Genesis 12 - Sranan Tongo Bible 2016

Abram

¹ Dan MASRA taigi Abram taki: “Libi yu kondre, libi yu famiri nanga den ososma fu yu. Go na a kondre di Mi o sori yu.

² Den bakapikin fu yu sa tron wan bigi folku. Mi sa blesi yu. Mi sa gi yu bigi nen, èn yu sa de wan blesi gi trawan.

³ Mi sa blesi den sma di o blesi yu èn Mi sa fluku den sma di o fluku yu. Ala folku na grontapu sa winsi fu Mi blesi den leki fa Mi blesi yu.”

⁴ Dan Abram go leki fa MASRA ben taigi en. A ben abi seibitenti-na-feifi yari di a kmoto fu Haran èn a teki Lot fu go nanga en.

⁵ Abram ben teki en frow Sarai, en bradapikin Lot, nanga ala den srafu fu en nanga en. A teki ala gudu tu di a ben abi ini Haran. Na so den doro ini Kanaan.

⁶ Dan Abram waka ini a kondre te leki a doro na a bigi bon More ini a birti fu a foto Sikem. A ten dati den Kananitisma ben e libi ini a kondre.

⁷ Drape MASRA sori ensrefi na Abram. A taigi en taki: “Mi o gi den bakapikin fu yu a kondre disi.” Ne Abram bow wan altari drape gi MASRA, di ben sori ensrefi na en.

⁸ Dan Abram kmoto fu drape. A hari go na a bergi di ben de na oostsei fu Betel dan a meki en kampu drape. Betel ben de na westsei fu a kampu èn Ai ben de na oostsei. Abram bow wan altari drape tu gi MASRA, dan a anbegi MASRA.

⁹ Baka dati Abram hari go moro fara na a Negebsabana.

Abram e go na Egipte

¹⁰ Dan wan angriten broko ini Kanaan. So Abram hari go na Egipte. A tan wan pisten drape leki wan doroseisma, fu di wan hebi angriten ben de ini a kondre.

¹¹ Ma pikinso fosi den ben doro Egipte, Abram taigi en frow Sarai taki: “Arki, mi sabi taki yu na wan trutru moi frow.

¹² Te den man fu Egipte si yu, den o taki: ‘Na en abi a frow.’ Dan den o kiri mi, ma yu den o meki tan na libi.

¹³ Dat' meki yu mus taigi den taki yu na mi sisa. Dan fu yu ede sani sa go bun nanga mi èn den sa meki mi tan na libi.”

¹⁴ Di Abram doro na ini Egipte, den man fu Egipte si taki en frow ben moi fu tru.

¹⁵ Den kapten fu Farao srefi taigi Farao o moi a frow ben de. Dan den seni teki en tyari go na a oso fu Farao.

¹⁶ Farao ben e sorgu bun gi Abram. Fu Sarai ede Abram ben kisi skapu, kaw, buriki, man nanga umasrafu, uma buriki nanga kameel.

¹⁷ Ma MASRA strafu Farao nanga ala sma di ben de ini en oso nanga hebi siki. A du disi fu Sarai ede, a frow fu Abram.

¹⁸ Ne Farao seni kari Abram dan a aksi en taki: “San yu du nanga mi? Fu sanede yu no taigi mi taki na yu frow?

¹⁹ Fu sanede yu taigi mi taki na yu sisa. Na fu di yu taki dati mi teki en leki mi frow. Luku yu frow dyaso, teki en dan yu kmoto na mi tapu.”

²⁰ Dan Farao komanderi wantu man fu sorgu taki Abram, en frow nanga ala sani san ben abi, kmoto ini a kondre.