Genesis 3 - Sranan Tongo Bible 2016

¹ Fu ala den meti di MASRA Gado ben meki, a sneki ben de a wan di ben lai triki moro ala trawan. A sneki taigi a uma taki: “A mus de so taki Gado taigi unu taki un no mus nyan fu no wan fu den bon ini a dyari.”

² A uma piki a sneki taki: “Wi kan nyan den froktu fu ala bon ini a dyari.

³ Ma Gado taigi wi taki wi no mus nyan den froktu fu a bon di tnapu na mindri fu a dyari. A ben taki: ‘Un no mus nyan den èn un no mus fasi den, noso un o dede.’ ”

⁴ A sneki taigi a uma taki: “Yu no sa dede kwet'kweti.

⁵ Ma Gado sabi taki a dei di yu nyan fu en yu ai o opo. Yu o kon de leki Gado srefi. Yu o sabi san na bun èn san na ogri.”

⁶ Dan a uma si taki den froktu fu a bon ben bun fu nyan èn taki den ben moi fu si. Den ben e gi yu lostu fu yu nyan den, fu yu ben kan kon sabi sani. So a uma teki fu den froktu fu a bon dan a nyan. A gi en man, di ben de drape nanga en, dan a dati nyan tu.

⁷ Ne den ai opo èn den kon si taki den ben de nanga sososkin. So den frekti wiwiri fu a figabon kon na wan fu tapu den syenpresi.

⁸ Ma mofoneti di a netiwinti bigin wai, den yere fa MASRA Gado e waka ini a dyari. Dan a man nanga en uma gwe go kibri gi MASRA Gado mindri den bon fu a dyari.

⁹ Ne MASRA Gado kari a man. A taki: “Pe yu de?”

¹⁰ A man piki taki: “Di mi yere fa yu e waka ini a dyari, mi ben frede fu di mi de nanga sososkin. Dat' meki mi go kibri.”

¹¹ Dan Gado aksi en taki: “Suma taigi yu taki yu de nanga sososkin? Na nyan yu nyan froktu fu a bon fu san mi ben warskow yu taki yu no mus nyan fu en?”

¹² Ne a man piki baka taki: “Na a uma di yu gi mi meki mi nyan fu den froktu.”

¹³ Dan MASRA Gado aksi a uma taki: “Fu sanede yu du dati?” A uma piki taki: “Na a sneki kori mi meki mi nyan.”

¹⁴ Ne MASRA Gado taigi a sneki taki: “Fu di yu du dati, Mi e fluku yu na mindri fu ala den meti di sma man kweki, nanga na mindri fu ala den krasi meti. Tapu yu bere yu sa kroipi èn yu sa nyan doti, solanga yu e libi.

¹⁵ Mi sa meki taki yu nanga a uma tron feyanti. Disi sa de so tu nanga den bakapikin fu yu nanga di fu a uma. Den sa masi yu ede, èn yu sa beti den baka-iri.”

¹⁶ Dan Masra Gado taigi a uma taki: “Mi sa meki a ten te yu de nanga bere wan tranga ten gi yu. Nanga hebi skin-ati yu sa meki pikin. Yu sa tan angri fu de nanga yu masra, èn a sa basi yu.”

¹⁷ Masra Gado taigi a man taki: “Yu arki yu uma èn yu nyan fu a bon fu san mi ben warskow yu taki yu no mus nyan fu en. Dat' meki mi e fluku a gron fu yu ede. Yu heri libi langa yu sa wroko tranga, fu a gron kan gi nyanyan.

¹⁸ Makagrasi nanga krasiwiwiri a sa gi èn yu sa nyan san a gron e gi.

¹⁹ Yu o abi fu sweti fu kan kon na yu deibrede, te leki yu dede èn go ini a gron baka, bika na doti fu a gron Mi ben teki meki yu. Fu kleidoti yu ben meki èn kleidoti yu sa tron baka.”

²⁰ A man kari en uma Eva, fu di na en na mama fu ala libisma.

²¹ Dan MASRA Gado meki krosi fu meti buba gi a man nanga en uma dan A weri en gi den.

²² Dan MASRA Gado taki: “Luku, libisma kon de leki wi now. A kon sabi san na bun nanga ogri. No meki a langa en anu now tu fu teki froktu nyan fu a bon di e gi libi fu têgo. Noso a o libi fu têgo.”

²³ Ne MASRA Gado seni en gwe fu a dyari fu Eden fu go wroko a gron, bika nanga doti fu a gron a ben meki.

²⁴ A yagi den gwe dan A poti den kerub na a oostsei fu a dyari fu Eden. Den kerub ben tnapu drape nanga wan deigri na den mindri, di ben e koti faya èn di ben e go fu a wan sei na a tra sei, fu tapu a pasi di e go na a bon di e gi a libi fu têgo.