Eksodus 20 - Sranan Tongo Bible 2016

Den tin gebod

¹ Dan Gado taki ala den wortu disi:

² “Mi na MASRA, un Gado, di puru unu na ini Egipte pe un ben de srafu.

³ Un no mus dini no wan tra gado boiti Mi.

⁴ No meki no wan popki noso wan prentyi fu wan sani di de na heimel, di de na grontapu noso di de ini a watra ondro grontapu.

⁵ No boigi gi den èn no dini den. Bika Mi, MASRA, un Gado, na wan dyarusu Gado. Mi e strafu den pikin, den granpikin nanga den afopikin, fu a ogri di den bigisma fu den du, di no lobi Mi.

⁶ Ma Mi e sori bigi lobi fu têgo na den bakapikin fu den wan di lobi Mi èn di e hori densrefi na den gebod fu Mi.

⁷ Un no mus kari a nen fu MASRA, un Gado, fu soso, bika MASRA no o libi a sma dati fu soso tu.

⁸ Un memre taki a sabatdei na wan spesrutu dei.

⁹ Siksi dei de fu wroko, fu un du ala sani san un abi fu du.

¹⁰ Ma a di fu seibi dei na a sabatdei fu MASRA, un Gado. A dei dati un no mus wroko. No unu, no den manpikin fu unu, no den umapikin fu unu, no den man nanga uma di e wroko gi unu, no den meti fu unu èn no den doroseisma di e libi ini a kondre fu unu.

¹¹ Bika na ini siksi dei MASRA meki heimel nanga grontapu, a se nanga ala den sani di de ini den, dan A rostu tapu a di fu seibi dei. Dat' meki MASRA blesi a sabatdei dan A poti en leki wan spesrutu dei.

¹² Lespeki un m'ma nanga un p'pa, fu un kan libi langa na ini a kondre di MASRA, un Gado, o gi unu.

¹³ No kiri.

¹⁴ No huru.

¹⁵ No fufuru.

¹⁶ No lei gi wan trawan fesi krutubakra.

¹⁷ No abi bigi ai tapu a oso fu wan trawan. No abi bigi ai tapu a frow fu wan trawan, tapu den man nanga uma di e wroko gi en, tapu en kaw, en buriki noso iniwan sani san na fu wan trawan.”

¹⁸ A heri folku ben yere fa a dondru ben e bari èn den ben si fa faya ben e koti na loktu. Den ben yere a babari tu fu a tutu èn den ben si fa a bergi ben e puru smoko. Di den sma si den sani disi den ben e frede, dan den tan tnapu fara.

¹⁹ Dan den taigi Moses taki: “Taki nanga wi, wi sa arki. Ma no meki Gado taki nanga wi, noso wi o dede.”

²⁰ Ne Moses piki den taki: “No frede, bika Gado kon fu luku san un o du, fu un kan abi lespeki gi En, fu un no sondu.”

²¹ Den sma ben tan tnapu fara, ma Moses ben go moro krosbei fu a dungru wolku ini san Gado ben de.

²² Dan MASRA taigi Moses taki: “Disi yu mus taigi den Israelitisma: ‘Un si fa Mi taki nanga unu kmoto fu heimel.

²³ Fu dat'ede un no mus dini no wan tra gado boiti Mi. No meki no wan solfru noso gowtu gado.

²⁴ Wan altari fu santi un mus meki gi Mi. Tapu a altari disi un mus srakti den skapu, krabita nanga kaw di un o bron leki ofrandi gi Mi èn di un o tyari leki freide-ofrandi gi Mi. Ala presi pe Mi taigi unu fu un anbegi Mi, Mi sa kon èn blesi unu.

²⁵ Efu un meki wan altari fu ston gi Mi, un no mus meki en nanga ston di un kapu. Bika efu un kap'kapu en nanga wrokosani, dan sowan ston no bun moro fu meki wan altari gi Mi.

²⁶ A altari no mus abi trapu tu fu kren go na loktu noso sma kan si un syenpresi.’ ”