Eksodus 7 - Sranan Tongo Bible 2016

¹ Dan MASRA taigi Moses taki: “Luku, Mi sa meki yu de leki wan gado gi Farao. Yu brada Aaron sa de yu profeiti.

² Yu mus taki ala sani san Mi o taigi yu fu taki èn yu brada Aaron sa taki nanga Farao, fu a meki den Israelitisma gwe libi a kondre fu en.

³ Ma Mi sa meki Farao tranga en ati. Dan Mi o du furu marki nanga wondru na ini Egipte.

⁴ Ma Farao no o wani arki unu. Dan Mi sa sori Egipte Mi makti. Mi sa tyari mi folku, ibri lo fu den Israelitisma, kmoto fu Egipte èn Mi sa strafu den sma fu Egipte hebi.

⁵ So den sma fu Egipte sa kon sabi taki Mi na MASRA, te Mi sori Egipte Mi makti èn puru den Israelitisma na den mindri tyari gwe.”

⁶ Dan Moses nanga Aaron du san MASRA taigi den. Den du en leki fa A ben taigi den fu du.

⁷ Moses ben abi aititenti yari èn Aaron ben abi aititenti-na-dri yari, di den go taki nanga Farao.

Moses e kisi makti fu du wondru

⁸ Dan MASRA taigi Moses nanga Aaron taki:

⁹ “Te Farao taigi un taki: ‘Du wan wondru,’ yu mus taigi Aaron taki: ‘Teki yu wakatiki trowe fesi Farao.’ Dan a o tron wan sneki.”

¹⁰ Di Moses nanga Aaron doro na Farao den du san MASRA ben taigi den fu du. Aaron trowe en wakatiki fesi Farao nanga den knekti fu en, dan a tron wan sneki.

¹¹ Ne Farao, fu ensei, seni kari den koniman nanga den tofruman kon. Dan den sabiman disi fu Egipte du den srefi sani.

¹² Ibriwan fu den trowe en wakatiki na gron dan den tron sneki. Ma a wakatiki fu Aaron swari den tiki fu den.

¹³ Ma Farao tranga en ati leki fa MASRA ben taki èn a no ben wani arki den.

A fosi strafu: A watra tron brudu

¹⁴ Dan MASRA taigi Moses taki: “Farao tranga en ati. A no wan meki a folku gwe.

¹⁵ Arki, tamara mamanten yu mus go na Farao te a e go na liba. Yu mus wakti tapu en na seisei fu a Nijl-liba. Yu mus hori a wakatiki, di ben tron wan sneki, na yu anu.

¹⁶ Dan yu mus taigi en taki: ‘MASRA, a Gado fu den Hebrewsma, seni mi kon na yu nanga a boskopu disi: Meki mi pipel go fu den dini Mi ini a sabana.’ Ma te nanga now yu no ben wani arki.

¹⁷ Dat' meki MASRA e taki: Tapu a fasi disi Mi o meki yu sabi taki Mi na MASRA. Luku, mi o naki nanga a tiki tapu a watra fu a Nijl-liba dan a sa tron brudu.

¹⁸ Den fisi ini a Nijl-liba sa dede èn a Nijl-liba sa tingi. Den sma fu Egipte no sa man dringi a watra fu a Nijl-liba.”

¹⁹ Dan MASRA taigi Moses taki: “Taigi Aaron taki: ‘Teki yu wakatiki, dan yu e langa yu anu abra a watra fu Egipte. Abra den liba, den kriki, den gotro nanga ala presi pe watra sidon.’ A sa tron brudu èn brudu sa de ini a heri kondre Egipte. Srefi ini den udu nanga den ston baki fu den.”

²⁰ Moses nanga Aaron du san MASRA taigi den. Aaron opo en anu nanga a wakatiki na loktu dan a naki tapu a watra ini a Nijl-liba meki Farao nanga den knekti fu en si. Dan ala a watra fu a Nijl-liba tron brudu.

²¹ Ala fisi ini a Nijl-liba dede. A Nijl-liba bigin tingi taki den sma fu Egipte no ben man dringi a watra fu a Nijl-liba moro. Brudu ben de ini a heri kondre Egipte.

²² Ma den tofruman fu Egipte du a srefi sani nanga den tofruwroko fu den. So Farao ben tan tranga en ati leki fa MASRA ben taki, èn a no ben wani arki den.

²³ A drai en baka gi den dan a go fu en na oso. A no ben e span srefsrefi nanga san den taki.

²⁴ Den sma fu Egipte ben abi fu diki krosbei fu a Nijl-liba fu suku watra fu dringi, bika den no ben man dringi a watra fu a liba.

²⁵ Seibi dei langa disi ben de so di MASRA naki a Nijl-liba.