Leri 6 - Sranan Tongo Bible 2016

¹ Mi boi, efu yu tnapu dyaranti gi wan sma, efu yu seki anu leki wan pramisi gi wan sma di yu no sabi,

² efu yu fasi yusrefi nanga den sani di yu taki, èn yu no man broko den pramisi di yu meki,

³ dan yu mus du disi, mi boi, fu kmoto na ini, bika a trawan abi yu ini en makti. Go es'esi, saka yusrefi gi en èn begi en.

⁴ No lasi ten, no go rostu,

⁵ ma kmopo ini en anu, leki fa wan dia e kmopo ini a anu fu wan ontiman, èn wan fowru ini a anu fu a sma di wan fanga en.

⁶ Yu lesiman, go luku den mira, go luku fa den e wroko fu yu kan kon koni.

⁷ Den no abi fesiman, den no abi tiriman, noso kownu,

⁸ ma ini dreiten den e tyari nyanyan kon na wan, ini a ten fu koti nyanyan den e tyari nyanyan go poti na wan sei.

⁹ Ma yu, lesiman, olanga yu o tan didon? Oten yu o opo kmopo fu yu bedi?

¹⁰ Sribi pikinso fu yu ete, dyonko pikinso ete, didon fow yu anu fu yu tapu yu borsu.

¹¹ Dan pina o teki yu es'esi, leki fa wan abani e grabu wan sma sani teki dan a lon, mofinafasi o kon na yu tapu, leki wan fufuruman nanga fetisani ini en anu.

¹² Wan sma di e go lontu e ferteri lei, na wan sma di no bun fu noti, na wan takru sma.

¹³ A e pingipingi en ai, wrifiwrifi en futu, èn sori nanga en finga.

¹⁴ En ati furu nanga bedrigi fasi, a e sidon prakseri nomo fa a o du ogri èn a e meki sma pori nanga trawan.

¹⁵ Dat' meki, wantronso, bigi ogri e miti en, gawgaw a e de fu dede, sondro fu a kon betre baka.

¹⁶ Siksi sani de di MASRA no lobi srefsrefi, fu taki leti, seibi de leki wan trutru groskin sani gi En:

¹⁷ sma nanga heimemre, sma di e lei, sma di e meki brudu lon fu soso,

¹⁸ sma di e sidon prakseri fu du ogri, sma di gaw fu du ogri,

¹⁹ sma di e lei gi trawan fesi krutubakra, nanga sma di e tyari prati mindri famiri.

Warskow gi a uma fu wan tra man

²⁰ Mi boi, kibri den rai di yu p'pa e gi yu, no poti den sani na wan sei di yu m'ma e leri yu.

²¹ Tan memre den, weri den leki wan keti na yu neki.

²² Meki den sori yu a pasi di yu mus waka, meki den hori wakti gi yu te yu e sribi, meki den gi yu rai te yu de na ai.

²³ Bika den rai de leki wan lampu, den sani di yu leri sa de leki wan leti gi yu. Den warskow fu a fasi fa yu mus libi, sa sori yu fa yu mus libi.

²⁴ Den o kibri yu gi wan takru uma, nanga gi den switi wortu fu a uma fu wan tra man.

²⁵ No angri fu en fu di a moi so, no meki a kori yu nanga den moi ai di a e meki.

²⁶ Bika gi wan motyo yu no e pai moro leki wan brede, ma gi wan uma di abi en masra yu kan pai nanga yu libi.

²⁷ Efu yu leti faya ini yu saka, yu heri krosi o teki faya.

²⁸ Efu yu waka tapu faya krofaya, yu futu o bron.

²⁹ Na dati o psa nanga a sma di go na bedi nanga a uma fu wan tra man. Yu no kan fasi a uma sondro fu yu kisi yu strafu.

³⁰ Efu wan fufuruman fufuru wan sani fu di angri ben e kiri en, dan sma no e si dati leki wan ogri sani.

³¹ Efu den kisi en, a mus gi seibi tron so furu baka fu san a ben teki, awinsi a abi fu seri ala san a abi.

³² Ma wan man di e huru no abi ferstan, a sma di e du a sani dati e broko ensrefi saka.

³³ A o kisi fonfon nanga syen, wan syen di e tan fu têgo.

³⁴ Bika dyarusu e meki wan man kisi hebi atibron, a no abi sari-ati te a e pai a tra man baka.

³⁵ A no o teki a pai di yu mus gi en fu a ogri di yu du, a no e teki noti awinsi o bigi a sani de.