Leri 2 - Sranan Tongo Bible 2016

Na MASRA e gi koni

¹ Mi boi, efu yu sa leri fu den sani di mi e taigi yu, èn kibri den rai di mi e gi yu,

² efu yu kaka yu yesi gi a koni fu mi, èn meki ala muiti fu ferstan sani krin,

³ iya, efu yu sa aksi fu man ferstan sani, kari trangatranga fu kisi wan krin ferstan,

⁴ efu yu sa suku en leki solfru, noso leki fa sma e suku gudu,

⁵ dan yu o ferstan san a wani taki fu lespeki MASRA, èn yu o leri sabi suma Gado de.

⁶ Bika na Gado e gi koni. Den sani di A e taki e gi sabi nanga ferstan.

⁷ A e sorgu tak' den wan di e libi leki fa a fiti e feni yepi, èn A e kibri den wan tapu san sma no man sori finga.

⁸ A e luku taki sani e du tapu wan leti fasi, èn A e kibri den wan di e tan waka na En baka.

⁹ Dan yu o ferstan san a wani taki fu du a wani fu Gado, fu libi bun èn fu libi krin. Ala ten yu o sabi a yoisti sani tu di yu mus du.

¹⁰ Bika yu o kon koni ini denki, èn a sabi fu yu o gi yu prisiri.

¹¹ Yu o sabi fu teki den yoisti besroiti, koni o kibri yu,

¹² fu yu no go du ogri. A o kibri yu gi den man di e lei,

¹³ gi den man di gwe libi a leti pasi, fu go waka wan takru pasi now,

¹⁴ gi den man di e prisiri te den e du ogri, èn di e firi bun te den e kori sma.

¹⁵ Den e waka tapu kruktu pasi, den kmoto fu a leti pasi.

¹⁶ A o kibri yu tu gi a uma fu wan tra man, di wani kori yu nanga switi wortu.

¹⁷ A uma di gwe libi a trowmasra fu en, a masra nanga san a ben trow yonguyongu, èn di fergiti den pramisi di a ben meki fesi en Gado.

¹⁸ Efu yu e go na en oso, na yu dede yu e go teki. A pasi fu en e tyari yu go na dedekondre.

¹⁹ No wan man di go na en, e drai kon baka, den no e kmopo drape libilibi.

²⁰ Dat' meki yu mus waka a pasi fu den bun sma, èn tan libi leki den sma di bun ini Gado ai.

²¹ Bika na den sma di e libi leki fa a fiti o libi ini a kondre, na den wan tapu san sma no man sori finga o tan na ini.

²² Ma Gado o wai den ogri-ati sma puru fu a kondre, èn A o yagi den sma gwe di no tan waka na En baka.