Genesis 11 - Sranan Tongo Bible 2016

Fa difrenti tongo bigin taki na grontapu

¹ Heri grontapu ben e taki a srefi tongo.

² Ma di den sma ben hari go na a oostsei, den doro na wan opo sabana ini a kondre Sinear, dan den tan libi drape.

³ Dan den taigi makandra taki: “Yu sabi san, wi kan meki ston fu kleidoti. Wi o baka den bun dan wi o fasi den kon na wan nanga tara.”

⁴ Den taki tu taki: “Yu sabi san, kon meki wi bow wan foto nanga wan toren di e suku fu miti heimel. Dati sa gi wi bigi nen èn a sa meki taki wi no libi panyapanya abra heri grontapu.”

⁵ Dan MASRA saka kon fu luku a foto nanga a toren di den sma ben e bow.

⁶ Ne MASRA taki: “Luku, na wán folku èn den e taki wán tongo. Disi na a bigin wawan fu den sani di den o man du. Ala sani san den o wani fu du now, den o man du.

⁷ Yu sabi san, meki Wi saka go bruya a tongo fu den fu den no ferstan makandra.”

⁸ Na so MASRA meki den panya fu drape go abra heri grontapu èn den ben abi fu tapu a bow fu a foto.

⁹ Dat' meki den e kari a foto Babel. Bika na drape MASRA bruya a tongo fu ala sma na grontapu, èn na fu drape MASRA panya den abra heri grontapu.

Den bakapikin fu Sem

¹⁰ Disi na den bakapikin fu Sem. Di Sem ben abi wan hondro yari, a tron p'pa fu Arpaksad. Disi ben de tu yari baka a bigi frudu.

¹¹ Sem libi ete feifi hondro yari baka di a tron p'pa fu Arpaksad èn a kisi moro manpikin nanga umapikin.

¹² Di Arpaksad ben abi dritenti-na-feifi yari a tron p'pa fu Sela.

¹³ Arpaksad libi ete fo hondro nanga dri yari baka di a tron p'pa fu Sela èn a kisi moro manpikin nanga umapikin.

¹⁴ Di Sela ben abi dritenti yari a tron p'pa fu Eber.

¹⁵ Sela libi ete fo hondro nanga dri yari baka di a tron p'pa fu Eber èn a kisi moro manpikin nanga umapikin.

¹⁶ Di Eber ben abi dritenti-na-fo yari a tron p'pa fu Peleg.

¹⁷ Eber libi ete fo hondro nanga dritenti yari baka di a tron p'pa fu Peleg èn a kisi moro manpikin nanga umapikin.

¹⁸ Di Peleg ben abi dritenti yari a tron p'pa fu Rehu.

¹⁹ Peleg libi ete tu hondro nanga neigi yari baka di a tron p'pa fu Rehu èn a kisi moro manpikin nanga umapikin.

²⁰ Di Rehu ben abi dritenti-na-tu yari a tron p'pa fu Serug.

²¹ Rehu libi ete tu hondro nanga seibi yari baka di a tron p'pa fu Serug èn a kisi moro manpikin nanga umapikin.

²² Di Serug ben abi dritenti yari a tron p'pa fu Nakor.

²³ Serug libi ete tu hondro yari baka di a tron p'pa fu Nakor èn kisi moro manpikin nanga umapikin.

²⁴ Di Nakor ben abi tutenti-na-neigi yari a tron p'pa fu Terak.

²⁵ Nakor libi ete wan hondro nanga tin-na-neigi yari baka di a tron p'pa fu Terak èn a kisi moro manpikin nanga umapikin.

²⁶ Di Terak ben abi seibitenti yari a tron p'pa fu Abram, Nakor nanga Haran.

Den bakapikin fu Terak

²⁷ Disi na den bakapikin fu Terak. Terak tron p'pa fu Abram, Nakor nanga Haran. Haran tron p'pa fu Lot.

²⁸ Terak, a p'pa fu Haran, ben de na libi ete di Haran dede. A dede ini a foto Ur fu den Kaldeasma, pe a ben gebore.

²⁹ Dan Abram nanga Nakor teki wefi fu libi. A frow fu Abram ben nen Sarai èn a di fu Nakor ben nen Milka. Milka ben de wan umapikin fu Haran. Haran ben de p'pa fu Milka nanga Yiska.

³⁰ Sarai no ben abi pikin fu di a no ben man kisi pikin.

³¹ Dan Terak teki en manpikin Abram dan den libi a foto Ur fu den Kaldeasma fu go na a kondre Kanaan. Terak ben teki en granpikin Lot, a manpikin fu Haran, nanga Sarai, a frow fu en manpikin Abram tu fu go nanga den. Ma di den doro Haran den tan libi drape.

³² Terak ben tapu tu hondro nanga feifi yari, dan a dede ini a foto Haran.