Leviticus 16 - Sranan Tongo Bible 2016

A dei fu meki en bun baka nanga Gado

¹ Den tu boi fu Aaron ben dede fu di den ben kon krosbei fu MASRA. Baka dati MASRA taigi Moses taki:

² “Taigi yu brada Aaron taki a no sa kon oten a wani baka a garden, ini a moro santa presi, fesi a tapun fu a santa kisi. Efu a du dati a o dede. Bika na drape, tapu a tapun dati, Mi e sori Misrefi na ini wan wolku.

³ Tapu a fasi disi wawan Aaron sa kon ini a moro santa presi: A sa kon nanga wan yongu bulu leki ofrandi fu kisi pardon fu en sondu, nanga wan man skapu fu bron leki ofrandi.

⁴ A sa weri a santa ondrokrosi nanga wan linnen ondrobruku. A sa tai wan linnen banti lontu en bere èn a sa lontu en ede nanga wan linnen duku. Disi na den santa krosi di a mus weri. A sa weri den baka te a wasi en skin.

⁵ Den sma fu Israel sa gi en tu bokoboko leki ofrandi fu kisi pardon fu sondu nanga wan man skapu fu bron leki ofrandi.

⁶ Aaron sa tyari a bulu fu en fosi leki ofrandi fu kisi pardon fu sondu, fu meki taki en nanga den sma fu en oso kon bun baka nanga Gado.

⁷ Baka dati a sa tyari den tu bokoboko kon na MASRA fesi, na mofodoro fu a tenti pe yu kan miti nanga Gado.

⁸ Dan Aaron sa fringi a lot fu luku sortu bokoboko sa de gi MASRA, èn sortu wan gi Asasel.

⁹ Te a lot sori sortu bokoboko na fu MASRA, Aaron sa teki a bokoboko dati leki ofrandi fu kisi pardon fu sondu.

¹⁰ Ma a bokoboko di a lot sori taki en na gi Asasel, den sa poti tnapu libilibi na MASRA fesi. Den sa seni a bokoboko disi go ini a sabana gi Asasel èn tapu a fasi disi den sa kon bun baka nanga Gado.

¹¹ Aaron sa tyari a bulu fu en leki wan ofrandi fu kisi pardon fu en eigi sondu, fu meki taki en nanga den sma fu en oso kon bun baka nanga Gado. Ensrefi sa srakti a bulu fu kisi pardon fu en sondu.

¹² Fu a altari di tnapu na MASRA fesi, a sa teki krofaya di e bron ete poti ini wan pan. A sa furu den anu fu en tu nanga a wierook di e smeri switi, dan a sa go nanga ala den sani disi ini a moro santa presi baka a garden.

¹³ Aaron sa poti a wierook tapu a faya, na MASRA fesi, fu a smoko fu a wierook kan tapu a tapun fu a santa kisi pe den wortu de di ben e memre den na san Gado taki. Efu a no du dati a o dede.

¹⁴ A sa teki pikinso fu a brudu fu a bulu nanga en finga, dan a dropudropu en na fes'sei fu a tapun, èn na gron fesi a tapun a sa dropudropu seibi leisi pikinso fu a brudu nanga en finga tu.

¹⁵ Baka dati a sa srakti a bokoboko, fu a folku kisi pardon fu en sondu. Te a du dati a sa tyari a brudu go na inisei baka a garden. A sa du a srefi sani nanga a brudu disi, leki fa a ben du nanga a brudu fu a bulu. A sa dropudropu en na fes'sei fu a tapun nanga na gron fesi a tapun.

¹⁶ Tapu a fasi disi Aaron e krin a moro santa presi fu a kan bun gi Gado, nanga fu den ogridu, den takrudu nanga den sondu fu den Israelitisma. Na so a sa du tu nanga a tenti pe yu kan miti nanga Gado, di tnapu na mindri fu a folku nanga ala den sondufasi fu den.

