Eksodus 30 - Sranan Tongo Bible 2016

A altari fu bron wierook

¹ Meki wan altari fu bron wierook. A altari sa meki fu acacia-udu.

² A mus fokanti. A mus langa èn a mus bradi wan afu meter. A mus hei wan meter. Den tutu sa de wan nanga a altari.

³ Yu sa tapu en nanga lala gowtu fu tapusei nanga fu seisei. Den tutu fu en mus tapu nanga gowtu tu. Meki wan gowtu banti lontu en.

⁴ Yu mus meki tu gowtu linga gi en na ala tu sei ondro a banti. Den linga disi na fu hori den tiki nanga san den mus syow a altari.

⁵ Den syowtiki mus meki fu acacia-udu èn yu mus tapu den nanga gowtu.

⁶ Poti a altari fesi a garden di anga fesi a kisi fu a ferbontu, fesi a tapun pe Mi nanga yu o miti.

⁷ Ala mamanten te Aaron e sorgu gi den lampu, a sa bron wierook di e smeri switi na en tapu.

⁸ Aaron sa du disi tu te a e leti den lampu te neti e fadon. A sa bron wierook di e smeri switi na MASRA fesi. Disi na wan sani di den bakapikin fu den Israelitisma mus tan du.

⁹ No wan tra sortu wierook di e smeri switi noso ofrandi di e bron nanga faya sa bron tapu a altari. A graan-ofrandi nanga a win di un e kanti leki ofrandi gi Mi no sa kon na en tapu tu.

¹⁰ Wan leisi wan yari Aaron sa teki pikinso fu a brudu fu a ofrandi di mus meki un kisi pardon fu un sondu. A mus lobi en gi den tutu fu a altari fu santa a altari. Na wan sani di mus du wan leisi ala yari èn di den bakapikin fu un mus tan du. A altari na wan tumsi santa sani gi MASRA.”

¹¹ MASRA taigi Moses taki:

¹² “Te yu e teri den Israelitisma, ibrisma sa pai MASRA wan moni gi en libi, fu wan strafu no kon na den tapu te yu e teri den.

¹³ Ibrisma di teri sa gi wan afu sikkel solfru. A mus wegi leki fa un e wegi den sani di de fanowdu gi a santa presi. Drape wan sikkel na tutenti gera. Den sa gi wan afu sikkel leki wan spesrutu ofrandi na MASRA.

¹⁴ Ibri sma di den teri, fu tutenti yari nanga moro owru, sa gi a spesrutu ofrandi disi na MASRA.

¹⁵ A guduman nanga a pôtiman sa gi a srefi. Den sa gi wan afu sikkel leki spesrutu ofrandi gi den libi fu meki en bun nanga MASRA.

¹⁶ A moni di den Israelitisma gi fu meki en bun nanga Mi, yu mus teki gi a wroko ini a tenti pe yu kan miti nanga Gado. A sa tan memre MASRA taki den Israelitisma meki en bun nanga en.”

A beki fu den priester wasi den anu nanga futu

¹⁷ MASRA taigi Moses taki:

¹⁸ “Meki wan kopro beki nanga wan futupisi fu kopro. Poti en na mindri fu a tenti pe yu kan miti nanga Gado nanga a altari, dan yu e furu en nanga watra.

¹⁹ Nanga a watra disi Aaron nanga den manpikin fu en sa wasi den anu nanga den futu.

²⁰ Den mus du en te den e kon ini a tenti pe yu kan miti nanga Gado nanga te den e kon fu du den wroko na a altari fu bron wan ofrandi gi MASRA.

²¹ Den mus fu wasi den anu nanga den futu noso den o dede. Disi sa de wan sani di en nanga den bakapikin fu en mus tan du fu têgo.”

A oli fu salfu

²² MASRA taigi Moses taki:

²³ “Teki den moro fini spesrei: feifi hondro sikkel fu a moro bun mirre. Tu hondro nanga feifitenti sikkel kaneri di e smeri switi, dati na afu so furu leki a mirre. Nanga tu hondro nanga feifitenti sikkel kalmoes.

²⁴ Moro fara yu mus teki feifi hondro sikkel kasie nanga fo liter oleif-oli. Den mus wegi leki fa un e wegi den sani di de fanowdu gi a santa presi.

²⁵ Meki wan santa salfu-oli nanga den sani disi, leki fa wan man di e meki switi smeri ben o meki en. A sa de wan santa salfu-oli.

²⁶ Salfu a tenti pe yu kan miti nanga Gado, nanga a kisi fu a ferbontu.

²⁷ Salfu a tafra nanga ala en wrokosani, a kandelaar nanga ala en wrokosani nanga a altari fu bron wierook.

²⁸ Salfu a altari pe a ofrandi mus bron nanga ala den wrokosani fu en, a beki pe anu nanga futu mus wasi, nanga a futupisi fu a beki.

²⁹ Salfu den sani disi meki den de trutru santa sani. Ala sani di miti nanga den sa kon santa tu.

³⁰ Salfu Aaron nanga den manpikin fu en tu èn poti den aparti fu den du a wroko leki priester.

³¹ Yu sa taigi den Israelitisma taki: ‘Fu têgo disi na wan santa salfu-oli gi MASRA.

³² A no sa kanti tapu a skin fu wan libisma èn noiti den sa meki wan sani tapu a srefi fasi disi. Na wan santa sani. A sa de wan santa sani gi unu.

³³ A sma di meki sowan salfu noso poti en gi wan sma di no fiti fu kisi en, den mus yagi fu têgo kmoto na mindri fu den Israelitisma.’ ”

A switismeri di mus bron gi MASRA

³⁴ MASRA taigi Moses taki: “Yu mus teki spesrei nanga switi smeri leki hars, onyx nanga galbanum. Na spesrei nanga switi smeri. Teki soifri wierook tu dan yu e moksi ala sani. Someni leki yu poti fu a wan yu mus poti fu ala trawan tu.

³⁵ Meki wan switismeri fu den. Moksi den leki fa wan man di e meki switismeri e du. Poti sowtu gi en tu. A mus soifri èn a mus santa.

³⁶ Masi pikinso fu en finifini dan yu e poti en fesi a kisi fu a ferbontu, ini a tenti pe yu kan miti nanga Gado.

³⁷ Yu no sa meki switismeri gi yusrefi leki fa yu meki a disi. A disi sa de wan santa wan gi MASRA wawan.

³⁸ A sma di meki switismeri leki a disi fu prisiri nanga a smeri fu en, den mus yagi fu têgo kmoto na mindri fu den Israelitisma.”