Leri 4 - Sranan Tongo Bible 2016

Koni na wan bun sani

¹ Un boi, un arki te wan p'pa e leri un fa un mus libi, un kaka un yesi, fu un kisi ferstan.

² Bika na bun leri mi e gi unu, no poti en na wan sei.

³ Di mi ben de leki wan boi ete na mi p'pa, a wan enkri pikin fu mi m'ma di ben lobi mi,

⁴ mi p'pa ben e leri mi taki: “No fergiti den sani di mi e leri yu, libi nanga den rai di mi e gi yu, dan yu sa abi wan bun libi.

⁵ Meki muiti fu kon koni, meki muiti fu kisi ferstan. No fergiti den sani di mi e taigi yu, no poti den na wan sei.

⁶ No poti koni na wan sei, dan a o kibri yu, yu mus lobi en, dan a o sorgu taki ogri no miti yu.

⁷ Meki muiti fu kon koni, dati na a bigin fu koni. A moro prenspari sani fu ala san yu abi, na fu abi ferstan.

⁸ Yu mus si koni leki wan hei sani, dan a o gi yu bigi nen, brasa en hori, dan a o meki yu kisi grani.

⁹ A o de leki wan moi kroon tapu yu ede, wan brenki kroon a o de gi yu.”

¹⁰ Mi boi, arki èn leri fu den sani di mi e taigi yu, dan yu sa abi langa libi.

¹¹ Mi sori yu fa yu kan kon koni, mi sori yu a leti pasi.

¹² Dan noti no o man hori yu na baka te yu e waka, yu no sa aka yu futu te yu e lon.

¹³ Hori yusrefi na a fasi fa mi sori yu taki yu mus libi, no lusu en, no fergiti en, bika na en o gi yu langa libi.

¹⁴ No teki a eksempre fu ogri-ati sma, no du san den takru sma e du.

¹⁵ No teki a pasi fu den, tan fara fu en, beni kmoto gi en, waka psa en.

¹⁶ Bika den sma dati no man sribi, solanga den no du wan ogri, den no man tapu den ai fu rostu, solanga den no poti wan sma na ini problema.

¹⁷ Nanga kruktudu den e kon na a brede di den e nyan, Den lobi fu du sani nanga tranga, leki fa wan sopiman lobi sopi.

¹⁸ A pasi fu den sma di bun ini Gado ai e brenki leki a son, o moro a dei e opo, o moro a e brenki.

¹⁹ A pasi fu den ogri-ati sma dungru, den e stotu den futu, ma den no man si san aka den.

²⁰ Mi boi, arki den sani di mi e taigi yu, kaka yu yesi gi den sani di mi e taki,

²¹ yu no mus fergiti den, hori den ini yu prakseri.

²² Bika den e gi libi na a sma di ferstan den, den de leki dresi gi a heri skin.

²³ A moro prenspari sani na fu abi bun prakseri, bika den sani di yu e prakseri o de fu si baka ini yu libi.

²⁴ No meki lei kmopo ini yu mofo, èn no kori sma nanga san yu e taki.

²⁵ Yu mus man luku ala sma ini den ai, yu abi fu saka yu ede.

²⁶ Yu mus koni ini den sani di yu e du, dan ala sani sa waka bun.

²⁷ No beni go na let'sei, no beni go na kruktusei, sorgu nomo taki yu e tan fara fu ogridu.