¹⁷ No wan sma mus de ini a tenti pe yu kan miti nanga Gado, te Aaron go na inisei fu go meki en bun nanga Gado. Den no sa du dati te leki a kon baka na dorosei. Baka te a meki en bun nanga Gado gi ensrefi, gi en oso nanga gi a heri folku fu Israel,

¹⁸ a sa go na dorosei na a altari di tnapu na MASRA fesi. A sa krin en fu a kan bun gi Gado. A sa teki pikinso fu a brudu fu a bulu nanga fu a bokoboko, dan a lobi en lontu na den tutu fu a altari.

¹⁹ Te a du dati, a sa dropudropu pikinso fu a brudu seibi leisi tapu a altari. Na so a e krin en fu den sondu fu den Israelitisma nanga den sani di e meki taki den no krin ini Gado ai, èn a e meki a altari kon santa baka.

²⁰ Baka te a krin a moro santa presi, a tenti pe yu kan miti nanga Gado, nanga a altari, fu den kan bun gi Gado, a sa tyari a bokoboko kon di den no ben kiri.

²¹ Aaron sa poti ala tu anu fu en tapu a ede fu a bokoboko, dan a sa taki ala den takrudu, den ogridu nanga den sondu di den sma fu Israel du. Na so a e poti den tapu a bokoboko. Dan wan sma di ben tnapu klari kba sa tyari a bokoboko go na a sabana.

²² Drape a sa lusu a bokoboko fu a go ini a sabana. Na so a bokoboko e teki ala a sondu fu a folku na en tapu tyari go na wan presi ini a sabana pe libisma no e go.

²³ Baka dati Aaron sa go na a tenti pe yu kan miti nanga Gado. A sa puru den linnen krosi di a ben weri, di a ben go ini a moro santa presi, dan a sa libi den drape.

²⁴ A sa wasi en skin tapu wan santa presi, dan a weri en tra krosi baka. Te a du dati, a sa go na dorosei, dan a bron a ofrandi di a ben mus bron gi ensrefi nanga di fu a folku, fu meki en bun nanga Gado gi en nanga gi a folku.

²⁵ A fatu fu a ofrandi fu kisi pardon fu sondu, a sa bron tapu a altari.

²⁶ A sma di ben tyari a bokoboko go gi Asasel, sa wasi en krosi nanga en skin. Baka dati a sa kon baka ini a kampu.

²⁷ Den sa teki a skin fu a bulu nanga a bokoboko di ben srakti fu kisi pardon fu sondu, tyari go na dorosei fu a kampu, dan den bron a buba, a meti nanga a inibere fu den. A brudu fu a meti disi den ben tyari go ini a santa presi fu kisi pardon fu sondu.

²⁸ A sma di bron den sa wasi en krosi nanga en skin. Baka dati a sa kon ini a kampu baka.

²⁹ Den sani disi un sa tan du fu têgo: Tapu a di fu tin dei, fu a di fu seibi mun, un mus faste èn un no mus du no wan wroko. Disi na gi den sma fu Israel, ma a de tu gi den doroseisma di e libi na un mindri.

³⁰ Bika tapu a dei dati a priester sa meki un kon bun baka nanga Mi, fu un kan kon krin baka. Un sa kon krin baka fu ala sondu na MASRA fesi.

³¹ A sa de wan trutru sabatdei gi unu. Un sa faste èn a sa de wan sani di un sa tan du fu têgo.

³² A priester di den salfu èn di den wei fu du a wroko te en papa no de moro, sa meki un kon bun baka nanga Gado. Na en sa weri den santa linnen krosi.

³³ A sa krin a moro santa presi, a tenti pe yu kan miti nanga Gado nanga a altari èn a sa meki den tra priester nanga a heri folku kon bun baka nanga Gado.

³⁴ Disi na wan sani di un mus tan du fu têgo, fu meki den sma fu Israel kon bun baka nanga Gado fu den sondu di den du. Un sa du en wan leisi wan yari.” Dan Moses du ala sani leki fa MASRA ben taigi en fu du.