Leviticus 11 - Sranan Tongo Bible 2016

Den meti di bun fu nyan nanga den wan di no bun fu nyan

¹ MASRA taigi Moses nanga Aaron taki:

² “Taigi den sma fu Israel taki: ‘Fu ala den meti na grontapu disi na den wan di un kan nyan:

³ Un kan nyan ala meti di fes'futu priti na tu. Den fes'futu no mus priti afu nomo èn den mus de meti di e nyan, dan baka dati den en kaw a nyanyan fu a di fu tu leisi.

⁴ Meti di e kaw den nyanyan fu a di fu tu leisi, ma di fes'futu no priti na tu, un no sa nyan. Meti di fes'futu priti na tu, ma di no e kaw den nyanyan fu a di fu tu leisi, un no sa nyan tu. Un no sa nyan a kameel, bika a e kaw a nyanyan fu a di fu tu leisi, ma en fes'futu no priti. Dat' meki un mus si en leki wan meti di no krin ini Gado ai.

⁵ A klipdas srefi e kaw a nyanyan fu a di fu tu leisi, ma en fes'futu no priti. Un mus si en leki wan meti di no krin ini Gado ai.

⁶ A hei srefi e kaw a nyanyan fu a di fu tu leisi, ma en fes'futu no priti. Un mus si en leki wan meti di no krin ini Gado ai.

⁷ A agu fes'futu priti trutru. A no priti afu nomo. Ma a no e kaw en nyanyan fu a di fu tu leisi. Un mus si en leki wan meti di no krin ini Gado ai.

⁸ Un no sa nyan den meti disi èn un no sa fasi a dedeskin fu den. Un mus si den leki meti di no krin ini Gado ai.

⁹ Fu ala den meti di e libi ini watra, disi na den wan di un kan nyan: un kan nyan ala sani di e libi na ini watra, ini den se nanga ini den liba di abi vin nanga buba.

¹⁰ Ma ala den sani di e libi ini den se nanga ini den liba, pikinwan nanga den bigiwan, di no abi vin nanga buba, sa de wan groskin sani gi unu.

¹¹ Den mus de wan groskin sani gi unu. Un no sa nyan a meti fu den èn un mus fisti gi a dedeskin fu den.

¹² Ala sani di e libi na ini watra di no abi vin nanga buba, sa de wan groskin sani gi unu.

¹³ Fu den fowru di e frei na loktu, disi na den wan gi san un mus fisti. Un no sa nyan den. Den mus de wan groskin sani gi unu: den difrenti sortu aka,

¹⁴ den difrenti sortu tingifowru,

¹⁵ nanga den difrenti sortu blaka fowru di den e kari raaf.

¹⁶ Moro fara a struisfowru, den difrenti sortu owrukuku, a meeuw, den difrenti sortu sperwer

¹⁷ a aalscholver,

¹⁸ a pelikaan,

¹⁹ a ooievaar, den difrenti sortu sabaku, a hop nanga a fremusu.

²⁰ Ala den pikinpikin sani di abi frei nanga fo futu sa den wan groskin sani gi unu.

²¹ Ma fu den pikinpikin sani di abi fo futu nanga frei, un kan nyan den disi: den wan di no abi futu wawan ma di abi bowtu tu nanga san den e dyompo.

²² Dati na: ala den difrenti sortu sprenka, den bigiwan, den pikinwan, nanga den kot'koti.

²³ Ma ala pikinpikin sani di abi frei nanga fo futu sa de wan groskin sani gi unu.

²⁴ Efu wan sma fasi a dedeskin fu wan meti di no krin ini Gado ai, sowan sma no sa krin moro ini Gado ai tu te leki neti tapu.

²⁵ Ala sma di fasi a dedeskin fu den, sa wasi en krosi èn a sma dati no sa krin ini Gado ai te leki neti tapu.

²⁶ Ala meti di fes'futu priti afu nomo èn di no e kaw den nyanyan fu a di fu tu leisi, un mus si leki meti di no krin ini Gado ai. Ala sma di fasi den no sa krin ini Gado ai tu te leki neti tapu.

