Eksodus 37 - Sranan Tongo Bible 2016

¹ Besaleyel meki a kisi fu a ferbontu fu acacia-udu. A ben langa wan nanga kwart meter, a ben bradi èn a ben hei drikwart meter.

² A tapu a udu fu a kisi, fu inisei nanga dorosei, nanga lala gowtu. A meki wan gowtu banti lontu a kisi tu.

³ A meki fo gowtu linga gi en di ben fasi na den fo futu. Tu na a wan sei, nanga tu na a tra sei fu a kisi.

⁴ A meki tiki fu acacia-udu fu syow a kisi. Den tiki disi a ben tapu nanga gowtu tu.

⁵ A sutu den tiki psa ini den linga di ben fasi na sei a kisi fu a kisi ben kan syow.

⁶ A meki wan tapun fu lala gowtu gi a kisi. A ben langa wan nanga kwart meter èn a ben bradi drikwart meter.

⁷ A meki tu gowtu kerub gi den lantyi fu a tapun. Den ben meki fu gowtu di a ben naki plata.

⁸ Wan kerub ben tnapu na a wan sei, a trawan na a tra sei. Den ben de wan pisi nanga a tapun.

⁹ Den kerub ben tnapu abra nanga abra fu densrefi. Den fesi ben e luku go na gron na a tapun fu a kisi. Den ben bradi tu frei opo go na loktu nanga san den ben e tapu a tapun fu a kisi.

¹⁰ Besaleyel meki wan tafra fu acacia-udu. A ben langa wan meter, a ben bradi wan afu meter èn a ben hei drikwart meter.

¹¹ A tapu a udu fu a tafra nanga lala gowtu dan a meki wan gowtu banti lontu en.

¹² A meki wan lantyi na a tafra. A lantyi ben bradi seibi nanga afu centimeter èn a ben abi wan gowtu banti lontu en.

¹³ A meki fo gowtu linga gi en di ben fasi na den fo uku pe den futu de.

¹⁴ Den linga ben de krosbei fu den lantyi. Ini den linga disi den tiki ben mus kon fu syow a tafra.

¹⁵ A meki tiki fu acacia-udu fu syow a tafra. A tapu den tiki disi nanga gowtu.

¹⁶ A meki ala den wrokosani di ben mus de tapu a tafra soleki skotriki, skarki, komki nanga kan, fu kanti sani. Den ben meki fu lala gowtu.

¹⁷ Besaleyel meki wan kandelaar fu lala gowtu di a ben naki plata. A futu, a mindri pisi, den kopki di mus hori den lampu, den blad nanga den bromki ben de fu wan pisi.

¹⁸ Siksi anu ben kmoto na seisei fu a kandelaar. Dri na a wan sei nanga dri na a tra sei.

¹⁹ Ala den dri anu na a wan sei ben abi dri kopki, blad nanga bromki. Den kopki ben meki leki amandrabromki. A srefi fasi ala den dri anu na a tra sei ben abi dri kopki di meki leki amandrabromki, blad nanga bromki. Na so den siksi anu ben meki di ben e kmoto na seisei fu a kandelaar.

²⁰ A mindri pisi fu a kandelaar srefi ben abi fo kopki leki amandrabromki, blad nanga bromki.

²¹ Wan blad ben de pe den siksi anu ben fasi na a mindri pisi. Wan ben de ondro de tu fosi anu, wan ben de ondro den di fu tu anu, wan ben de ondro den di fu dri anu. Na so a sa de na ala siksi anu di fasi na a kandelaar.

²² A heri mindri pisi, den blad nanga den anu ben de fu wan pisi lala gowtu di naki plata.

²³ Besaleyel meki seibi lampu gi a kandelaar nanga tanga nanga baki fu lala gowtu.

²⁴ A kandelaar nanga ala den sani di ben de fanowdu a meki fu sowan dritenti nanga feifi kilo lala gowtu.

Besaleyel e meki a altari fu bron wierook

²⁵ Besaleyel meki a altari fu bron wierook. A meki en fu acacia-udu. A ben fokanti. A ben langa èn a ben bradi wan afu meter èn a ben hei wan meter. Den tutu ben de wan nanga a altari.

²⁶ A tapu a altari nanga lala gowtu fu tapusei nanga fu seisei. Den tutu fu en a tapu nanga gowtu tu. A meki wan gowtu banti lontu en tu.

²⁷ A meki tu gowtu linga gi en na ala tu sei ondro a banti. Den linga disi ben de fu hori den tiki nanga san den ben mus syow a altari.

²⁸ A meki syowtiki fu acacia-udu, dan a tapu den nanga gowtu.

²⁹ Besaleyel meki a salfu-oli nanga a soifri wierook di e smeri switi. A meki den leki fa wan man e du di e meki switismeri.