Genesis 5 - Sranan Tongo Bible 2016

Den bakapikin fu den fosi libisma

¹ Disi na den bakapikin fu Adam. A dei di Gado meki libisma, A meki den fu den gersi en.

² A meki den leki man nanga uma. Dan Gado blesi den èn a kari den: libisma.

³ Di Adam ben de wan hondro nanga dritenti yari na grontapu, a tron p'pa fu wan manpikin di ben gersi en. A ben de neleki en. Dan Adam kari en Set.

⁴ Adam libi ete aiti hondro yari baka di a tron p'pa fu Set, èn a kisi moro manpikin nanga umapikin.

⁵ Ala nanga ala Adam libi neigi hondro nanga dritenti yari, dan a dede.

⁶ Di Set ben abi wan hondro nanga feifi yari, a tron p'pa fu wan manpikin di a kari Enos.

⁷ Set libi ete aiti hondro nanga seibi yari baka di a tron p'pa fu Enos èn a kisi moro manpikin nanga umapikin.

⁸ Ala nanga ala Set libi neigi hondro nanga twarfu yari, dan a dede.

⁹ Di Enos ben abi neigitenti yari, a tron p'pa fu Kenan.

¹⁰ Enos libi ete aiti hondro nanga tin-na-feifi yari baka di a tron p'pa fu Kenan èn a kisi moro manpikin nanga umapikin.

¹¹ Ala nanga ala Enos libi neigi hondro nanga feifi yari, dan a dede.

¹² Di Kenan ben abi seibitenti yari, a tron p'pa fu Mahalalel.

¹³ Kenan libi ete aiti hondro nanga fotenti yari baka di a tron p'pa fu Mahalalel èn a kisi moro manpikin nanga umapikin.

¹⁴ Ala nanga ala Kenan libi neigi hondro nanga tin yari, dan a dede.

¹⁵ Di Mahalalel ben abi siksitenti-na-feifi yari, a tron p'pa fu Yered.

¹⁶ Mahalalel libi ete aiti hondro nanga dritenti yari baka di a tron p'pa fu Yered èn a kisi moro manpikin nanga umapikin.

¹⁷ Ala nanga ala Mahalalel libi aiti hondro neigitenti-na-feifi yari, dan a dede.

¹⁸ Di Yered ben abi wan hondro siksitenti-na-tu yari, a tron p'pa fu Henok.

¹⁹ Yered libi ete aiti hondro yari baka di a tron p'pa fu Henok èn a kisi moro manpikin nanga umapikin.

²⁰ Ala nanga ala Yered libi neigi hondro siksitenti-na-tu yari, dan a dede.

²¹ Di Henok ben abi siksitenti-na-feifi yari, a tron p'pa fu Metuselak.

²² Henok ben e libi bun nanga Gado. A libi ete dri hondro yari baka di a kisi Metusalek èn a kisi moro manpikin nanga umapikin.

²³ Ala nanga ala Henok libi dri hondro siksitenti-na-feifi yari.

²⁴ A ben e libi bun nanga Gado, ma wan dei a no ben de fu si moro bika Gado ben teki en tyari gwe.

²⁵ Di Metuselak ben abi wan hondro aititenti-na-seibi yari, a tron p'pa fu Lamek.

²⁶ Metuselak libi ete seibi hondro aititenti-na-tu yari, baka di a tron p'pa fu Lamek èn a kisi moro manpikin nanga umapikin.

²⁷ Ala nanga ala, Metuselak libi neigi hondro siksitenti-na-neigi yari dan a dede.

²⁸ Di Lamek ben abi wan hondro aititenti-na-tu yari, a tron p'pa fu wan manpikin,

²⁹ di a gi a nen fu Noa. A taki: “A disi sa trowstu wi fu a hebi wroko di unu e du tapu a gron disi, di MASRA fluku.”

³⁰ Lamek libi ete feifi hondro neigitenti-na-feifi yari, baka di a tron p'pa fu Noa èn a kisi moro manpikin nanga umapikin.

³¹ Ala nanga ala Lamek libi seibi hondro seibitenti-na-seibi yari, dan a dede.

³² Di Noa ben abi feifi hondro yari, a ben de p'pa fu Sem, Ham nanga Yafet.