Leviticus 13 - Sranan Tongo Bible 2016

Den sani di mus du na son siki fu a skin

¹ MASRA taigi Moses nanga Aaron taki:

² “Te wan sma abi wan sweri, wan soro noso wan lekti flaka na en skin di wani gersi wan siki fu a skin, den sa tyari en go na priester Aaron noso wan fu den manpikin fu en, sobun den priester.

³ A priester sa luku a presi pe a flaka de. Efu a si taki a wiwiri tapu a presi dati kon weti èn taki a presi dati didon moro dipi leki a tra buba fu a skin, dan na wan siki fu a skin a sma abi. Te a priester si dati a sa taki tak' a sma dati no krin ini Gado ai.

⁴ Efu a sma abi wan weti flaka na en skin, ma a presi fu a flaka no didon moro dipi leki a tra buba fu a skin èn a wiwiri tapu a presi dati no weti tu, a priester sa tapu a sma dati poti seibi na wan presi.

⁵ Tapu a di fu seibi dei a priester sa luku a flaka baka. Efu a priester luku èn a si taki a flaka tan a srefi èn taki a no panya moro fara, a sa tapu a sma dati ete seibi dei.

⁶ Baka den seibi dei dati a priester sa luku a flaka baka. Efu a si taki a flaka e kon dungru èn taki a no panya ensrefi go moro fara, a priester sa taki tak' a sma dati krin ini Gado ai. A no ben de noti moro leki wan flaka. A sma sa wasi en krosi, dan a krin ini Gado ai baka.

⁷ Ma efu a flaka panya ensrefi go moro fara, baka di a sma ben go na a priester fu a priester luku gi en efu a krin ini Gado ai, a sa abi fu go baka na a priester.

⁸ Efu a priester luku a flaka èn a si taki a flaka panya ensrefi moro fara, a sa taigi a sma taki a no krin ini Gado ai. Na wan siki fu a skin a abi.

⁹ Efu wan siki broko na wan sma skin, den sa tyari a sma dati go na a priester.

¹⁰ Efu a priester luku èn a si taki a sma abi wan sweri na en skin di weti, taki a wiwiri srefi kon weti tu èn taki grometi e gro tapu a sweri,

¹¹ dan a priester no abi fu poti sowan sma aparti moro bika a de krin fu si taki na wan siki fu a skin a abi. A sma no krin ini Gado ai.

¹² Efu a priester si, so fara leki a kan si, taki a siki broko na a sma heri skin, fu en ede kon miti en futu,

¹³ a sa ondrosuku a sma moro fini. Efu a de so taki a siki broko trutru na a sma heri skin, a priester sa taigi a sma taki a krin ini Gado ai. So wan sma krin ini Gado ai, fu di en heri skin kon weti.

¹⁴ Ma efu grometi de fu si, dan sowan sma no krin ini Gado ai.

¹⁵ Efu a priester si taki grometi de, a sa taigi a sma taki a no krin ini Gado ai. Bika a grometi no krin. Na wan siki fu a skin a sma abi.

¹⁶ Ma te a grometi kon weti, a sma sa go baka na a priester.

¹⁷ A priester sa luku èn efu a si taki a grometi kon weti, a sa taigi a sma taki a kon krin ini Gado ai. Sowan sma krin ini Gado ai.

¹⁸ Efu wan sma ben abi wan butsweri na en skin di kon betre,

¹⁹ ma dan wan weti sweri broko tapu a presi dati, noso wan rediredi weti flaka, a sma sa go na a priester fu a priester luku en.

²⁰ Efu a priester luku a sweri èn a si taki a didon moro dipi leki a tra buba fu a skin, èn taki a wiwiri tapu a sweri kon weti, a sa taigi a sma taki a no krin ini Gado ai. Na wan siki fu a skin broko ini a sweri.

