Eksodus 40 - Sranan Tongo Bible 2016

¹ MASRA taigi Moses taki:

² “Tapu a fosi dei fu a fosi mun yu mus opo a santa tenti tnapu, sobun a tenti pe yu kan miti nanga Gado.

³ Poti a kisi fu a ferbontu na ini, poti en baka a garden fu sma no si en.

⁴ Tyari a tafra kon poti ini a tenti dan yu e poti ala sani na en presi tapu a tafra.

⁵ Poti a gowtu altari tapu san a wierook e bron fesi a kisi fu a ferbontu dan yu e anga a garden na mofodoro fu a tenti.

⁶ A altari fu bron ofrandi yu mus poti na mofodoro fu a santa tenti, sobun a tenti pe yu kan miti nanga Gado.

⁷ Poti a beki mindri a tenti nanga a altari dan yu e furu en nanga watra.

⁸ Skotu a pren fesi a tenti dan yu e anga a garden na a bigin fu a pren.

⁹ Baka dati yu mus teki a oli fu salfu, dan yu e salfu a santa tenti nanga ala sani di de na ini. Tapu a fasi disi yu e santa a santa tenti nanga ala den sani fu en. Den sa de santa sani.

¹⁰ Salfu a altari fu bron ofrandi nanga ala den wrokosani fu en tu. Tapu a fasi disi yu e poti en aparti. A altari sa santa srefsrefi.

¹¹ Salfu a beki nanga a futupisi fu en tu fu a kon santa.

¹² Baka dati yu mus meki Aaron nanga den manpikin fu en kon na mofodoro fu a tenti pe yu kan miti nanga Gado, dan yu e wasi den nanga watra.

¹³ Weri den santa krosi gi Aaron, salfu en fu a kon santa fu a kan du a priesterwroko gi Mi.

¹⁴ Yu mus meki den boi fu en kon tu dan yu e weri den langa ondrokrosi gi den.

¹⁵ Salfu den, leki fa yu salfu den p'pa, fu den du a priesterwroko gi Mi. Te yu salfu den, dan den nanga den bakapikin fu den sa de priester fu têgo.”

¹⁶ Dan Moses du den sani leki fa MASRA taigi en fu du den.

¹⁷ Tapu a fosi dei fu a fosi mun ini a di fu tu yari den opo a santa tenti tnapu.

¹⁸ Moses meki den opo a santa tenti tnapu, a meki den poti den futupisi nanga den planga dan a meki den opo den postu tnapu.

¹⁹ Den bradi a tenti abra a santa tenti. Baka dati den bradi a duku fu skapububa abra a tenti, leki fa MASRA ben taigi Moses fu du.

²⁰ Baka dati Moses teki den tu plata ston nanga den wortu di ben mus memre den na san Gado taki, dan a poti den ini a kisi. A fasi den syowtiki na a kisi dan a poti a tapun na en tapu.

²¹ A tyari a kisi go ini a santa tenti dan a anga a garden na en fesi fu sma no si a kisi fu a ferbontu. A du dati leki fa MASRA ben taigi en.

²² A poti a tafra na a noordsei ini a santa tenti, sobun a tenti pe yu kan miti nanga Gado, fesi a garden.

²³ A poti a brede tapu a tafra na MASRA fesi. A du en leki fa MASRA ben taigi en fu du.

²⁴ A poti a kandelaar na a zuidsei ini a tenti pe yu kan miti nanga Gado, leti na abrasei fu a tafra.

²⁵ A poti den lampu na en tapu na MASRA fesi, leki fa MASRA ben taigi en fu du.

²⁶ A poti a gowtu altari ini a tenti pe yu kan miti nanga Gado, fesi a garden.

²⁷ A bron wierook di e smeri switi na en tapu leki fa MASRA ben taigi en fu du.

²⁸ A anga a garden na mofodoro fu a santa tenti.

²⁹ A poti a altari fu bron ofrandi na mofodoro fu a santa tenti, sobun a tenti pe yu kan miti nanga Gado. Baka dati a bron wan meti leki ofrandi na en tapu nanga a graan-ofrandi, leki fa MASRA ben taigi en fu du.

³⁰ A poti a beki mindri a tenti pe yu kan miti nanga Gado nanga a altari, dan a furu en nanga watra fu wasi.

³¹ Drape Moses, Aaron nanga den manpikin fu Aaron ben e wasi den anu nanga den futu.

³² Te den ben e kon ini a tenti pe yu kan miti nanga Gado nanga te den ben e go na a altari, den ben e wasi den anu nanga den futu, leki fa MASRA ben taigi Moses fu du en.

³³ A skotu a pren lontu a santa tenti nanga a altari dan a anga a garden na a bigin fu a pren. Na so Moses klari a wroko.

³⁴ Dan a wolku tapu a tenti pe yu kan miti nanga Gado èn a glori fu MASRA furu a santa tenti

³⁵ taki Moses no ben man go ini a tenti pe yu kan miti nanga Gado, fu di a wolku ben de na en tapu. A glori fu MASRA ben furu a santa tenti.

³⁶ Den Israelitisma ben e hari go moro fara te a wolku ben opo fu a santa tenti.

³⁷ Efu a wolku no ben opo fu a santa tenti den no ben e hari go moro fara, te leki a dei di a wolku ben opo baka.

³⁸ Solanga den Israelitisma ben de na pasi, a wolku fu MASRA ben e rostu te deiten tapu a santa tenti èn te neti den alamala ben e si wan faya ini a wolku.