Genesis 6 - Sranan Tongo Bible 2016

Gado e sari fu a fasi fa libisma e tyari densrefi

¹ Libisma ben e kon furu moro nanga moro na grontapu èn den ben e kisi umapikin.

² Dan den manpikin fu Gado si taki den umapikin fu den libisma ben moi, so den teki den leki uma. Den teki sortu wan den ben wani.

³ Ne MASRA taki: “A libibro fu mi no sa tan fu têgo moro na ini libisma. Den sa dede wan leisi. Den no sa kon moro owru leki wan hondro nanga tutenti yari.”

⁴ A pisten dati langa tranga man ben de na grontapu èn srefi baka a ten dati den ben de ete. Dati ben de den pikin di den manpikin fu Gado ben kisi nanga den umapikin fu den libisma. Den ben de tranga man nanga bigi nen ini a ten di de na wi baka.

A tori fu Noa

⁵ Dan MASRA si taki a ogri fu libisma na grontapu ben furu. Ala sani san den ben e prakseri ben de soso ogri.

⁶ Fu dat'ede MASRA ben sari taki a meki libisma poti na grontapu. A ben hati en fu tru.

⁷ Ne MASRA taki: “Mi sa figi libisma puru fu grontapu. No den libisma wawan, ma den meti di den e kweki tu, den meti di e kroipi na gron nanga den fowru di e frei na loktu. Bika Mi e sari taki Mi meki den.”

⁸ Ma MASRA ben abi prisiri nanga Noa.

⁹ Disi na a tori fu Noa nanga den bakapikin fu en. Noa ben de wan man di ben bun ini Gado ai na mindri den sma fu en ten. Fowtu no ben de fu feni na en, èn a ben e libi bun nanga Gado.

¹⁰ Noa ben abi dri manpikin: Sem, Ham nanga Yafet.

¹¹ Gado ben si fa grontapu ben kon pori. A ben furu nanga kruktudu.

¹² Dan Gado luku grontapu. Èn fu tru a ben pori srefsrefi. No wan libisma ben e libi leki fa a ben musu libi.

¹³ Ne Gado taigi Noa taki: “Mi teki a besroiti fu tyari wan kba kon na ala sani di e libi. Bika na fu den ede grontapu kon lai nanga kruktudu. Fu dat'ede mi o figi den nanga grontapu puru na pasi.

¹⁴ Meki wan boto gi yusrefi fu gofer-udu nanga difrenti pikinpikin kamra na ini. Dan yu mus tara en fu inisei nanga fu dorosei.

¹⁵ Disi na a fasi fa yu mus meki en. A mus langa sowan wan hondro nanga feifitenti meter, a mus bradi tutenti-na-feifi meter èn a mus hei sowan tin-na-feifi meter.

¹⁶ Yu mus meki wan daki fu wan afu meter go na loktu. Na a seibere fu a boto yu mus meki wan doro. Èn a boto mus abi tu pisi go na loktu.

¹⁷ Arki, Mi o meki wan frudu kon abra grontapu fu kiri ala sani di e libi, ala sani di abi wan libibro. Ala sani di de na grontapu o dede.

¹⁸ Ma Mi sa meki wan ferbontu nanga yu. Yu sa go ini a boto. Yu nanga yu wefi, den manpikin fu yu nanga den wefi fu den.

¹⁹ Fu ala meti di e libi yu mus tyari tu fu den go ini a boto, fu den kan tan na libi nanga yu. A mus de wan manwan nanga wan umawan.

²⁰ Fu den difrenti sortu fowru, den difrenti meti di yu kan kweki nanga den difrenti meti di e kroipi na gron, tu fu den sa kon na yu fu tan na libi.

²¹ Yu mus teki ala sortu nyansani tu, fu yu nanga den kan abi nofo nyanyan.”

²² Dan Noa du ala sani leki fa Gado ben taigi en fu du.