Eksodus 12 - Sranan Tongo Bible 2016

A Paskafesa

¹ MASRA taigi Moses nanga Aaron ini Egipte taki:

² “Bigin fu now a mun disi sa de a fosi mun fu a yari gi unu.

³ Taigi ala sma fu Israel taki: ‘Tapu a di fu tin dei fu a mun disi, ala mansma fu ibri famiri mus teki wan skapu noso wan krabita gi en oso.

⁴ Efu a meti furu tumsi gi den sma fu wan oso, den kan nyan en makandra nanga sma fu wan tra oso. Ma den mus sorgu taki ala sma kisi nofo.

⁵ A skapu noso a krabita di den o teki mus de wan manwan fu wan yari. Noti no mus mankeri en.

⁶ Den mus poti en aparti te leki a di fu tin-na-fo dei fu a mun disi. Dan a heri folku fu Israel mus srakti den meti te son e saka.

⁷ Ini ala oso pe a meti o nyan den sma mus teki fu a brudu fu a meti dan den lobi en gi den tu postu fu a doro nanga gi a postu tapusei fu a doro.

⁸ A srefi neti dati den mus nyan a meti. Den mus losi en tapu wan faya dan den nyan en nanga brede di meki sondro dyesi èn nanga bita spesrei.

⁹ A meti no mus lala èn den no mus bori ini watra tu. A meti mus losi tapu wan faya nanga a heri ede, den bowtu nanga a inibere.

¹⁰ Noti fu en mus tan te tamara. San tan te tamara den mus bron.

¹¹ So den mus nyan en: Den mus nyan en es'esi nanga den susu na den futu, den wakatiki na den anu èn den mus weri krosi fu teki waka. Na wan Paska gi MASRA.

¹² Bika tide neti Mi o psa ini a kondre Egipte, dan Mi o kiri ala den fosi pikin fu libisma nanga meti. Mi MASRA, o krutu ala den gado fu Egipte.

¹³ A brudu na den ososkin na wan marki pe unu e libi. Te Mi si a brudu, Mi o psa. Dan so un no o fadon ini a hebi strafu nanga san Mi o strafu Egipte.

¹⁴ A dei disi mus de wan dei di un mus tan memre. Un mus teki en leki wan fesadei fu MASRA. Gi den pikin fu unu di e kon na baka a mus de wan sani di den mus tan du.

¹⁵ Seibi dei langa un sa nyan brede di meki sondro dyesi. Tapu a fosi dei kba un mus puru a dyesi ini un oso. Bika a sma di nyan wan sani di meki nanga dyesi tapu a fosi dei go miti a di fu seibi dei, den no mus si moro leki wan sma fu Israel.

¹⁶ Tapu a fosi dei nanga tapu a di fu seibi dei un mus hori wan santa konmakandra. No wan wroko mus du a dei dati. Soso den sani san un o nyan un kan meki klari.

¹⁷ Un mus tan memre den dei disi, pe un e nyan brede di meki sondro dyesi, leki wan fesadei. Bika tapu a dei disi Mi o puru unu, den lo fu Israel, na ini Egipte. Dat' meki gi ala den pikin fu unu di e kon na baka a mus de wan sani di den e tan du.

¹⁸ Ini a fosi mun, bigin na a mofoneti fu a tin-na-fo dei, un sa nyan brede di meki sondro dyesi. Un sa nyan en te go miti a mofoneti fu a di fu tutenti-na-wan dei.

¹⁹ Seibi dei langa dyesi no mus de fu feni ini un oso. Bika a sma di nyan wan sani di meki nanga dyesi, den no mus si moro leki wan sma fu Israel. A no abi trobi efu na wan doroseisma noso wan sma di gebore leki wan sma fu Israel.

²⁰ Un no sa nyan noti di meki nanga dyesi. Ini ala oso pe un e tan un sa nyan brede di meki sondro dyesi.’ ”

Moses e gi a boskopu doro na den fesiman fu Israel

²¹ Dan Moses seni kari ala den fesiman fu Israel. A taigi den taki: “Un gwe go teki skapu nanga krabita kon gi un famiri fu un srakti gi a Paska.

²² Baka dati un mus teki wan bosu hisopwiwiri. Un mus dopu en ini a skarki nanga a brudu, dan un e lobi en gi a postu tapusei fu a doro nanga den tu postu fu a doro. Dan no wan fu unu mus go na dorosei moro te a tamara mamanten.

²³ Bika MASRA sa psa na ini Egipte fu strafu a kondre. Ma te MASRA si a brudu na a postu tapusei fu a doro nanga den tu postu fu a doro, A sa psa a doro dati. A no sa meki a wan di o strafu kon ini un oso fu kiri unu tu.

²⁴ Un mus tan du den sani disi. Unu nanga den pikin fu unu.

²⁵ Un mus tan du a sani disi te un doro ini a kondre di MASRA o gi unu, leki fa A ben pramisi.

