Eksodus 14 - Sranan Tongo Bible 2016

¹ Dan MASRA taigi Moses taki:

² “Taigi den sma fu Israel taki den mus drai go baka go meki den kampu na fesi Pi-Hakirot, mindri Migdol nanga a Se. Un mus meki a kampu leti na abrasei fu Baal-Sefon na a Se.

³ Dan Farao o prakseri taki: ‘Den lasi pasi na ini a sabana. Den no sabi fa fu kmoto ini a sabana.’

⁴ Mi sa meki Farao tranga en ati fu a teki na un baka. Mi sa kisi bigi nen te Mi kiri Farao nanga a heri legre fu en. Dan de sma fu Egipte sa sabi taki Mi na MASRA.” Dan den Israelitisma du so tu.

⁵ Di den taigi a kownu fu Egipte taki a pipel lowe gwe, en nanga den knekti fu en kenki den prakseri. Den taki: “San wi du? Fu sanede wi meki den Israelitisma gwe? Now wi no abi srafu moro.”

⁶ Ne a seti en fetiwagi dan a teki den man fu en nanga en.

⁷ A teki siksi hondro fu den moro bun fetiwagi nanga ala tra fetiwagi fu Egipte. Ala wagi ben abi wan ofisiri.

⁸ Na so MASRA ben meki Farao, a kownu fu Egipte, tranga en ati fu a go na den Israelitisma baka. Ma den sma fu Israel ben e go sondro frede moro fara.

⁹ A legre fu Egipte nanga ala den wagi fu Farao, den srudati di ben e sidon tapu asi nanga den srudati di ben e waka, hari go na den Israelitisma baka. Dan den kon miti den na Pi-Hakirot, abrasei fu Baal-Sefon, pe den Israelitisma ben meki den kampu na a se.

¹⁰ Di Farao ben kon moro krosbei den Israelitisma opo den ede luku, dan den si taki den sma fu Egipte ben e kon na den baka. Ne den bigin frede dan den bigin begi trangatranga fu MASRA yepi den.

¹¹ Den taigi Moses taki: “Kande nofo berpe no ben de na Egipte. Dat' meki yu tyari wi kon fu un dede ini a sabana. Fa yu ben kan du sowan sani fu tyari wi kmoto fu Egipte?

¹² Wi ben taigi yu na ini Egipte kba taki: ‘Libi wi meki wi dini den sma fu Egipte. Bika a moro bun gi wi fu wi dini den sma fu Egipte dan fu dede na ini a sabana.’ ”

¹³ Ma Moses piki a pipel taki: “No frede. Un hori doro dan un o si tide fa MASRA o yepi unu. Bika den sma fu Egipte di un e si tide, un no o si noiti moro.

¹⁴ MASRA o feti a feti gi unu. Unsrefi no abi fu du noti.”

¹⁵ Dan MASRA aksi Moses taki: “Fu sanede yu e bari kari Mi so? Taigi den sma fu Israel fu den broko a kampu.

¹⁶ Yu mus opo yu anu nanga a wakatiki, dan yu e langa yu anu go na a se fu prati a se na tu. Dan den sma fu Israel o man abra a se tapu drei gron.

¹⁷ Ma arki, na Mi o meki den sma fu Egipte tranga den ati fu den tan kon na un baka. Dan Mi o kisi bigi nen fu di Mi o kiri Farao nanga a heri legre fu en, den srudati di e tyari den fetiwagi nanga den srudati di e sidon tapu asi.

¹⁸ Dan den sma fu Egipte sa kon sabi taki Mi na MASRA, fu di Mi o kisi bigi nen fu di Mi o kiri Farao, den srudati di e tyari den fetiwagi fu en nanga den srudati di e sidon tapu asi.”

¹⁹ Dan a Engel fu Gado, di ben e go na fesi fu den Israelitisma, kmoto fu en presi go na den baka. A wolku, di ben gersi wan bigi postu, kmoto fu en presi na fes'sei tu go tnapu na den baka.

²⁰ Tapu a fasi disi a ben de mindri a legre fu Egipte nanga di fu den Israelitisma. A wolku ben dungru na a wan sei ma na a tra sei a ben e krin a neti. So den tu legre no ben man miti densrefi a heri neti dati.

²¹ Dan Moses langa en anu abra a se. A heri neti dati MASRA meki wan tranga winti wai kmoto fu a oostsei, di ben e wai a watra fu a se gwe nanga baka, te leki a se ben prati èn drei gron ben de fu si.

²² So den Israelitisma ben man abra a se tapu drei gron. Na den let'sei nanga den kruktusei a watra ben tan tnapu leki wan skotu.

²³ Dan den sma fu Egipte go na den baka ini a se. Ala den asi fu Farao, den wagi nanga den man tapu den asi.

²⁴ Musudei mamanten MASRA luku fu a wolku nanga fu a faya di ben gersi wan bigi postu, go na a legre fu Egipte dan A tyari bruya na den mindri.

²⁵ A meki taki den wiel fu den wagi ben e grati gwe. So den no ben man go esi na fesi. Ne den sma fu Egipte taki: “Kon meki wi lowe gi den Israelitisma bika MASRA e feti nanga wi gi den.”

²⁶ Dan MASRA taigi Moses taki: “Langa yu anu go na a se fu a watra wasi kon baka abra den sma fu Egipte, den wagi fu den nanga den man tapu den asi.”

²⁷ Ne Moses langa en anu go na a se. Di dei bigin broko a watra fu a se wasi kon baka leki fa a ben gwenti lon. Den sma fu Egipte ben e pruberi fu lowe, ma a watra ben e wasi kon na den tapu. Na so MASRA figi den sma fu Egipte go poti na ini a dipi fu se.

²⁸ A watra ben wasi kon baka èn a tapu den wagi nanga den man tapu asi fu a legre fu Farao, di ben hari kon na baka den Israelitisma ini a se. No wan fu den no tan na libi.

²⁹ Ma den sma fu Israel abra a se tapu drei gron. Na den let'sei nanga den kruktusei a watra ben tan tnapu leki wan skotu.

³⁰ Na so MASRA ferlusu den Israelitisma a dei dati puru ini a makti fu den sma fu Egipte. Den Israelitisma ben si fa den dedeskin fu den sma fu Egipte ben didon na syoro.

³¹ Ne den sma fu Israel si a bigi wroko di MASRA du nanga Egipte. A pipel ben abi bigi lespeki gi MASRA èn den ben e fertrow MASRA nanga en knekti Moses.