Eksodus 24 - Sranan Tongo Bible 2016

A ferbontu

¹ Baka dati MASRA taigi Moses taki: “Kren kon miti MASRA. Yu, Aaron, Nadab, Abihu nanga seibitenti fu den fesiman fu Israel. Ma un no mus kon tumsi krosbei fu boigi gi Mi.

² Yu wawan sa kon moro krosbei fu MASRA. Den trawan no sa kon krosbei. A folku no sa kren kon nanga den tu.”

³ Moses go taigi a folku ala den sani di MASRA taigi en, nanga ala den sani na san den ben mus hori densrefi. Ne a heri folku piki taki: “Wi sa du ala den sani di MASRA taigi unu fu du.”

⁴ Moses skrifi ala den sani di MASRA taki. Fruku mamanten a bow wan altari na a futu fu a bergi nanga twarfu ston di a ben poti tnapu let'opu. Ibri ston ben de gi wan fu den twarfu lo fu Israel.

⁵ Moses seni wantu yonkuman tu fu go teki meti kon fu bron leki ofrandi. Dan den srakti bulu leki freide-ofrandi gi MASRA.

⁶ Baka dati Moses poti afu fu a brudu ini beki. A tra afu a fringi tapu a altari.

⁷ Dan Moses teki a buku fu a ferbontu. A leisi en meki a heri folku yere dan den piki taki: “Wi yere san MASRA taki èn wi sa du ala den sani di A taigi unu fu du.”

⁸ Ne Moses teki a brudu, a fringi en tapu a folku dan a taki: “Luku, a brudu disi e stampu a ferbontu di MASRA e sroto nanga unu, baka di A taki ala den sani disi.”

⁹ Dan Moses, Aaron, Nadab nanga Abihu makandra nanga seibitenti fu den fesiman fu Israel kren go tapu a bergi.

¹⁰ Ne den si a Gado fu Israel. A ben gersi leki a ben tnapu tapu Lazuurston di ben blaw leki a heimel.

¹¹ Ma Gado no du den prenspari man disi fu Israel noti. Den si Gado èn den nyan èn den dringi.

Moses e tan fotenti dei tapu a bergi

¹² Dan MASRA taigi Moses taki: “Kren a bergi kon na Mi, dan yu mus wakti drape. Dan Mi sa gi yu den plata ston nanga a wèt nanga den gebod di Mi skrifi, fu yu leri a folku.”

¹³ So Moses nanga en knekti Yosua opo, dan Moses kren go tapu a bergi.

¹⁴ A taigi den fesiman taki: “Un tan wakti dyaso na wi tapu te leki wi drai kon baka. Aaron nanga Hur de nanga unu. Efu wan tak'taki de den sma kan go na den.”

¹⁵ Baka dati Moses kren go tapu a bergi fu Gado, dan a wolku tapu a bergi.

¹⁶ A glori fu MASRA ben tapu a bergi Sinai. Siksi dei langa a wolku ben tapu a bergi. Tapu a di fu seibi dei Masra kari Moses fu ini a wolku.

¹⁷ Den Israelitisma ben man si a glori fu MASRA tapusei fu a bergi. A ben de leki wan faya di e bron ala sani.

¹⁸ Moses go ini a wolku dan a kren a bergi go moro fara. Fotenti dei nanga fotenti neti a tan na tapu a bergi.