Genesis 44 - Sranan Tongo Bible 2016

¹ Dan Yosef taigi a edeman fu den knekti fu en taki: “Yu mus furu den saka fu den man nanga graan. Someni leki den man tyari. Poti a moni fu ibriwan na tapusei ini en saka.

² Yu mus teki a solfru kan fu mi, dan yu e poti en na tapusei ini a saka fu a moro yonguwan, makandra nanga a moni fu a graan.” A edeman du leki fa Yosef ben taigi en fu du.

³ Di dei broko, den meki den man gwe nanga den buriki.

⁴ Ma den no ben de fara fu a foto ete di Yosef taigi a edeman fu den knekti taki: “Meki yusrefi klari fu hari go na baka den man. Te yu miti den yu mus taigi den taki: ‘Fu sanede un pai bun nanga ogri? Fu sanede un fufuru a solfru kan?

⁵ Na a kan ini san mi basi e dringi. Na ini a kan disi a e luku san de fu kon. A sani san un du no bun srefsrefi.’ ”

⁶ Di a edeman miti nanga den a aksi den ala den sani disi.

⁷ Den piki en taki: “Masra, fu sanede yu e taki so? Noiti den knekti fu yu ben o du so wan sani.

⁸ Luku, a moni di wi ben feni na tap'sei ini wi saka, un tyari kon baka gi yu fu Kanaan. Dan fu sanede un ben o fufuru gowtu noso solfru ini yu basi oso?

⁹ Efu yu feni a kan na wan fu den knekti fu yu, a sma dati sa dede èn wi sa tron srafu fu yu.”

¹⁰ A edeman piki den taki: “A bun. A sa de leki fa unu taki. A sma pe un feni a kan sa tron mi srafu, ma den trawan sa fri fo go.”

¹¹ Es'esi den alamala puru den saka fu den poti na gron, dan ibriwan fu den opo en saka.

¹² A edeman bigin suku. A bigin na a moro owruwan, dan a tapu na a moro yonguwan. Dan den feni a kan na ini Benyamin saka.

¹³ Ne den priti den krosi. Ibriwan fu den poti en saka baka na tapu en buriki, dan den drai go baka na a foto.

¹⁴ Di Yuda nanga den brada fu en doro baka na a oso fu Yosef, Yosef ben drape ete. Dan den fringi densrefi nanga fesi na gron.

¹⁵ Ne Yosef taigi den taki: “San na a sani di un du? Un no sabi taki wan man leki mi ben o sabi dati?”

¹⁶ Yuda piki taki: “Masra, wi no abi noti fu taki. Wi no man tyari noti kon na fesi fu kisi leti. Na Gado tyari den ogridu fu den knekti fu yu kon na krin. Masra, wi nanga a sma pe den feni a kan, sa de srafu fu yu.”

¹⁷ Ma Yosef piki taki: “Fa mi ben o man du dati? Soso a man pe den feni a kan sa de mi srafu. Un kan gwe sondro problema na un p'pa.”

¹⁸ Dan Yuda waka kon moro krosbei. A taki: “Masra, no mandi na mi tapu, ma arki a wan enkri sani disi di yu knekti wan taki. No kisi atibron gi yu knekti, bika mi sabi taki yu abi makti leki Farao srefi.

¹⁹ Masra, yu ben aksi unu taki: ‘Un abi wan p'pa noso wan brada ete?’

²⁰ Wi ben piki taki: ‘Masra, wi abi wan owru p'pa nanga wan yongu brada ete di a kisi di a ben kon owru kba. En brada dede kba. En na a wan enkri pikin fu en m'ma di tan abra èn a p'pa lobi en tranga.’

²¹ Baka dati yu taigi den knekti fu yu taki: ‘Tyari en kon, meki mi si en nanga mi eigi ai.’

²² Wi piki baka taki: ‘A boi no o man gwe libi en p'pa. Bika efu a gwe libi en p'pa, a p'pa o dede.’

²³ Ne yu taigi den knekti fu yu taki: ‘Efu a moro yongu brada fu unu no kon nanga unu, mi no sa meki un kon na mi.’

²⁴ Baka dati wi drai go na yu knekti, wi p'pa, dan wi taigi en san yu, Masra, ben taigi wi.

²⁵ Di wi p'pa taigi wi fu go bai pikinso nyanyan baka,

²⁶ wi piki taki: ‘Wi no o man go. Soso efu yu meki a moro yongu brada fu unu go nanga wi, wi o hari go. Bika wi no o man go na a man, efu a moro yongu brada fu wi no de nanga wi.’

²⁷ Ne yu knekti, wi p'pa, taigi wi taki: ‘Un sabi taki na tu boi mi frow ben meki gi mi.

²⁸ Wan no de moro. Mi denki taki wan krasi meti priti en. Noiti moro mi si en baka.

²⁹ Efu un teki a disi tyari gwe fu mi, dan wan sani miti en na pasi, un o meki sari tyari a owru man disi go na en grebi.’

³⁰ Efu mi drai go now sondro a boi di yu knekti, mi p'pa, lobi so tranga,

³¹ dan na dede a o dede te a no si a boi. Dan den knekti fu yu o meki sari tyari yu owru knekti, wi p'pa, go na en grebi.

³² Mi ben teki a frantwortu fu a boi na mi tapu tu di mi taigi mi p'pa taki: ‘Efu mi no tyari en kon baka gi yu, dan a sa de so taki mi abi wan têgo paiman na yu.’

³³ Dat' meki mi e begi yu masra, meki yu knekti tan na baka leki srafu, na a presi fu a boi. Meki a boi drai go baka nanga den brada fu en.

³⁴ Bika mi no sabi fa mi mus drai go baka na mi p'pa efu a boi no de nanga mi. Mi no o man si a sari di mi p'pa o sari.”