Genesis 15 - Sranan Tongo Bible 2016

MASRA e gi Abram wan pramisi

¹ Baka dati MASRA meki Abram si wan sani. A si fa MASRA e taigi en taki: “No frede Abram. Mi sa sorgu taki noti no miti yu èn Mi sa gi yu wan bigi paiman.”

² Dan Abram taki: “Tye, Masra MASRA, sortu bun yu sa gi mi so dan? Mi o dede gwe sondro wan pikin èn a sma di o kisi ala den gudu fu mi o de Eliyeser fu Damaskus.”

³ Abram taigi MASRA moro fara taki: “Luku, Yu no gi mi no wan pikin, dan now wan knekti fu mi o kisi ala mi gudu.”

⁴ Ma MASRA taigi en taki: “A no en sa kisi ala den gudu fu yu, ma yu eigi manpikin sa kisi den.”

⁵ Ne MASRA tyari en go na dorosei. A taigi en taki: “Opo yu ede luku heimel, dan yu luku efu yu man teri den stari. Dan MASRA taigi en taki: Na so furu den bakapikin fu yu sa de tu.”

⁶ Abram bribi sa MASRA taigi en, èn MASRA si en leki wan sma di bun ini en ai.

⁷ Dan MASRA taigi en taki: “Mi na MASRA di tyari yu kmoto fu Ur fu den Kaldeasma, fu gi yu a kondre disi.”

⁸ Ma Abram aksi taki: “Masra, MASRA, fa mi o du sabi taki a sa de fu mi?”

⁹ Ne MASRA taigi en taki: “Tyari wan yongu kaw fu dri yari kon gi mi, sosrefi wan krabita fu dri yari, wan man skapu fu dri yari, wan stondoifi nanga wan yongu doifi kon.”

¹⁰ So Abram go teki den kon gi MASRA. A prati den meti langalanga na mindri dan a poti den pisi abra nanga abra. Den fowru a no prati.

¹¹ Di den tingifowru kon fu saka sidon tapu den dede meti, Abram yagi den gwe.

¹² Di son bigin saka Abram fadon ini wan dipi sribi. Ne wantronso wan bigi frede nanga wan dipi dungru kon na en tapu.

¹³ Dan MASRA taigi Abram taki: “Disi na san yu mus sabi bun. Den bakapikin fu yu o de leki doroseisma na ini wan kondre di no de den eigi kondre. Den o de leki srafu drape èn den sma o pina den fo hondro yari langa.

¹⁴ Ma Mi sa strafu a folku tu di teki den leki srafu. Baka dati den o gwe libi a kondre nanga furu gudu.

¹⁵ Ma yu o dede ini freide. Yu o doro wan moi libimarki fosi den tyari yu go na yu grebi.

¹⁶ Den afopikin fu yu sa drai kon dyaso baka. Bika dan fosi den Amoritisma sa du someni ogri taki Mi mus yagi den puru fu a kondre.”

¹⁷ Di son saka èn wan dipi dungru fadon, wantronso wan korpatu nanga wan frambo ben de fu si di ben e psa na mindri den pisi meti.

¹⁸ Tapu a fasi dati MASRA sroto wan ferbontu nanga Abram. A taigi en taki: “Mi sa gi den bakapikin fu yu a kondre disi, kmoto fu a liba fu Egipte go te na a bigi Eufratliba.

¹⁹ A kondre fu den Kenitisma, den Kenisitisma, den Kadmonitisma,

²⁰ den Hetitisma, den Perisitisma, den Refaitisma

²¹ den Amonitisma, den Kananitisma, den Girgasitisma nanga den Yebusitisma.”