²¹ Ma efu a priester luku èn a si taki a wiwiri tapu a sweri no weti, taki a no didon moro dipi leki a tra buba fu a skin èn taki a skin e kon dungru, a priester sa tapu a sma dati poti seibi na wan presi.

²² Efu ini den seibi dei dati a sweri panya moro fara abra a skin, dan a priester sa taigi a sma taki a no krin ini Gado ai. Na wan siki fu a skin a abi.

²³ Ma efu ini den seibi dei a flaka tan a srefi èn a no panya moro fara, dan a ben de noti moro leki a marki fu a soro. A priester sa taigi a sma taki a krin ini Gado ai.

²⁴ Efu wan sma bron, dan a presi dati bigin gi wan redi grometi noso wan weti flaka,

²⁵ a priester sa abi fu luku en. Efu a de so taki a wiwiri tapu a weti flaka kon weti tu èn taki a flaka didon moro dipi leki a tra buba fu a skin, dan na wan siki fu a skin broko na ini a bronmarki. A priester sa taigi a sma taki a no krin ini Gado ai. Na wan siki fu a skin a abi.

²⁶ Efu a priester luku dan a si taki a wiwiri tapu a weti flaka no kon weti, taki a flaka no didon moro dipi leki a tra buba fu a skin èn taki a flaka e kon dungru, a priester sa tapu a sma dati poti seibi na wan presi.

²⁷ Baka seibi dei a priester sa luku a flaka baka. Efu a flaka panya ensrefi moro fara, a priester sa taigi a sma taki a no krin ini Gado ai. Na wan siki fu a skin a abi.

²⁸ Ma efu a flaka tan a srefi, efu a no panya ensrefi go moro fara èn efu a kon dungru, dan a no de noti moro leki na sweri a bronmarki ben sweri. A priester sa taigi a sma taki a krin ini Gado ai. Na wan bronmarki a sma abi.

²⁹ Efu wan man noso wan uma abi wan soro na en ede noso efu a man abi wan soro ondro a barba,

³⁰ a priester sa luku a soro. Efu a soro didon moro dipi leki a tra buba fu a skin èn efu a wiwiri drape geri èn a doi moro leki a tra wiwiri, a priester sa taigi a sma taki a no krin ini Gado ai. Na wan siki a abi. Na wan siki fu a skin broko na en ede noso barba.

³¹ Efu a priester luku a soro dan a si taki a no didon moro dipi leki a tra buba fu a skin, ma taki a wiwiri drape no blaka, a priester sa tapu a sma dati poti seibi dei na wan presi.

³² Baka den seibi dei dati a priester sa luku a soro baka. Efu a soro no panya ensrefi go moro fara, efu a wiwiri drape no kon geri èn efu a soro no didon moro dipi leki a tra buba fu a skin,

³³ a sma mus puru a barba lontu a soro. Te a du dati a priester sa tapu a sma dati poti ete seibi dei na wan presi.

³⁴ Baka den seibi dei dati a priester sa luku a soro baka. Efu a soro no panya ensrefi go moro fara, efu a no didon moro dipi leki a tra buba fu a skin, a priester sa taigi a sma taki a krin ini Gado ai. A sa wasi en krosi, dan a sa krin baka ini Gado ai.

³⁵ Ma efu a soro panya ensrefi go moro fara baka di a priester taigi en taki a krin ini Gado ai,

³⁶ a priester sa luku en baka. Efu a de so taki a soro panya ensrefi go moro fara, dan a priester no abi fu luku srefi efu a wiwiri kon geri tu. Sowan sma no krin ini Gado ai.

³⁷ Ma efu a priester luku, dan a si taki a soro no panya go moro fara èn efu blaka wiwiri e gro na en tapu, dan a soro kon betre. Sowan sma krin ini Gado ai. A priester sa taigi en taki a krin ini Gado ai.

³⁸ Te wan man noso wan uma kisi lekti weti flaka tapu en skin,

³⁹ a priester sa abi fu luku den. Efu den weti flaka no e brenki ma den dungrudungru, dan na noti moro leki wan flaka nomo di de tapu a buba. Sowan sma krin ini Gado ai.

