Efese 6 - Sranan Tongo Bible 2016

¹ Pikin, fu Masra ede un mus arki san un m'ma nanga p'pa e taki. Bika na so a fiti.

² “Un mus lespeki un p'pa nanga un m'ma.” Disi na a fosi komanderi di abi wan pramisi. A pramisi taki:

³ “Sani sa go bun nanga yu, èn yu sa libi langa na grontapu.”

⁴ P'pa, un no mus du sani di e gi den pikin atibron. Ma te un e kweki den, un mus leri den fu du san Masra wani, èn un mus warskow den leki fa En wani.

Den srafu nanga den masra fu den

⁵ Srafu, nanga ala lespeki èn sakafasi, un mus du san den masra fu unu dyaso na grontapu e taki. Un mus du en nanga wan krin ati, leki fa un ben o du en gi Kristus.

⁶ Un no mus du dati fu sma ai, fu di un wani kisi grani fu den. Ma nanga un heri ati un mus du san Gado wani, leki srafu di de fu Kristus.

⁷ Un mus du un wroko nanga prisiri leki na gi Masra un e du en, èn no gi libisma.

⁸ Bika un sabi taki fu ala den bun di wan sma du, Masra e pai en baka. A no abi trobi efu yu de srafu noso efu yu na fri sma.

⁹ Un di abi srafu mus libi tapu a srefi fasi nanga den. No taigi den taki un o du sani nanga den. Bika un sabi taki a Masra fu unu nanga den, de na ini heimel. Èn ala sma na a srefi gi En.

Den fetisani fu den bribisma

¹⁰ Moro fara mi wani taigi unu tak' un mus teki un krakti ini a bigi makti fu Masra.

¹¹ Un mus teki ala den fetisani san Gado gi unu, fu un kan tnapu tranga. Dan didibri no o man kori unu nanga den triki fu en.

¹² Bika a feti san wi e feti, no de wan feti nanga libisma. Ma un mus feti nanga den yeye di de edeman, den yeye di abi makti, den yeye di e basi a dungru grontapu disi, èn nanga den tra takruyeye na loktu.

¹³ Dat' meki un mus weri ala den fetisani san Gado gi unu, fu un kan kaka futu te den takru dei doro. