Ester 7 - Sranan Tongo Bible 2016

Haman kisi en pai

¹ Dan so kownu nanga Haman ben go baka na Ester fu nyan nanga en,

² fu a di fu tu leisi. Di den ben e dringi win, kownu aksi Ester baka taki: “Ester, san yu wani? San yu wani aksi mi? Mi sa gi yu en. Awinsi na afu fu a kondre fu mi srefi. Mi o du san yu aksi.”

³ Ne frow Ester piki kownu taki: “Efu kownu abi prisiri nanga mi èn efu kownu sa wani, meki kownu kibri mi nanga mi folku fu den no kiri wi. Na dati mi wani èn na dati mi e aksi.

⁴ Bika den seri mi nanga a folku fu mi, fu kiri wi. Efu na seri den ben seri wi leki srafu nomo, mi no ben o ferferi kownu nanga a sani disi. Ma now den wani kiri wi alamala.”

⁵ Ne kownu Ahasveros aksi en frow Ester taki: “Suma na a man, èn pe a man de di prefuru fu du sowan sani?”

⁶ Ester piki taki: “Na wan feyanti di wani pina wi, na Haman, a takru-ati man drape!” Haman skreki srefsrefi fesi kownu nanga en frow.

⁷ Kownu opo nanga bigi atibron, a libi a win dan a go tapu a dyari fu a kownu-oso. Ma Haman ben tan tnapu fu begi Ester gi en libi. Bika a ben si tak' kownu ben o kiri en.

⁸ Dan a srefi momenti di kownu e drai kon baka fu a dyari fu a kownu-oso kon ini a bigi kamra, pe a nyanyan ben poti klari, Haman ben fringi ensrefi tapu a bradi bangi pe Ester ben de. Ne kownu bari taki: “Dan yu wani du mi frow ogri ete, leti pe mi de na ini mi kownu-oso?” Fa kownu taki dati, na so den domru wan duku lontu a fesi fu Haman.

⁹ Dan Harbona, wan fu den prenspari wrokoman di ben wroko spesrutu gi kownu wawan, taigi kownu taki: “Luku, Haman ben seti wan postu fu tutenti-na-feifi meter poti na en oso, fu anga Mordekai, di ben tyari a tori fu kownu kon na krin.” Ne kownu komanderi taki: “Un anga Haman na a postu.”

¹⁰ Dan den anga Haman na a postu di a ben seti poti gi Mordekai. Di dati psa a atibron fu kownu kon saka.