Leri 3 - Sranan Tongo Bible 2016

Lespeki MASRA

¹ Mi boi, no fergiti a leri fu mi, ma kibri den rai di mi gi yu.

² Bika den o gi yu langa libi nanga furu koloku.

³ No tapu fu sori lobi èn sorgu taki yu de fu fertrow ala ten. Weri den leki wan keti na yu neki, tan memre den.

⁴ Dan Gado nanga libisma o taki bun fu yu, èn den o warderi yu.

⁵ No fertrow na tapu yu eigi ferstan, ma fertrow tapu MASRA nanga yu heri ati.

⁶ Aksi En fu A yepi yu nanga ala sani san yu wani du, dan A o sori yu san yu mus du.

⁷ No prakseri fu yusrefi taki yu koni, ma lespeki MASRA èn no du ogri.

⁸ Dati o de wan tan bun gi yu skin, a o gi a skin fu yu krakti.

⁹ Gi MASRA grani nanga yu gudu, nanga den moro bun nyanyan di yu koti ini yu pranigron.

¹⁰ Dan den maksin fu yu sa span bogobogo, èn den baki pe droifi e masi fu tron win, sa lon abra.

¹¹ Mi boi, no hari yu noso te MASRA e sori fa yu mus libi, no fuga te A e warskow yu.

¹² Bika MASRA e strafu den sma di A lobi, leki fa wan p'pa e strafu a manpikin fu en nanga san a abi prisiri.

¹³ Wan sma di du muiti te leki a kon koni, te leki a kisi ferstan, na wan blesi sma.

¹⁴ Bika koni kan du moro gi yu dan solfru, yu abi moro wini na en, dan na gowtu.

¹⁵ A abi warti moro diriston, noti san yu e angri fu abi kan tnapu na en sei.

¹⁶ Na a wan sei a kan gi yu langa libi, na a tra sei gudu nanga grani.

¹⁷ A e meki a libi fu yu go switi, a e tyari freide gi yu.

¹⁸ A e gi langa libi na a sma di hori en tranga, a sma di e brasa en hori, na wan koloku sma.

¹⁹ Nanga koni MASRA poti grontapu tnapu, nanga ferstan a fasi a heimel poti.

²⁰ Nanga a sabi fu En A meki a watra di de ondro gron broko kon na doro, èn A e meki den wolku e dropu dow kon na gron.

²¹ Mi boi, prakseri bun fosi yu du wan sani, èn fa fu teki den yoisti besroiti, noiti yu no mus fergiti den.

²² Den o gi yu wan langa libi, den o de leki wan moi keti na yu neki.

²³ Dan yu o man waka yu pasi sondro frede, èn yu no o stotu yu futu.

²⁴ Te yu o go sribi noti no o skreki yu, ma yu o didon èn yu o sribi switi.

²⁵ Yu no abi frede taki sani o meki yu skreki wantronso, leki fa a ogri e kon wantronso tapu den ogri-ati sma.

²⁶ Bika MASRA o kibri yu, A o sorgu taki noti no miti yu.

²⁷ Efu wan sma mus kisi wan sani fu yu di a mus kisi, no hori en na baka aladi yu abi a okasi fu yepi en.

²⁸ No taigi wan trawan fu a kon tamara, aladi yu man yepi en tide.

²⁹ No prakseri fu du ogri nanga wan trawan, di poti en fertrow na yu tapu.

³⁰ No krutu nanga wan sma fu soso, sondro taki a du yu ogri.

³¹ No dyarusu tapu a sma di e du ogri fu kon na en sani, no teki a eksempre fu en.

³² Bika MASRA no lobi den sma di e waka a kruktu pasi srefsrefi, ma A de wan mati fu den sma di e libi leki fa a fiti.

³³ MASRA e fluku a oso fu ogri-ati sma, ma A e blesi a oso fu sma di bun ini En ai.

³⁴ A e spotu nanga sma di e teki trawan meki spotu, ma A sori en bun-ati na den sma di trawan e si fu noti.

³⁵ Sma di koni e kisi grani, sma di don e kisi soso syen.