Eksodus 26 - Sranan Tongo Bible 2016

A santa tenti

¹ Yu mus meki a santa tenti nanga tin duku. Den duku mus de fu diri linnen krosi, blaw katun, dungruredi katun, nanga fayaredi katun. Meki sma di sabi du a wroko bun nai kerub na den tapu.

² Ibri duku mus langa tin-na-fo meter èn a mus bradi tu meter. Ala den duku mus langa a srefi èn den mus bradi a srefi.

³ Yu mus fasi feifi fu den duku kon na wan. A srefi sani yu mus du nanga den feifi trawan.

⁴ Te yu du dati, yu mus meki ai fu blaw katun na a wan sei lantyi fu ala den tu duku.

⁵ Yu mus meki feifitenti ai na a wan duku nanga feifitenti ai na a tra duku. Den ai fu den tu duku mus de abra nanga abra.

⁶ Yu mus meki feifitenti gowtu aka fu aka den tu duku kon na wan, meki den tron wan.

⁷ Yu mus meki wan tenti tu nanga erfu duku fu krabitawiwiri. A tenti disi mus kon abra a santa tenti.

⁸ Ala den duku musu langa a srefi èn den mus bradi a srefi. Den mus langa tin-na-feifi meter èn den mus bradi tu meter.

⁹ Feifi fu den duku yu mus fasi kon na wan. Den siksi trawan yu mus fasi kon na wan tu, ma a di fu siksi duku yu mus fow dobru. A dati mus kon na fes'sei fu a tenti.

¹⁰ Te yu fasi den feifi duku kon na wan, yu mus meki feifitenti ai na a lantyi fu en. A srefi sani yu mus du te yu fasi den tra siksi duku kon na wan.

¹¹ Yu mus meki feifitenti kopro aka. Nanga den aka disi yu mus aka den ai fu den tu duku kon na wan, meki den tu duku tron wan.

¹² Yu mus meki afu fu a pisi fu a duku di langa psa, anga na a bakapisi fu a santa tenti.

¹³ Yu mus meki a afu meter di bradi psa na ala tu sei, anga abra a santa tenti fu tapu en.

¹⁴ Fu tapu a tenti yu mus meki wan duku fu skapububa di ferfi redi. Tapu a skapububa wan tra duku mus kon fu krabitabuba.

¹⁵ Yu mus meki planga fu acacia-udu gi a santa tenti. Den planga disi mus tnapu let' opu.

¹⁶ Ibri planga mus langa feifi meter èn a mus bradi drikwart meter.

¹⁷ Ala planga mus abi tu pen fu kan fasi den na makandra. Ala planga fu a santa tenti mus de so.

¹⁸ Yu mus meki tutenti planga gi a sei fu a santa tenti di de na a zuidsei.

¹⁹ Meki fotenti futupisi fu solfru. Ibri planga mus abi tu futupisi. Ini den futupisi disi den tu pen fu den planga mus fiti.

²⁰ Gi a sei fu a santa tenti di de na a noordsei yu mus meki tutenti planga tu

²¹ nanga fotenti futupisi. Tu futupisi gi ibri planga.

²² Gi a bakapisi fu a santa tenti di de na a westsei, yu sa meki siksi planga.

²³ Gi den uku na bakasei fu a santa tenti yu sa meki tu planga.

²⁴ Den tu planga disi o meki den uku. Fu ondrosei go na loktu te na a linga den mus de a srefi.

²⁵ Ala nanga ala aiti planga mus de nanga solfru futupisi. Tin-na-siksi solfru futupisi sa de. Tu gi ibri planga.

²⁶ Yu mus meki dwarsbalk fu acacia-udu. Feifi gi a wan sei fu a santa tenti,

²⁷ feifi gi a tra sei fu a santa tenti nanga feifi gi den planga na bakasei fu a santa tenti di de na a westsei.

²⁸ A di fu dri dwarsbalk mus didon leti na mindri fu den planga èn a mus waka fu a fosi planga go te na a laste wan.

²⁹ Yu mus tapu den planga nanga den dwarsbalk nanga gowtu èn yu mus meki gowtu linga gi den planga ini san den dwarsbalk mus kon fasi.

³⁰ Dan yu sa opo a santa tenti tnapu, leki fa Mi sori yu dyaso na tapu a bergi.

³¹ Meki wan garden fu blaw katun, dungruredi katun, fayaredi katun nanga diri linnen krosi èn yu mus meki sma di sabi du a wroko bun, nai kerub na en tapu.

³² Yu mus anga en nanga gowtu aka na fo postu fu acacia-udu, di tapu nanga gowtu. Den postu mus tnapu tapu fo solfru futupisi.

³³ Yu mus anga a garden ondro den tra gowtu aka, dan yu e poti a kisi fu a ferbontu baka a garden. A garden sa prati a santa pisi nanga a moro santa pisi.

³⁴ Poti a tapun tapu a kisi ini a moro santa presi.

³⁵ Yu mus poti a tafra nanga a kandelaar abra nanga abra fesi a garden. A tafra mus de na noordsei fu a santa tenti. A kandelaar mus de na a zuidsei.

³⁶ Yu mus anga wan garden na mofodoro fu a tenti tu. A mus meki fu blaw katun, dungruredi katun, fayaredi katun nanga diri linnen krosi èn moimoi sani mus nai na en tapu.

³⁷ Gi a garden disi yu mus meki feifi postu fu acacia-udu di tapu nanga gowtu. Yu mus meki gowtu aka gi den tu nanga feifi kopro futupisi.