Eksodus 39 - Sranan Tongo Bible 2016

Den priesterkrosi

¹ Fu a blaw katun, a dungruredi katun nanga a fayaredi katun den meki priesterkrosi gi a wroko ini a santa presi. Den meki santa krosi tu gi Aaron. Den krosi disi ben meki leki fa MASRA ben taigi Moses taki den mus meki.

² Den meki a efod fu gowtu, blaw katun, dungruredi katun, fayaredi katun nanga diri linnen krosi.

³ Den naki gowtu plaat plata dan den koti en leki draad. Den gowtu draad disi den nai makandra nanga a blaw katun, a dungruredi katun, a fayaredi katun nanga a diri linnen krosi. Na sma di sabi a wroko ben du en.

⁴ Den meki banti na den skowru di ben e fasi den tu pisi fu a efod kon na wan.

⁵ A banti nanga san a ben mus tai, ben meki tapu a srefi fasi, fu gowtu, blaw katun, dungruredi katun, fayaredi katun nanga diri linnen krosi èn a ben de wan pisi nanga a efod. A ben meki leki fa MASRA ben taigi Moses fu meki en.

⁶ Den teki den tu krisoprasston dan den koti den nen fu den twarfu manpikin fu Israel na ini, leki fa wan gowtusmeti e koti nen ini gowtu linga. Di den du dati den fasi den ston ini tu gowtuplaat.

⁷ A poti den tapu den banti na den skowru fu a efod. Den du en leki fa MASRA ben taigi Moses fu du en. Dan so A ben o tan memre den Israelitisma.

⁸ A meki a saka di e kon tapu a borsu. A ben meki tapu a srefi fasi leki a efod, fu gowtu, blaw katun, dungruredi katun, fayaredi katun nanga diri linnen krosi. Na sma di sabi a wroko ben du en.

⁹ A saka ben fokanti. A ben langa èn a ben bradi wan kwart meter te den ben fow en dobru.

¹⁰ Den poti fo rij diri ston na en tapu. A fosi rij ben abi redi yaspisston, krisolitston, nanga malakitston.

¹¹ A di fu tu rij ben abi hematitston, lasurston nanga prasemston.

¹² A di fu dri rij ben abi barnston, agatston nanga ametistston.

¹³ A di fu fo rij ben abi turkooisston, krisoprasston nanga nefritston. Den ston ben fasi ini wan gowtuplaat.

¹⁴ Den meki twarfu ston, fu di na twarfu manpikin Israel ben abi. Ini ibriwan fu den twarfu ston a nen fu wan fu den manpikin ben koti, leki fa wan gowtusmeti e koti nen ini gowtulinga

¹⁵ Den meki keti fu lala gowtu gi a saka di e kon tapu a borsu. Den keti disi ben brei.

¹⁶ Den ben meki tu gowtu plaat nanga tu gowtu linga. Dan den fasi den tu linga na den uku tapusei fu a saka.

¹⁷ Den fasi den tu brei keti fu gowtu na den tu gowtu linga ini den uku fu a saka.

¹⁸ Den tu tra ede fu den brei keti den fasi na den tu plaat di de tapu den banti na den skowru fu a efod.

¹⁹ Den meki ete tu gowtulinga gi a saka, dan den fasi den na den tu uku inisei fu a saka na a sei di e rostu na a efod.

²⁰ Den meki tu gowtu linga tu di ben fasi na den tu banti na den skowru fu a efod. Den linga ben fasi na ondrosei fu den banti, na fes'sei, pe den banti e kon fasi. Dati de leti tapusei fu a banti fu a efod di e lontu a bere.

²¹ Den fasi a saka di e kon tapu a borsu nanga den linga fu en nanga wan blaw titei na den linga fu a efod. Tapu a fasi disi a saka ben fasi na a banti fu a efod fu a no dribi. Den du en leki fa MASRA ben taigi Moses fu du en.

²² Den nai a heri langa empi di e weri nanga a efod, fu blaw katun.

²³ A olo pe a ede mus psa ben de na mindrisei. Den ben nai wan steifi lantyi lontu a olo gi a ede, fu a no priti.

²⁴ Na a lantyi fu a langa empi den poti granaki-apra fu blaw katun, dungruredi katun nanga fayaredi katun.

²⁵ Den meki bel fu lala gowtu dan den poti den na a lantyi fu a langa empi mindri den granaki-apra.

²⁶ Baka ibri gowtu bel wan granaki-apra ben de na a lantyi fu a empi di mus weri te a wroko e du. Na so MASRA ben taigi Moses fu du en.

²⁷ Den nai den langa ondrokrosi gi Aaron nanga den manpikin fu en fu diri linnen krosi.

²⁸ A duku nanga san a mus lontu en ede, den moi hei ati nanga den linnenbruku ben meki fu diri linnen krosi.

²⁹ A banti nanga san a ben mus lontu en bere ben meki fu diri linnen krosi, blaw katun, dungruredi katun nanga fayaredi katun nanga moimoi sani nai poti na en tapu. A ben meki leki fa MASRA ben taigi Moses fu meki en.

³⁰ Den meki wan bromki, wan santa bromki fu lala gowtu dan den koti na ini: Spesrutu gi MASRA. A ben koti leki fa wan gowtusmeti e koti nen na ini gowtulinga.

³¹ Den fasi wan banti fu blaw katun na a bromki fu tai en hori na a duku nanga san Aaron ben mus lontu en ede. Den du en leki fa MASRA ben taigi Moses fu du en.

A santa tenti meki leki fa Gado wani

³² Na so ala den sani meki di ben de fanowdu gi a santa tenti, a tenti pe yu kan miti nanga Gado. Den Israelitisma ben meki den leki fa MASRA ben taigi Moses fu meki den.

³³ Dan den tyari a santa tenti kon gi Moses. Den tyari a tenti kon nanga ala den wrokosani fu en, den aka, den planga, den dwarslati, den postu nanga den futupisi,

³⁴ a duku fu skapububa di ferfi redi, a duku fu krabitabuba, a garden,

³⁵ a kisi fu a ferbontu, den tiki fu syow en nanga a tapun fu a kisi,

³⁶ a tafra, ala den wrokosani fu en nanga den brede di ben de aparti gi Masra,

³⁷ a kandelaar di ben de fu lala gowtu, den lampu di ben mus kon na en tapu, ala den wrokosani fu en, a oli gi den lampu,

³⁸ a gowtu altari, a salfu-oli, a wierook nanga a switismeri di mus bron, a garden di mus kon na mofodoro fu a tenti,

³⁹ a kopro altari nanga a kopro net fu en, den tiki fu syow en nanga ala den wrokosani fu en, a beki nanga a futupisi fu en,

⁴⁰ den garden gi a pren, den postu fu en nanga den futupisi, a garden na a bigin fu a pren, den titei nanga den pen fu en, ala den wrokosani di ben de fanowdu fu du a wroko ini a santa tenti, a tenti pe yu kan miti nanga Gado.

⁴¹ Moro fara den tyari den priesterkrosi kon fu du a wroko ini a santa presi, den santa krosi fu priester Aaron nanga den krosi fu den manpikin fu en fu du a wroko leki priester.

⁴² Den Israelitisma du a wroko leki fa MASRA ben taigi Moses fu du en.

⁴³ Di Moses luku a wroko èn a si taki den du en leki fa MASRA ben taigi en, a blesi den.