.’

²⁴ Ma un Mi taigi taki: ‘Un sa teki a kondre abra èn Mi sa gi en na unu, wan kondre pe merki nanga oni de bogobogo. Mi na MASRA, un Gado. Na Mi poti un aparti fu den tra folku.’

²⁵ Un mus prati meti di bun fu nyan nanga meti di no bun fu nyan, èn fowru di bun fu nyan nanga fowru di no bun fu nyan. Un mus du disi fu un no tron wan groskin sani, fu di un nyan wan meti, wan fowru noso wan sani di e kroipi na gron, di no krin ini Mi ai.

²⁶ Un mus sorgu taki un santa, bika Mi, MASRA, santa. Na Mi poti un aparti fu den tra folku, fu un kan de fu Mi.

²⁷ Un sa kiri a man noso a uma di e meki a yeye fu dedewan taki noso di abi wan yeye di e taigi sma sani di de fu kon. Un sa fringi ston na den tapu kiri den. Na densrefi suku den dede.”