Leviticus 19 - Sranan Tongo Bible 2016

¹ MASRA taigi Moses taki:

² “Yu mus taigi a heri folku fu Israel taki: ‘Un mus santa bika Mi, MASRA, un Gado, santa.

³ Lespeki un mama nanga un papa èn memre fu un hori a sabatdei leki fa Mi komanderi unu. Mi na MASRA, un Gado.

⁴ Un no sa bemui nanga kruktu gado èn un no sa meki gowtu noso solfru popki fu den gado. Mi na MASRA, un Gado.

⁵ Te un o tyari wan freide-ofrandi gi MASRA, un mus tyari en sowan fasi, taki A abi prisiri nanga en.

⁶ Un sa nyan en tapu a dei di un tyari en leki ofrandi, nanga a tra dei fu en. Ma san tan kon miti a di fu dri dei, un sa bron nanga faya.

⁷ Efu un nyan en tapu a di fu dri dei, Gado no sa abi prisiri nanga a ofrandi dati. A sa de wan groskin sani.

⁸ A sma di nyan en fiti fu kisi strafu fu di a afrontu wan santa sani fu MASRA. Sowan sma un mus yagi fu têgo kmoto na mindri fu den Israelitisma.

⁹ Te un o koti nyanyan ini un gron, un no sa koti kon te na a lantyi fu a gron. Un no sa drai go baka tu fu piki san didon na gron.

¹⁰ Te un o piki droifi ini un droifidyari, un no sa drai go baka tu fu piki den droifi di fadon na gron. Un sa libi den dati gi den pôtiwan nanga gi den doroseisma. Mi na MASRA, un Gado.

¹¹ Un no sa fufuru. Un no sa lei èn un no sa bedrigi wan trawan.

¹² Te un o meki wan sweri un no mus kari Mi nen, efu un sabi taki a sani no tru. Tapu sowan fasi un e afrontu a nen fu un Gado. Mi na MASRA.

¹³ Un no sa puru wan sani tapu wan bedrigi fasi noso nanga tranga na wan trawan anu. Un no sa hori a moni fu wan wrokoman di yu yuru, te a tamara fu en.

¹⁴ Un no sa fluku wan dofuman èn un no sa poti wan sani na pasi gi wan breniman fu a fadon. Un sa lespeki Mi. Mi na Gado.

¹⁵ Te un e koti krutu un mus taki den sani leki fa den de. Un no sa gi wan sma leti fu di a de wan pôtisma. Un no sa teki a sei tu fu a guduwan fu a kisi leti. Un sa taki den sani leki fa den de.

¹⁶ Sma fu un eigi folku no mus sabi unu leki sma di e taki sani sondro fu prakseri bun. Yu no sa meki taki wan trawan kan lasi en libi fu di yu e takitaki sani. Mi na MASRA.

¹⁷ No hori wan trawan na ati. Efu yu mus warskow wan trawan fu wan sani, yu mus kari en dan yu warskow en. Tapu so wan fasi yu no e sondu fu en ede.

¹⁸ Yu no sa pai ogri nanga ogri èn yu no sa hori wan sma fu yu eigi folku na ati tu. Yu sa lobi wan trawan leki fa yu lobi yusrefi. Mi na MASRA.

¹⁹ Un mus tan du den sani fu Mi di un mus tan du. Fu den meti di un e kweki un no sa meki tu difrenti sortu meki pikinwan. Un no sa sai tu sortu sani na ini wan gron. Un no sa weri wan sani di meki nanga tu sortu krosi.

²⁰ Efu wan man sribi nanga wan umasrafu di wan tra man ben o bai, dan den sa strafu a man nanga a uma awinsi a tra man no ben pai ete fu a umasrafu èn awinsi a uma no ben poti fri ete. Den no sa kiri den fu di a umasrafu no ben poti fri ete.

²¹ Leki paiman a man sa tyari wan man skapu kon leki ofrandi fu kisi pardon fu sondu. A sa tyari en go na mofodoro fu a tenti pe yu kan miti nanga Gado.

²² Nanga a ofrandi fu a man skapu di a man tyari kon leki paiman, a priester sa meki a man kon bun baka nanga Gado, dan a man sa kisi pardon fu a sondu di a du.

²³ Te un doro ini a kondre èn un prani ala sortu froktu bon, un no sa fasi den froktu. Dri yari langa un no sa fasi den èn un no sa nyan den.

²⁴ Ini a di fu fo yari un sa poti ala froktu aparti leki wan ofrandi fu prijse MASRA.

²⁵ Ini a di fu feifi yari un kan nyan fu den froktu dan den bon sa gi moro furu froktu. Mi na MASRA, un Gado.

²⁶ Un no sa nyan noti di abi brudu ete. Un no sa koti luku gi sma noso du tofruwroko.

²⁷ Un no sa piri un sei ede èn un no sa koti a lantyi fu un barba puru

²⁸ te wan sma fu un dede. Un no sa tyerfi un skin noso koti marki ini un skin tu. Mi na MASRA.

²⁹ Un no sa broko den pikin fu un saka fu meki den tron motyo. Efu un du dati a heri kondre o huru èn furu nanga a syen sani dati.

³⁰ Un sa hori a sabatdei leki fa Mi komanderi unu. Un mus lespeki a santa presi fu Mi. Mi na MASRA.

³¹ Un no sa go suku yepi na yeye fu dedewan noso na yeye di e taigi sma sani di de fu kon. Un no mus go suku den èn un mus no doti unsrefi nanga den. Mi na MASRA, un Gado.

³² Opo gi owrusma èn lespeki den. Lespeki yu Gado tu. Mi na MASRA.

³³ Un no sa libi takru nanga wan doroseisma di e libi ini a kondre fu unu.

³⁴ Un sa libi nanga wan doroseisma neleki en na wan sma fu Israel. Yu sa lobi en leki fa yu lobi yusrefi, bika unsrefi ben de doroseisma ini Egipte. Mi na MASRA, un Gado.

³⁵ Un sa taki den sani leki fa den de te un e koti krutu. No bedrigi wan trawan tu te un mus marki wan sani, wegi wan sani noso kanti wan sani ini wan markikan.

³⁶ Den wegi fu unu sa de soifri wegi èn den markikan mus de soifri sani. Mi na MASRA, di puru unu na ini Egipte.

³⁷ Un sa du ala den sani fu Mi di un mus tan du èn un sa hori unsrefi finifini na ala den sani fu Mi. Mi na MASRA.’ ”