Leviticus 10 - Sranan Tongo Bible 2016

A dede fu Nadab nanga Abihu

¹ Dan Nadab nanga Abihu, tu manpikin fu Aaron, teki den pan ini san den e tyari krofaya, den leti a krofaya, dan den bron wierook di e smeri switi na ini. Dan so den tyari faya kon na MASRA fesi di no ben meki leki fa a ben musu.

² Ne MASRA seni wan faya di bron den èn den dede na MASRA fesi.

³ Dan Moses taigi Aaron taki: “Na disi MASRA ben e taki di a taki: ‘Mi mus sori Mi santafasi na den wan di e kon krosbei fu Mi èn Mi sa meki a heri folku si Mi glori.’ ” Aaron no ben man taki noti.

⁴ Ne Moses kari Misael nanga Elsafan kon. Den ben de manpikin fu Usiyel, a omu fu Aaron. A taigi den taki: “Un kon puru den famiri fu unu fu a santa presi. Un tyari den go na dorosei fu a kampu.”

⁵ So den kon dan den tyari den go na dorosei fu a kampu, leki fa Moses ben taigi den. Den ben weri den langa ondrokrosi ete.

⁶ Dan Moses taigi Aaron nanga Eleasar nanga Itamar, den manpikin fu Aaron, taki: “Un no mus libi un edewiwiri anga èn un no mus priti un krosi noso un o dede. Efu un du dati MASRA ati o bron nanga a heri folku. Den famiri fu unu, den tra sma fu Israel, kan row fu a faya di MASRA ben seni kon.

⁷ Un no mus kmoto na mofodoro fu a tenti pe yu kan miti nanga Gado, noso un o dede. Bika un salfu nanga a salfu-oli fu MASRA.” So den du san Moses ben taigi den fu du.

⁸ MASRA taigi Aaron taki:

⁹ “Yu nanga den manpikin fu yu no sa dringi win noso wan tra dringi di kan meki un drungu, te un e kon ini a tenti pe yu kan miti nanga Gado. Efu un du dati un o dede. Na wan sani di unu nanga den pikin fu unu di e kon na baka, no sa du fu têgo.

¹⁰ Un mus du disi fu un kan sabi san poti aparti gi Gado nanga san no poti aparti gi Gado, èn san krin ini Gado ai nanga san no krin ini Gado ai.

¹¹ Dan un o man leri den Israelitisma ala den sani fu MASRA di den mus tan du. Den sani di A ben meki Moses taigi den sma.”

¹² Dan Moses taigi Aaron nanga Eleasar nanga Itamar, den manpikin fu Aaron di ben de na libi ete taki: “Teki a graan-ofrandi san tan abra fu den ofrandi fu MASRA di bron nanga faya. Un nyan en sei a altari, leki brede di no meki nanga dyesi, bika na wan tumsi santi sani.

¹³ Nyan en tapu wan santa presi, bika a pisi disi fu den ofrandi fu MASRA di bron nanga faya, na fu yu nanga den manpikin fu yu. Na a komanderi dati mi kisi.

¹⁴ A borsu nanga a baka bowtu un mus nyan tapu wan spesrutu presi. Unu, den manpikin nanga den umapikin fu unu. Dati na a pisi fu den freide-ofrandi fu den Israelitisma, san de gi yu nanga den pikin fu yu.

¹⁵ Den sa tyari a baka bowtu nanga a borsu kon, makandra nanga den fatu pisi fu a meti di o bron nanga faya leki ofrandi. Dan den sa opo en go na loktu leki wan ofrandi na MASRA fesi. Disi sa de wan sani di yu nanga den bakapikin fu yu sa tan du fu têgo, leki fa MASRA taki.”

¹⁶ Di Moses bigin suku ala presi fu a bokoboko di bo bron leki paiman fu kisi pardon fu sondu, a kon si taki den ben bron en. Ne Moses atibron tapu Eleasar nanga Itamar, den manpikin fu Aaron di ben de na libi ete. A aksi den taki:

¹⁷ “Fu sanede un no nyan a meti di bron leki ofrandi fu kisi pardon fu sondu tapu wan santa presi? Na wan tumsi santa sani. A ben gi na unu fu puru den sondu fu a folku èn fu meki den kon bun baka na MASRA fesi.

¹⁸ Ma luku, un no tyari a brudu fu en kon ini a santa presi. Un ben mus nyan en tapu wan santa presi leki fa mi ben taigi unu fu du.”

¹⁹ Ne Aaron taigi Moses taki: “Luku, tide den tyari a ofrandi fu den na MASRA fesi fu kisi pardon fu den sondu nanga a ofrandi di den ben mus bron. Yu sabi tu san miti mi. Yu denki taki a bo de wan bun sani ini MASRA ai efu mi ben nyan tide fu a ofrandi fu kisi pardon fu sondu?”

²⁰ Moses ben feni en bun di a yere a sani disi.