Genesis 46 - Sranan Tongo Bible 2016

Yakob e go na Egipte

¹ Dan so Israel hari go na Egipte nanga ala sani di a ben abi. Di a doro na Berseba a bron meti leki ofrandi gi a Gado fu en p'pa Isak.

² Dan Gado meki Israel si wan sani neti. A si fa Gado e taigi en taki: “Yakob, Yakob.” A piki: “Mi de dyaso.”

³ Ne Gado taigi en taki: “Mi na Gado. A Gado fu yu p'pa. Yu no abi fu frede fu hari go na Egipte. Bika drape mi sa meki den bakapikin fu yu tron wan bigi folku.

⁴ Misrefi sa go nanga yu na Egipte. Mi sa tyari yu kon baka tu èn Yosef sa tapu yu ai gi yu te yu dede.”

⁵ Dan Yakob gwe libi Berseba. Den manpikin fu Israel ben tyari den p'pa, den pikin nanga den frow fu den gwe tapu den wagi di Farao ben seni kon fu kon teki den.

⁶ Den tyari den meti fu den gwe tu nanga ala sani di den ben abi ini a kondre Kanaan. So Yakob nanga den pikin fu en ben doro na Egipte.

⁷ A ben tyari den manpikin, den umapikin nanga den granpikin fu en, manwan nanga umawan, go nanga en na Egipte.

⁸ Disi na den nen fu den manpikin fu Israel di ben go na Egipte. Ruben, a fosi manpikin fu Yakob.

⁹ Den manpikin fu Ruben ben de: Hanok, Palu, Hesron nanga Karmi.

¹⁰ Den manpikin fu Simeon ben de: Yemuel, Yamin, Ohad, Yakin, Sokar nanga Saul. A m'ma fu Saul ben de wan uma fu Kanaan.

¹¹ Den manpikin fu Lefi ben de: Gerson, Kehat nanga Merari.

¹² Den manpikin fu Yuda ben de: Er, Onan, Sela, Peres nanga Serak. Er nanga Onan ben dede ini Kanaan. Den manpikin fu Peres ben de Hesron nanga Hamul.

¹³ Den manpikin fu Isakar ben de Tola, Puwa, Yob nanga Simron.

¹⁴ Den manpikin fu Sebulon ben de Sered, Elon nanga Yakleel.

¹⁵ Disi ben de den manpikin di Lea ben kisi gi Yakob ini Padan-Aram. Boiti den manpikin a ben kisi wan umapikin gi en tu di ben nen Dina. Ala den pikin nanga bakapikin ben de makandra dritenti-na-dri sma.

¹⁶ Den manpikin fu Gad ben de Sifyon, Hagi, Suni, Esbon, Eri, Arodi nanga Areli.

¹⁷ Den manpikin fu Aser ben de Yimna, Yiswa, Yiswi nanga Beria. Den ben abi wan sisa tu di ben nen Serak. Den manpikin fu Beria ben de Heber nanga Malkiyel.

¹⁸ Disi ben de den manpikin di Silpa ben kisi gi Yakob. Silpa ben de a umasrafu di Laban ben gi en umapikin Lea. Den manpikin nanga den bakapikin fu Silpa ben de tin-na-siksi.

¹⁹ Den manpikin fu Rachel, a frow fu Yakob, ben de Yosef nanga Benyamin.

²⁰ Na ini Egipte Asnat, a umapikin fu Potifera, a priester fu On, ben kisi Manase nanga Efraim gi Yosef.

²¹ Den manpikin fu Benyamin ben de Bela, Beker, Asbel, Gera, Naaman, Eki, Ros, Mupim, Hupim nanga Ard.

²² Disi ben de den manpikin fu Rachel di a ben kisi gi Yakob. Den manpikin nanga den bakapikin fu Rachel ben de tin-na-fo.

²³ A manpikin fu Dan ben de Husim.

²⁴ Den manpikin fu Naftali ben de Yakseel, Guni, Yeser nanga Silem.

²⁵ Disi ben de den manpikin fu Bilha. Bilha ben de a umasrafu di Laban ben gi en umapikin Rachel. Den manpikin nanga den bakapikin fu Bilha ben de seibi.

²⁶ Ala den sma di ben go nanga Yakob na Egipte ben de siksitenti-na-siksi sma. Den frow fu den manpikin no ben teri.

²⁷ Ini Egipte Yosef ben kisi tu boi. So ala sma fu a oso fu Yakob di ben go na Egipte ben de seibitenti sma.

²⁸ Dan Yakob seni Yuda go na fesi na Yosef, fu Yosef miti en na Gosen. Di Yakob doro nanga en famiri ini a kontren fu Gosen,

²⁹ Yosef seti en wagi dan a hari go na Gosen fu go miti en p'pa Israel. Di den miti, a brasa en dan a anga wan heri pisten na en neki e krei.

³⁰ Ne Israel taigi Yosef taki: “Now mi kan dede. Bika mi si yu ai na ai, mi si taki yu e libi.”

³¹ Dan Yosef taigi den brada fu en nanga ala den famiri taki: “Mi sa go taigi Farao taki: ‘Den brada nanga den famiri fu mi di ben de na Kanaan kon na mi.

³² Den na skapuman, sma di e kweki meti. Den tyari den skapu, krabita, kaw nanga ala sani di den abi kon.’

³³ Dat' meki te Farao seni kari unu dan a aksi unu sortu wroko un e du,

³⁴ un mus piki en taki: ‘Den knekti fu yu na sma di e kweki meti sensi den e gro kon. Den afo fu unu ben e du a srefi wroko.’ Dan a o meki un libi ini a kontren fu Gosen. Bika den sma fu Egipte no lobi sma di e kweki skapu srefsrefi.”