Genesis 4 - Sranan Tongo Bible 2016

Kain nanga Abel

¹ Dan a man sribi nanga en uma. A uma hori bere èn a kisi Kain. A taki: “Na MASRA yepi mi fu mi kisi wan manpikin.”

² Baka dati a kisi ete wan manpikin di a kari Abel. Abel ben e kweki skapu. Kain ben e prani gron.

³ Baka wan pisten Kain tyari wan ofrandi gi MASRA fu den sani san a ben prani.

⁴ Abel ben tyari wan ofrandi tu. A srakti den fosi pikin di den skapu ben meki, dan a gi den moro bun pisi meti fu den leki ofrandi. MASRA ben abi prisiri nanga a ofrandi fu Abel,

⁵ ma A no ben abi prisiri nanga a ofrandi fu Kain. Ne Kain atibron taki en fesi kenki.

⁶ Ne MASRA aksi Kain taki: “Fu sanede yu ati e bron èn fu sanede yu langa yu fesi so?

⁷ Efu yu e du bun, yu kan opo yu ede. Ma efu yu no e du bun, a sondu e didon luru yu na mofodoro. A e angri fu de yu basi, ma na yu mus basi en.”

⁸ Dan Kain taigi en brada Abel: “Kon meki wi go na gron.” Di den ben de ini a gron, Kain kiri en brada Abel.

⁹ Ne MASRA aksi Kain taki: “Pe yu brada Abel de?” Kain piki taki: “Mi no sabi. Na mi mus hori ai na tapu mi brada?”

¹⁰ Ne MASRA aksi en taki: “San yu du? Arki, a brudu fu yu brada e bari kari Mi fu a gron.

¹¹ Fu dat'ede Mi e fluku yu. Mi e yagi yu kmoto fu a gron di swari a brudu fu yu brada di yu kiri.

¹² Te yu o wroko a gron a no sa gi yu noti moro. Yu o waka lontu na grontapu leki wan man di no abi tanpe. Yu o gersi wan loweman.”

¹³ Ne Kain piki MASRA taki: “A strafu hebi moro leki san mi man tyari.

¹⁴ Tye, Yu e yagi mi gwe tide fu a gron èn Yu no sa luku mi moro. Mi sa waka lontu na grontapu leki wan man di no abi tanpe. Mi o gersi wan loweman. Ala sma di miti mi o wan kiri mi.”

¹⁵ Ma MASRA taigi en taki: “Kwet'kweti. A sma di kiri Kain, sa butu seibi tron.” Dan MASRA poti wan marki gi Kain, taki no wan sma di miti en ben o kiri en.

¹⁶ So Kain prati nanga MASRA. A go libi ini a kondre Nod, di ben de na oostsei fu Eden.

¹⁷ Dan Kain sribi nanga en uma. A uma hori bere, dan a kisi Henok. A pisten dati Kain ben e bow wan foto, dan a gi a foto a nen fu en manpikin Henok.

¹⁸ Henok ben de a p'pa fu Irad, èn Irad ben de a p'pa fu Mekuyael. Mekuyael ben de a p'pa fu Metusael èn Metusael ben de a p'pa fu Lamek.

¹⁹ Lamek ben teki tu uma. A wan ben nen Ada, a trawan ben nen Sila.

²⁰ Ada kisi Yabal. Yabal ben de a fosi sma di go libi na ini tenti èn di ben e kweki meti.

²¹ En brada ben nen Yubal. Yubal ben de a fosi sma di prei gitara èn di ben e bro froiti.

²² Sila kisi wan manpikin tu di a kari Tubal-Kain. A ben e du a wroko fu wan smeti. En ben de a fosi sma di ben e wroko kopro nanga isri. En sisa ben nen Naama.

²³ Lamek ben taigi den uma fu en taki: “Ada nanga Sila, un arki mi! Uma fu mi, un poti yesi arki bun san mi o taigi unu. Mi o kiri a man di gi mi mankeri, srefi efu wan boi fasi mi.

²⁴ Bika a sma di du Kain wan sani o butu seibi tron, ma a sma di du Lamek wan sani o butu seibitenti-na-seibi tron.”

²⁵ Adam ben didon baka nanga en uma. Dan a uma kisi wan manpikin di a kari Set. A taki: “Gado gi mi wan tra manpikin na a presi fu Abel, di Kain kiri.”

²⁶ Set srefi kisi wan manpikin. A kari en Enos. A ten dati den sma bigin kari a nen fu MASRA te den ben e anbegi.