Eksodus 25 - Sranan Tongo Bible 2016

A spesrutu ofrandi fu meki a santa tenti

¹ MASRA taigi Moses taki:

² “Taigi den Israelitisma taki den mus piki wan spesrutu ofrandi gi Mi. Ala sma di ati firi fu gi Mi wan sani mus tyari a ofrandi kon gi yu.

³ Disi na den sani di yu mus aksi den fu gi leki spesrutu ofrandi: gowtu, solfru, kopro,

⁴ blaw katun, dungruredi katun, fayaredi katun, diri linnen krosi, krosi di meki fu krabitawiwiri,

⁵ skapububa di ferfi redi, krabitabuba nanga acacia-udu.

⁶ Moro fara oli gi lampu, spesrei fu meki salfu-oli nanga a wierook di e smeri switi,

⁷ krisoprasston nanga tra diri ston gi a efod nanga gi a saka di e fasi na a efod.

⁸ A pipel mus meki wan santa presi gi Mi, dan Mi sa libi na de mindri.

⁹ Mi o sori yu wan eksempre fu a santa tenti nanga ala den wrokosani fu en. Na so yu mus meki en.

A kisi fu a ferbontu

¹⁰ Den mus meki wan kisi fu acacia-udu. A mus langa wan nanga kwart meter èn a mus bradi èn a mus hei drikwart meter.

¹¹ Un mus tapu a udu fu a kisi, fu inisei nanga dorosei, nanga lala gowtu. Un mus meki wan gowtu banti lontu a kisi.

¹² Un mus meki fo gowtu linga di un mus fasi na den fo futu. Tu na ibrisei fu a kisi.

¹³ Un mus meki tiki fu acacia-udu fu syow a kisi. Den tiki disi mus tapu nanga gowtu.

¹⁴ Un mus sutu den tiki psa ini den linga di fasi na sei a kisi. Dan so un mus syow a kisi.

¹⁵ Den tiki nanga san un mus syow a kisi mus tan ini den linga. Un no mus puru den ini den linga.

¹⁶ Mi o gi yu den wortu di mus memre unu na san Mi ben taki. Dan yu mus poti den ini a kisi.

¹⁷ Un mus meki wan tapun fu lala gowtu gi a kisi. A mus langa wan nanga kwart meter èn a mus bradi drikwart meter.

¹⁸ Un mus meki tu gowtu kerub gi den lantyi fu a tapun. Den mus meki fu gowtu di un naki plata.

¹⁹ Wan kerub mus tnapu na a wan sei, a trawan na a tra sei. Den mus de wan pisi nanga a tapun.

²⁰ Den kerub mus tnapu abra nanga abra fu densrefi. Den fesi mus luku go na gron, na a tapun fu a kisi. Den tu frei fu den mus bradi opo go na loktu fu kan tapu a tapun fu a kisi.

²¹ Un mus poti a tapun tapu a kisi. Ini a kisi un mus poti den wortu di mus memre un na san Mi ben taki. Mi o gi un den wortu dati.

²² Dati na a presi pe mi sa miti nanga yu. Fu a tapun, fu mindri den kerub di de tapu a kisi fu a ferbontu, drape Mi sa taki nanga yu abra ala sani di Mi wani taki den Israelitisma mus du.

A tafra

²³ Meki wan tafra fu acacia-udu. A mus langa wan meter, a mus bradi wan afu meter èn a mus hei drikwart meter.

²⁴ Un mus tapu a udu fu a tafra nanga lala gowtu èn a mus abi wan gowtu banti lontu en.

²⁵ Un mus meki wan lantyi na a tafra. A lantyi mus bradi sowan seibi nanga afu centimeter èn a mus abi wan gowtu banti lontu en.

²⁶ Un mus meki fo gowtu linga gi en di mus fasi na den fo uku pe den futu de.

²⁷ Den linga mus de krosbei fu a lantyi bika den tiki nanga san a mus syow a tafra mus psa na ini.

²⁸ Yu mus meki den tiki dati fu acacia-udu èn a udu mus tapu nanga gowtu.

²⁹ Un mus meki skotriki, skarki, kan nanga komki fu kanti sani. Den mus meki fu lala gowtu.

³⁰ Tapu a tafra yu mus tan poti santa brede gi Mi.

A kandelaar

³¹ Yu mus meki wan kandelaar. A mus meki fu lala gowtu di naki plata. A futu, a mindri pisi, den kopki di mus hori den lampu, den blad nanga den bromki mus de fu wan pisi.

³² Siksi anu mus kmoto na seisei fu a kandelaar. Dri na a wan sei nanga dri na a tra sei.

³³ Ala den dri anu na a wan sei mus abi dri kopki, blad nanga bromki. A kopki mus meki leki wan amandrabromki. A srefi fasi ala den dri anu na a tra sei mus abi dri kopki di meki leki amandrabromki, blad nanga bromki. Na so den siksi anu mus meki di e kmoto na seisei fu a kandelaar.

³⁴ A mindri pisi fu a kandelaar srefi, mus abi fo kopki fu amandrabromki, blad nanga bromki.

³⁵ Pe den siksi anu fasi na a mindri pisi, drape wan blad mus de. Wan mus de ondro de tu fosi anu, wan mus de ondro den di fu tu anu, wan mus de ondro den di fu dri anu. Na so a sa de na ala siksi anu di fasi na a kandelaar.

³⁶ A heri mindri pisi, den blad nanga den anu mus de fu wan pisi lala gowtu di naki plata.

³⁷ Yu mus meki seibi lampu gi en. Den lampu mus poti sowan fasi taki a faya fu den e fadon kon na fesi.

³⁸ Den tanga nanga den baki mus de fu lala gowtu tu.

³⁹ A kandelaar nanga ala den sani di de fanowdu sa meki fu sowan dritenti-na-feifi kilo lala gowtu.

⁴⁰ Sorgu taki yu meki ala sani leki fa yu si den dyaso tapu a bergi.