⁴⁰ Te a edewiwiri fu wan mansma e fadon, na piri en ede e piri. Sowan sma krin ini Gado ai.

⁴¹ Efu na en fes'ede a wiwiri e fadon, dan na piri en fes'ede e piri. Sowan sma krin ini Gado ai.

⁴² Ma efu wan rediredi weti flaka de fu si pe a wiwiri fadon na en mindri ede noso en fes'ede, dan na wan siki fu a skin broko na en mindri ede noso en fes'ede.

⁴³ A priester sa luku en. Efu a si taki na wan rediredi weti sweri de na a sma mindri ede pe a wiwiri fadon, noso na en fes'ede di piri èn a sweri gersi wan siki fu a skin,

⁴⁴ dan na wan siki fu a skin a sma abi. Sowan sma no krin ini Gado ai. A priester abi fu taigi en taki a no krin ini Gado ai. Na wan siki fu a skin broko na en ede.

⁴⁵ A sma di abi a siki mus priti en krosi. A mus libi en wiwiri meki a anga, nanga en anu a mus tapu en snor nanga en barba èn a mus bari: ‘Mi no krin! Mi no krin!’

⁴⁶ Solanga leki a abi a siki fu en skin a e tan so taki a no krin ini Gado ai. A sa libi aparti. A no sa tan ini a kampu.

⁴⁷ Efu wan flaka de fu si tapu wan krosi, tapu a titei fu wan linnen krosi noso wan katun krosi,

⁴⁸ tapu leer noso tapu wan sani di meki fu leer,

⁴⁹ èn a flaka na a titei fu a krosi noso na a leer grungrun noso a rediredi, dan na wan siki broko na a krosi noso a leer di e pori en. Den sa tyari en gi a priester fu a luku en.

⁵⁰ A priester sa luku a sani di kisi a flaka, dan a sa tapu en poti seibi dei na wan sei.

⁵¹ Baka den seibi dei dati a sa luku a flaka baka. Efu a priester si taki a flaka panya ensrefi moro fara na a titei fu a krosi noso a leer, dan na wan siki di den no man tapu moro e pori a krosi noso a leer. A no abi trobi san den ben e du nanga en ma a titei noso a leer disi no krin ini Gado ai.

⁵² A priester sa bron a krosi nanga a katun noso a linnen titei fu san a meki. A sa bron a sani fu leer tu di kisi a siki. A sa bron den nanga faya bika na wan siki di den no man tapu moro e pori den.

⁵³ Ma efu a priester si taki a flaka na a krosi, na a titei noso a leer no panya go moro fara,

⁵⁴ dan a sa taigi den fu wasi a sani. Baka dati a sa tapu en poti ete seibi dei na wan sei.

⁵⁵ Baka den seibi dei dati den sa wasi a sani, dan a priester sa luku en baka. Efu a flaka no panya moro fara ma a tan a srefi, dan a sani no krin ini Gado ai. Den sa bron en nanga faya bika a siki pori a sani kba.

⁵⁶ Ma efu a priester si taki a flaka kon dungru, baka di den wasi a sani, dan a sa priti a flaka puru na a krosi, a leer noso a titei.

⁵⁷ Efu a flaka kon baka na titei fu a krosi noso a sani di meki fu leer, dan na broko wan siki broko na a sani di e nyan en. Den sa bron a sani di kisi a siki nanga faya.

⁵⁸ Efu a flaka ben kmoto na a titei fu a krosi noso a sani fu leer baka di den wasi en, den sa wasi en ete wan leisi dan a sani sa krin baka ini Gado ai.”

⁵⁹ Disi na a wèt te wan siki e nyan a titei fu katun noso linnen krosi, noso na wan sani di meki fu leer. Dan sma kan sabi efu wan sani krin ini Gado ai noso efu a no krin ini Gado ai.