Eksodus 17 - Sranan Tongo Bible 2016

¹ Baka dati a heri folku fu den Israelitisma hari kmoto fu a sabana fu Sin. Den ben e hari fu a wan presi go na a trawan, pe MASRA ben taigi den fu go. Dan den meki den kampu na Refidim. Ma drape no ben abi watra fu a folku dringi.

² Ne a folku bigin meki trobi nanga Moses. Den taigi en taki: “Gi wi watra fu dringi.” Ma Moses taigi den taki: “Fu sanede un e meki trobi nanga mi? Fu sanede un wan luku san MASRA o du?”

³ Ma watra ben e kiri a folku. Den ben e knoru gi Moses taki: “San meki yu tyari un kmoto fu Egipte? Fu meki watra kiri wi, den pikin nanga den meti fu wi, te un dede?”

⁴ Ne Moses begi MASRA trangatranga. A taki: “San mi mus du nanga a folku disi? Dyonsro den o fringi ston naki mi ete?”

⁵ Dan MASRA taigi Moses taki: “Teki wantu fu den fesiman fu Israel, dan un e hari go na fesi fu a folku. Yu mus hori a tiki ini yu anu tu nanga san yu ben naki tapu a watra fu a Nijl-liba.

⁶ Arki, Mi o tnapu tapu a bergiston na Horeb. Yu mus naki tapu a bergiston dan watra sa kmoto na ini, fu a folku dringi.” Dan Moses du en leti fesi den fesiman fu Israel.

⁷ A kari a presi dati Masa nanga Meriba fu a krutu di den Israelitisma ben krutu èn fu di den ben wan luku san MASRA ben o du fu aksi taki: “MASRA de na wi mindri trutru?”

Den Amalekitisma kon feti nanga den Israelitisma

⁸ Dan a folku fu den Amalekitisma kon feti nanga Israel na Refidim.

⁹ Ne Moses taigi Yosua taki: “Teki wantu man fu go feti nanga den Amalekitisma. Tamara mi sa tnapu tapu a bergi nanga a tiki fu Gado ini mi anu.”

¹⁰ Yosua du san Moses taigi en, èn a go feti nanga den Amalekitisma. A pisten dati Moses, Aaron nanga Hur ben kren go tapu a bergi.

¹¹ Te Moses ben opo en anu, Israel ben e wini a strei. Ma te a ben saka en anu den Amalekitisma ben e wini.

¹² Di den anu fu Moses kon weri, den poti wan ston gi en fu a ben kan sidon. Dan Aaron nanga Hur go tnapu na en sei fu yepi en hori den anu fu en na loktu te leki son ben e bigin saka.

¹³ Na so Yosua wini a feti nanga den Amalekitisma.

¹⁴ Dan MASRA taigi Moses taki: “Yu mus skrifi disi ini wan buku fu den bakapikin fu unu kon sabi. Yu mus taigi Yosua tu taki a mus tan memre taki Mi sa figi Amalek kmoto fu grontapu. Sma no sa memre den noiti moro.”

¹⁵ Dan Moses meki wan altari dan a kari en: MASRA na a fraga di e go na wi fesi.

¹⁶ A taki: “Amalek opo en kofu gi MASRA. Dat' meki MASRA sa feti nanga Amalek fu têgo.”