Eksodus 31 - Sranan Tongo Bible 2016

Den spesrutu wrokoman

¹ MASRA taigi Moses taki:

² “Arki, na Besaleyel fu a lo fu Yuda Mi teki spesrutu. En p'pa na Uri èn en granp'pa na Hur.

³ Mi furu en nanga a Yeye fu Gado. Mi gi en koni, sabi nanga ferstan gi difrenti wroko, fu a sidon denki èn meki sani

⁴ fu gowtu, solfru noso kopro,

⁵ nanga fu koti diri ston poti ini plaat, fu koti udu èn fu du difrenti wroko.

⁶ Luku, Mi poti Oholidab, a manpikin fu Akisamak, fu a lo fu Dan, fu wroko nanga en. Mi gi koni tu na ala den tra man di sabi a wroko. Den sa meki ala sani san Mi komanderi yu fu meki:

⁷ a tenti pe yu kan miti nanga Gado, a kisi fu poti den wortu di mus memre unu na san Mi taki, a tapun di mus kon tapu a kisi, nanga ala den sani di de fanowdu fu du a wroko ini a tenti.

⁸ Moro fara, a tafra nanga ala den wrokosani fu en, a kandelaar fu lala gowtu nanga den wrokosani fu en, a altari fu bron wierook,

⁹ a altari fu bron ofrandi nanga ala den wrokosani fu en, a beki fu wasi anu nanga futu nanga a futupisi fu en,

¹⁰ den priesterkrosi, sobun den santa krosi fu priester Aaron nanga den wan di den manpikin fu en mus weri fu du a priesterwroko,

¹¹ a salfu-oli nanga a wierook di e smeri switi, di mus bron ini a santa presi. Den sa meki ala den sani leki fa Mi komanderi yu fu meki den.”

Gado e warskow a pipel fu hori a sabatdei

¹² MASRA taigi Moses taki:

¹³ “Taigi den sma fu Israel taki: ‘Un mus tan hori a sabatdei, bika na wan marki gi Mi nanga unu nanga ala den bakapikin fu den Israelitisma, fu un sabi taki Mi MASRA, poti un aparti.

¹⁴ Un sa tan hori a sabatdei, bika na wan santa dei gi unu. A sma di no hori ensrefi na a sabatdei sa dede nomonomo, bika iniwan sma di wroko tapu a dei dati den mus yagi fu têgo kmoto na mindri fu den Israelitisma.

¹⁵ Siksi dei de fu un wroko, ma a di fu seibi dei, a sabatdei, sa de wan trutru rostu dei. A sa de wan dei spesrutu gi MASRA. Iniwan sma di wroko tapu a sabatdei sa dede nomonomo.’

¹⁶ Den Israelitisma nanga den bakapikin fu den sa tan hori a sabatdei èn si en leki wan spesrutu dei. Na wan têgo ferbontu.

¹⁷ Na wan têgo marki gi Mi nanga den Israelitisma, bika na ini siksi dei MASRA meki heimel nanga grontapu, dan A rostu èn A teki bro tapu a di fu seibi dei.”

Den ston nanga den wortu

¹⁸ Baka di Gado kba taki nanga Moses tapu a Sinaibergi, A gi en den tu plata ston nanga den wortu fu memre den na san A ben taigi den. Na Gado srefi ben skrifi den.