²⁷ Ala meti nanga fo futu di te den e waka den e poti den heri futu plata na gron, un sa si leki meti di no krin ini Gado ai. Ala sma di fasi a dedeskin fu den no sa krin ini Gado ai tu te leki neti tapu.

²⁸ Ala sma di fasi a dedeskin fu den, sa wasi en krosi èn a sma dati no sa krin ini Gado ai te leki neti tapu. Un mus si den meti disi leki meti di no krin ini Gado ai.

²⁹ Fu den meti di en kroipi na gron, disi na den wan di un mus si leki meti di no krin ini Gado ai: a mol, a moismoisi nanga ala den difrenti sortu todo.

³⁰ Moro fara a kamrawenke, a sapakara, a lagadisa, a pakro, nanga a agama.

³¹ Fu ala den meti di e kroipi na gron den disi na den wan di un mus si leki meti di no krin ini Gado ai. Ala sma di fasi a dedeskin fu den no sa krin ini Gado ai te leki neti tapu.

³² Efu a dedeskin fu wan fu den meti disi fadon tapu wan sani, a sani dati no krin moro ini Gado ai tu. Un sa poti a sani fu udu, a krosi, a saka noso a meti buba tapu san a dede meti fadon, ini watra. Den no sa krin ini Gado ai te leki neti tapu. Baka dati a sa krin ini Gado ai baka.

³³ Efu sowan meti fadon ini wan kroiki, dan a kroiki nanga ala sani di de na ini no krin moro ini Gado ai. Un mus naki a kroiki broko.

³⁴ Ala nyansani di wasi nanga watra di ben de ini a kroiki no sa krin moro ini Gado ai. A sani fu dringi di ben de ini a kroiki, no sa krin moro ini Gado ai.

³⁵ Ala sani tapu san a dedeskin fu sowan meti fadon, no sa krin moro ini Gado ai. Un sa naki a onfu nanga a pan broko. Un mus si den leki sani di no krin moro ini Gado ai èn un mus tan si den so.

³⁶ Ma efu a dedeskin fu sowan meti fadon ini wan watrabron noso wan watrabaki, a watra dati e tan krin ini Gado ai. Ma a sma di fasi a dede meti, no sa krin ini Gado ai.

³⁷ Efu a dedeskin fu sowan meti fadon tapu siri di wan sma bo sai, a siri dati e tan krin ini Gado ai.

³⁸ Ma efu a siri ben de ini watra, dan a dedeskin fu sowan meti fadon na tapu, a siri dati no sa krin moro ini Gado ai.

³⁹ Efu wan sma fasi a dedeskin fu wan meti di libisma kan nyan, a sma dati no krin ini Gado ai te leki neti tapu.

⁴⁰ A sma di nyan fu a dedeskin sa wasi en krosi èn a no sa krin ini Gado ai te leki neti tapu. A sma di opo a dedeskin fu sowan meti sa wasi en krosi tu èn a sma no sa krin ini Gado ai te leki neti tapu.

⁴¹ Ala meti di e kroipi na gron sa de wan groskin sani. Un no sa nyan den.

⁴² Efu na tapu den bere den e kroipi, efu den e waka tapu fo futu noso efu den abi moro leki fo futu, un no sa nyan den. Un mus si den leki meti di no krin ini Gado ai.

⁴³ Sorgu taki unsrefi no tron wan groskin sani fu doti unsrefi ini Gado ai nanga wan fu den meti disi.

⁴⁴ Bika Mi na MASRA, un Gado. Un mus santa, bika Mi santa. Un no doti unsrefi nanga den meti disi di e kroipi na gron.

⁴⁵ Bika Mi na MASRA, di puru unu na ini Egiptekondre fu kan de un Gado. Un mus santa, bika Mi santa.’ ”

⁴⁶ Disi na a wèt na san den ben mus hori densrefi gi den meti di sma man kweki, gi den fowru di e frei na loktu, gi ala libi sani di e libi na ini watra nanga gi ala libi sani di e kroipi na gron,

⁴⁷ fu prati den sani di krin ini Gado ai fu den sani di no krin ini Gado ai èn fu prati den meti di sma kan nyan fu den meti di sma no kan nyan.