Ester 10 - Sranan Tongo Bible 2016

A makti fu kownu Ahasveros nanga di fu Mordekai

¹ Kownu Ahasveros meki ala sma ini a kondre fu en nanga den sma di ben e libi na sekanti pai lantimoni.

² Ala den bigi sani di a du leki kownu skrifi poti na ini den buku fu a historia fu den kownu fu Media nanga Persia. Ala sani ben skrifi fin'fini tu fu a bigi grani di kownu ben gi Mordekai.

³ Bika, baka kownu Ahasveros, na a Dyu Mordekai ben de a moro bigi man ini a kondre. Den Dyusma ben e lespeki en èn den alamala ben lobi en bika a ben e suku bun gi a folku fu en èn a ben e taki fu sani ben kan go bun gi den sma fu en folku.