²⁶ Te den pikin fu unu aksi un taki: ‘Fu sanede wi e du a sani disi?’

²⁷ Dan un mus piki den taki: ‘Na wan Paska-ofrandi gi MASRA. Bika di wi ben de na Egipte, MASRA ben strafu den sma fu Egipte, ma A ben waka psa den oso fu den Israelitisma.’ ” Dan a folku kindi èn den gi Gado grani.

²⁸ Baka dati den sma fu Israel go du den sani leki fa MASRA ben taigi Moses nanga Aaron taki den mus du en.

A di fu tin strafu: Ala fosi pikin e dede

²⁹ Mindrineti MASRA kiri ala fosi pikin na ini a kondre Egipte. Bigin na a fosi manpikin fu Farao di ben o teki a presi fu en p'pa leki kownu, te go miti a fosi manpikin fu a strafuman di ben de na dungru-oso. A kiri ala den fosi pikin fu den meti tu.

³⁰ Farao, den knekti fu en nanga ala sma fu Egipte ben opo a neti dati. Krei ben e bari ini Egipte. Bika no wan oso no ben de pe wan sma no ben dede.

³¹ A neti dati srefi Farao seni kari Moses nanga Aaron kon. A taigi den taki: “Un meki unsrefi klari. Un nanga den Israelitisma kan kmoto gwe na mindri fu mi folku. Un gwe go dini MASRA leki fa un taki.

³² Un kan teki un skapu, un krabita nanga un kaw tu, leki fa un aksi dan un gwe. Ma un blesi mi tu.”

³³ Den sma fu Egipte ben begi a pipel tangitangi tu fu gwe libi a kondre so esi leki den man. Den ben taki: “Noso un alamala o dede.”

³⁴ Den Israelitisma teki a blon di den ben masi kba, ma gi san den no ben poti dyesi ete. Den poti en ini den koba pe den e masi blon, dan den tai den ini krosi anga abra den skowru.

³⁵ Den Israelitisma du tu san Moses nanga Aaron ben taigi den. Den aksi den sma fu Egipte solfru sani, gowtu sani nanga krosi.

³⁶ MASRA ben meki taki den sma fu Egipte ben feni en bun san a pipel ben aksi den. So den gi den san den ben aksi. Tapu a fasi disi den ben puru gudu na den sma fu Egipte anu.

³⁷ Baka dati den Israelitisma kmoto fu Raamses go na Sukot. Den ben de sowan siksi hondro dusun man di ben e waka nanga futu. Den pikin no ben teri.

³⁸ Wan lo tra sma di no ben de Israelitisma gwe nanga den tu. Den ben e tyari wan bigi grupu skapu, krabita nanga kaw gwe tu.

³⁹ Den baka kuku di ben meki sondro dyesi, fu a blon di den ben tyari kmoto fu Egipte. A blon disi ben masi kba ma den no ben poti dyesi ete gi en fu di den no ben abi ten moro. Bika den sma ben yagi den puru ini Egipte èn den no ben abi ten fu teki nyanyan gi ondropasi.

⁴⁰ Den Israelitisma tan fo hondro nanga dritenti yari ini Egipte.

⁴¹ Tapu dati, di den ben de fo hondro nanga dritenti yari ini a kondre, ala den lo fu a pipel MASRA kmoto ini a kondre Egipte.

⁴² A ben de wan neti pe MASRA ben e hori wakti gi den fu tyari den kmoto ini Egipte. Dat' meki den Israelitisma nanga ala den bakapikin fu den e hori wakti a neti disi fu gi MASRA grani.

Den sani di mus du na a Paskafesa

⁴³ MASRA taigi Moses nanga Aaron taki: “Disi na den sani di un mus tan du na a Paskanyanyan: No wan sma di no de wan Israelitisma mus nyan fu en.

⁴⁴ Ala srafu di wan sma bai nanga moni kan nyan fu en, baka te a besnei.

⁴⁵ Wan doroseisma di e tan nanga yu no mus nyan fu en. Sosrefi wan knekti di yu yuru fu wroko gi yu.

⁴⁶ A paskanyanyan mus nyan ini a oso pe den meki en klari. Noti fu a meti mus go na dorosei. No wan bonyo fu en un mus broko.

⁴⁷ Ala den Israelitisma mus hori a fesa disi.

⁴⁸ Efu wan doroseisma di e tan na yu wani nyan a Paska fu MASRA, dan en nanga ala mansma fu en oso mus besnei. Baka dati a kan nyan a Paska. Dan den sa si en leki wan sma fu Israel. Ma no wan sma di no besnei mus nyan fu a Paska.

⁴⁹ A srefi wèt sa de gi den sma di gebore leki sma fu Israel nanga gi doroseisma di e tan na un mindri.”

⁵⁰ Dan den Israelitisma du san MASRA taigi Moses nanga Aaron taki den mus du.

⁵¹ A srefi dei dati MASRA tyari ala den lo fu den Israelitisma kmoto na ini Egipte.