Eksodus 4 - Sranan Tongo Bible 2016

¹ Dan Moses aksi taki: “Ma efu den no wani bribi mi èn efu den no wani arki dan? Efu den taki: ‘A no tru taki MASRA sori ensrefi na yu.’ ”

² Ne MASRA aksi en taki: “San yu hori drape na yu anu?” Moses piki taki: “Wan wakatiki.”

³ Ne MASRA taigi Moses taki: “Trowe en na gron.” Di Moses trowe en na gron, a tron wan sneki. Ne Moses dyompo es'esi go na wan sei.

⁴ Ma MASRA taigi Moses taki: “Langa yu anu, dan yu e grabu en na en tere.” So Moses langa en anu grabu en, dan a tron wan tiki baka ini en anu.

⁵ Ne MASRA taki: “Disi sa meki den bribi taki MASRA, a Gado fu den afo fu den, a Gado fu Abraham, a Gado fu Isak nanga a Gado fu Yakob, sori ensrefi na yu.”

⁶ MASRA taigi en tu taki: “Trusu yu anu go ondro yu dyakti.” So Moses trusu en anu go ondro en dyakti. Di a hari en kon na doro baka a si taki en anu ben abi gwasi. A ben kon weti leki katun.

⁷ Dan MASRA taigi en taki: “Trusu yu anu go baka ondro yu dyakti.” Moses trusu en anu go baka ondro en dyakti. Di a hari en kon na doro baka a si taki en anu ben kon bun baka leki en tra skin.

⁸ “Efu den no wani bribi yu noso a fosi marki, dan den sa bribi a di fu tu marki.

⁹ Efu den no wani bribi yu noso den tu marki disi, dan yu mus teki watra fu a Nijl-liba dan yu e kanti en tapu dreigron. A watra fu a Nijl-liba sa tron brudu tapu a dreigron.”

¹⁰ Dan Moses taigi MASRA taki: “Ma Masra, noiti mi ben de wan bun takiman. So a ben de ten na ten kba èn disi no kenki di Yu bigin taki nanga yu knekti. Te mi mus taki a gersi mi no man feni wortu es'esi fu taki san mi mus taki.”

¹¹ Ne Masra aksi en taki: “Suma gi libisma mofo? Suma e meki taki wan sma babaw noso dofu? Suma e meki taki wan sma man si noso taki a breni? Na Mi, MASRA, e du dati.

¹² So yu kan go. Mi sa yepi yu fu taki èn Mi sa taigi yu san yu mus taki.”

¹³ Ma Moses aksi baka taki: “Tye Masra, seni wan tra sma?”

¹⁴ Ne MASRA ati bron tapu Moses. A taigi en taki: “Mi sabi taki yu brada Aaron, a Lefitiman, sabi taki bun. Luku, a de na pasi fu kon miti yu. A o breiti fu si yu.

¹⁵ Taki nanga en. Taigi en san a mus taki. Dan Mi sa yepi yu nanga en fu taki èn Mi sa taigi unu san yu mus du.

¹⁶ Aaron sa taki nanga a folku gi yu. A sa de yu takiman èn yu sa de leki wan gado gi en.

¹⁷ Yu mus hori a tiki disi ini yu anu bika nanga dati yu o du den wondru.”

¹⁸ Dan Moses drai go baka na Yetro, a p'pa fu en frow. A taigi en taki: “Mi ben sa wani fu drai go baka na den famiri fu mi na ini Egipte, fu si efu den de na libi ete.” Yetro piki en taki: “A bun, go ini freide.”

¹⁹ MASRA ben taigi Moses na ini Midyan taki: “Drai go baka na Egipte, bika ala den sma di ben wani fu kiri yu dede kba.”

²⁰ So Moses teki en frow nanga den boi fu en. A poti den sidon tapu wan buriki dan a drai go baka na Egipte. A ben hori a tiki ini en anu tu di Gado ben taigi en fu hori.

²¹ Dan MASRA taigi Moses taki: “Now di yu e drai go baka na Egipte, yu mus sorgu taki yu du ala den wondru fesi Farao, nanga a makti di Mi gi yu. Ma Mi sa meki a tranga en ati. A no o wani meki a folku gwe.

²² Dan yu mus taigi Farao taki: So MASRA taki: ‘Israel na Mi fosi manpikin.

²³ Dat' meki Mi e taigi yu taki: Meki Mi manpikin go fu a kan dini Mi. Efu yu no wani fu a gwe, Mi sa kiri den fosi manpikin fu yu.’ ”

²⁴ Ma di den de ondro pasi, MASRA miti nanga en ini a kampu pe den ben o psa a neti, dan A suku fu kiri en.

²⁵ Ne Sipora teki wan ston nefi besnei a boi. A fasi Moses futu nanga a buba dan a taki: “Fu tru, soso nanga brudu mi ben man hori yu na libi leki mi trowmasra.”

²⁶ Dan MASRA libi en. Na fu di Sipora ben besnei a boi, meki a taigi Moses taki soso nanga brudu a ben hori en na libi.

²⁷ Dan MASRA taigi Aaron taki: “Waka go miti Moses ini a sabana.” So Aaron go. A miti Moses na a bergi fu Gado dan a bosi en.

²⁸ Moses taigi Aaron ala den sani di MASRA ben taigi en nanga den marki di a ben mus du.

²⁹ So Moses nanga Aaron go, dan den kari ala den fesiman fu den Israelitisma kon na wan.

³⁰ Aaron taigi den ala den sani di MASRA ben taigi Moses, dan Moses du den marki meki den sma si.

³¹ Den Israelitisma bribi èn di den yere taki MASRA si san ben e miti den nanga a pina di den ben e pina, den kindi dan den gi En grani.