Leri 5 - Sranan Tongo Bible 2016

Warskow gi wan huru libi

¹ Mi boi, arki a koni di mi e leri yu, kaka yu yesi gi a ferstan di mi abi,

² fu yu kan teki den yoisti besroiti, èn fu yu kan piki tapu wan koni fasi.

³ Bika a mofo fu a uma fu wan tra man, sukru leki oni, den moi wortu fu en switi fu arki.

⁴ Ma na a kba den bita leki kwasibita, leki wan owru di e koti na ala tu sei.

⁵ Den futu fu en e tyari yu langalanga go na yu grebi, a pasi fu en e tyari yu go na dedekondre.

⁶ A no wani fu yu waka a pasi di e gi langa libi, a e meki yu lasi pasi sondro fu yu sabi.

⁷ Mi boi, dat' meki unu mus arki mi, èn yu no mus fergiti den sani di mi e taigi yu.

⁸ Tan fara fu sowan uma, no go ini a birti fu en oso srefi.

⁹ Noso yu o lasi a bun nen di yu abi, yu o lasi yu libi na a uma disi di no sabi san na sari-ati.

¹⁰ Sma di yu no sabi o nyan te a sari den, a moni gi san yu sweti so tranga e go na a oso fu wan sma di yu no sabi.

¹¹ Dan te a libi fu yu e kon na wan kba, te yu no de notinoti moro, yu o dyeme taki:

¹² “Fu sanede mi no ben arki te den ben e leri mi fa mi mus libi? Fu sanede mi ben e si den warskow leki noti?

¹³ Fu sanede mi no arki den wan di ben e gi mi leri, èn mi no kaka mi yesi gi a leri fu den?

¹⁴ A moro bigi ogri e miti mi now, leti na ala sma fesi.”

¹⁵ Dringi watra fu yu eigi watrabaki, peti watra fu yu eigi peti.

¹⁶ No meki a watra fu yu lon gwe soso na strati, no meki a lasi gwe tapu den pren.

¹⁷ Yu uma mus de fu yu wawan, tra sma no mus kon na en.

¹⁸ Meki a blesi de tapu yu eigi uma, meki prisiri nanga a uma di yu trow ini yu yongu yari.

¹⁹ Wan moi uma, wan uma di fiti yu ai, meki den bobi fu en drungu yu ala leisi baka fu prisiri, tan prisiri nanga a lobi di a e gi yu.

²⁰ Dan fu sanede mi boi, fu sanede yu sa meki wan yayo uma kori yu, fu sanede yu sa brasa den bobi fu wan tra uma?

²¹ MASRA e si a libi fu ala sma, A e luku ala san den e du.

²² A ogri-ati sma e fasi ini en eigi kruktudu, a e tai ensrefi nanga en eigi sondu.

²³ A e dede gwe fu di a no leri fa a mus libi a donfasi fu en e meki a lasi gwe.