Eksodus 21 - Sranan Tongo Bible 2016

¹ “Disi na den sani na san den mus hori densrefi.

² Te yu bai wan Hebrewsrafu, a sa wroko siksi yari gi yu. Ma a di fu seibi yari a kan gwe leki wan fri sma sondro fu a pai yu wan sani.

³ Efu na en wawan ben kon, a sa gwe en wawan baka. Ma efu a ben trow, a sa gwe nanga en frow.

⁴ Efu na en basi ben gi en wan frow èn a frow disi kisi pikin gi en, dan a frow nanga den pikin e tan fu a basi. En wawan sa gwe.

⁵ Efu na a srafu srefi taki: Mi lobi mi basi, mi frow nanga mi pikin. Mi no wani gwe leki wan fri man,

⁶ dan en basi sa tyari en go na fesi Gado. En basi sa poti en tnapu na a doro noso a postu fu a doro, dan a boro en yesi nanga wan fini sani. Dan a srafu sa tan dini en basi so langa a e libi.

⁷ Efu wan sma seri en umapikin leki srafu, a umapikin dati no o man gwe leki wan fri uma leki den manwan.

⁸ Efu en basi ben bai en leki frow gi ensrefi ma en basi no wani en moro, dan a mus meki den bai en puru baka. A no abi a leti fu seri en gi doroseisma fu di a no libi nanga a uma leki fa a ben musu.

⁹ Efu na gi en manpikin a ben bai a uma, dan a mus gi en den srefi leti di en eigi umapikin ben o abi.

¹⁰ Efu a basi teki ete wan tra uma, a sa tan sorgu gi nyanyan nanga krosi fu a fosiwan. A sa tan go nanga en na bedi tu leki fa den ben gwenti.

¹¹ Efu a no hori ensrefi na den dri sani disi, dan a uma kan gwe sondro fu wan sma pai wan sani gi en.

¹² A sma di naki wan trawan sowan fasi taki a trawan dede, mus dede tu.

¹³ Efu a no ben poti na en ede fu kiri a trawan, ma na Mi meki a ongoloku miti en, dan Mi sa sori yu wan presi pe a kan lowe go.

¹⁴ Ma efu na sidon a sma ben sidon prakseri na fesi fa a o kisi a trawan kiri, dan un kan puru en na Mi altari srefi tyari go kiri.

¹⁵ A sma di naki en m'ma noso en p'pa mus dede.

¹⁶ A sma di teki wan trawan tyari gwe sondro fu a trawan wani, mus dede. A no abi trobi efu a ben seri a trawan kba noso efu den kon feni a trawan na en ete.

¹⁷ A sma di fluku en m'ma noso en p'pa mus dede.

¹⁸ Efu tu man meki trobi, dan a wan naki a trawan sowan fasi nanga kofu noso nanga wan ston taki a trawan no dede ma a abi fu tan na bedi fu wan pisten,

¹⁹ dan a wan di naki no sa kisi strafu efu a trawan man opo waka na dorosei baka nanga en wakatiki. A sa abi fu pai soso gi den dei di a trawan ben abi fu tan na bedi nanga gi a paiman di meki fu a trawan kon betre.

²⁰ Efu wan sma naki wan mansrafu noso wan umasrafu fu en sowan fasi nanga wan tiki taki a srafu kon dede, a basi dati mus kisi strafu.

²¹ Ma efu a srafu tan libi wan noso tu dei ete, a basi dati no sa strafu moro fu di a lasi wan sani di ben de fu en.

²² Efu tu man e feti, dan wan fu den pusu wan uma nanga bere taki a uma lasi a bere, ma noti no psa moro fara nanga a uma, dan a man di pusu a uma mus pai wan butu. A man fu a uma sa taki o hei a butu mus de èn krutubakra sa luku taki a butu pai.

²³ Efu a uma kisi tra mankeri tu taki a dede, dan a man di pusu a uma mus dede tu.

²⁴ Efu na broko a broko a uma en ai, den mus broko en ai tu. Efu na broko a broko a tifi fu a uma, den mus broko en tifi tu. Efu na wan anu a broko fu a uma, den mus broko en anu tu. Efu na wan futu fu a uma a broko, den mus broko en futu tu.

²⁵ Efu na wan koti a gi a uma, den mus gi en wan koti tu. Efu na wan soro a gi a uma, den mus gi en wan soro tu. Efu na wan marki a gi a uma na en skin, den mus gi en wan marki na en skin tu.

²⁶ Efu wan basi naki a ai broko fu wan mansrafu noso fu wan umasrafu fu en, dan a mus libi a srafu dati meki a gwe.

²⁷ Efu na wan tifi a naki broko fu wan mansrafu noso fu wan umasrafu fu en, dan a mus libi a srafu dati meki a gwe.

²⁸ Efu wan bulu buku wan man noso wan uma sowan fasi taki a sma dede, den mus fringi ston kiri a bulu dati èn den no mus nyan a meti fu en. A basi fu a bulu no abi fu pai noti.

²⁹ Efu a bulu ben gwenti e buku sma èn den ben warskow a basi fu en kba ma a no hori ai tapu a bulu fu en, dan den sa fringi ston kiri a bulu nanga en basi efu a bulu kiri wan man noso wan uma.

³⁰ Efu na pai a mus pai wan moni fu den no kiri en, dan a sa abi fu pai ala san den taigi en fu pai, fu kan tan na libi.

³¹ Den srefi sani di mus du te a bulu buku wan man noso wan uma den mus du tu te a buku wan manpikin noso wan umapikin.

³² Ma efu a bulu buku wan mansrafu noso wan umasrafu, den mus fringi ston kiri a bulu, èn a basi fu a bulu abi fu pai dritenti pisi solfrumoni na a basi fu a srafu.

³³ Efu wan sma opo wan peti noso a diki wan peti sondro fu a tapu a olo èn wan kaw noso wan buriki fadon go na ini,

³⁴ a sma di abi a peti o abi fu pai a sma di abi a meti. A dede meti a kan hori.

³⁵ Efu a bulu fu wan sma buku wan tra sma bulu kiri, den tu basi sa seri a libi bulu dan den prati a moni. A dede bulu den sa prati tu.

³⁶ Efu a basi fu a bulu ben sabi taki a bulu ben gwenti e buku ma a no hori ai tapu a bulu fu en, dan a sa abi fu gi wan libi bulu baka ma a dede bulu a kan hori.