Eksodus 5 - Sranan Tongo Bible 2016

Farao e hebi a wroko moro gi den Israelitisma

¹ Baka dati Moses nanga Aaron go na Farao, dan den taigi en taki: “Na so MASRA, a Gado fu Israel taki: ‘Meki mi pipel go, fu den hori wan fesa ini a dreisabana fu gi Mi grani.’ ”

² Ma Farao piki den taki: “Suma na MASRA? Fu sanede mi mus arki en fu meki Israel go? Mi no sabi MASRA, èn mi no o meki Israel go tu.”

³ Ne Moses nanga Aaron taigi en taki: “A Gado fu den Hebrewsma, sori ensrefi na wi. Dat' meki wi e aksi yu primisi fu meki wi waka dri dei langa go ini a dreisabana fu tyari wan ofrandi gi MASRA, a Gado fu wi. Efu wi no du dati A o meki takru siki kiri wi noso den o kiri wi na ini feti.”

⁴ A kownu fu Egipte piki den taki: “Moses nanga Aaron, fu sanede un e pruberi fu meki a folku tapu a wroko di den e du? Un gwe go wroko!”

⁵ Farao taigi den tu taki: “Luku fa a folku fu unu bigi kba, dan un wani fu den tapu nanga wroko.”

⁶ A dei dati Farao komanderi den basya nanga den fesiman fu den wrokoman taki:

⁷ “Un no mus gi den sma dreigrasi moro leki fa un ben gwenti, fu den meki ston. Un mus meki densrefi go suku a dreigrasi now.

⁸ Ma un mus meki den tan meki someni ston leki fa den ben gwenti. Ston no mus mankeri. Na lesi den lesi, dat' meki den e aksi nomo taki: ‘Libi wi meki wi go, fu go tyari ofrandi gi wi Gado.’

⁹ Un mus meki den wroko moro tranga. Efu den e wroko moro tranga den no o abi ten fu arki lei.”

¹⁰ Dan den basya nanga den fesiman fu den wrokoman go na a folku dan den taigi den taki: “Na so Farao taki: Un no o kisi a dreigrasi moro.

¹¹ Unsrefi o abi fu gwe go suku pe un kan feni en, ma un mus tan meki someni ston leki fa un ben gwenti.”

¹² So den sma bigin fu suku dreigrasi na alasei ini heri Egipte.

¹³ Den basya ben de nomo na den baka èn den ben e tan taigi den nomo: “Un mus klari un wroko. Un mus meki someni ston leki di un ben e kisi a dreigrasi.”

¹⁴ Den basya fu Farao, ben e fon den man fu Israel di den ben poti leki fesiman fu den wrokoman. Den ben e aksi den taki: “Fu sanede un no meki someni ston leki fa un ben gwenti?”

¹⁵ Dan den fesiman fu den wrokoman go aksi Farao taki: “Fu sanede yu e du so nanga den knekti fu yu?

¹⁶ Den no e gi wi dreigrasi moro, ma den e taigi wi taki wi mus meki ston. Luku fa den e fon den knekti fu yu. Ma a fowtu didon na den sma fu yu folku.”

¹⁷ Farao piki den taki: “Na lesi un lesi! Dat' meki un e aksi taki: ‘Libi wi meki wi go, fu go tyari ofrandi gi MASRA.’

¹⁸ Un gwe go wroko baka! Un no o kisi dreigrasi ma un mus tan meki someni ston leki fa un ben gwenti.”

¹⁹ Dan den fesiman fu den wrokoman kon ferstan o takru sani ben de gi den, di Farao taigi den taki: “Un mus tan meki someni ston leki fa un ben gwenti fu meki ibri dei.”

²⁰ Di den e kmoto fu Farao den miti Moses nanga Aaron di ben e tnapu wakti den.

²¹ Ne den fesiman taigi den taki: “Wi e winsi taki MASRA strafu yu nanga Aaron fu di un pori en gi wi na Farao nanga den knekti fu en. Now yu gi den a okasi di den ben e suku fu den kiri unu.”

²² Dan Moses drai go na MASRA baka. A taki: “Masra, fu sanede Yu e meki sowan sani miti a pipel disi? Fu sanede Yu seni mi?

²³ Sensi di mi kon taigi Farao san Yu taki, a bigin libi takru nanga a folku disi èn Yu no yepi Yu folku no wan fasi.”

²⁴ Ma Gado piki Moses taki: “Now yu o si sa Mi o du nanga Farao. Mi o sori en Mi makti fu a meki den go. Mi o sori en Mi makti taki a sa yagi den puru fu en kondre.”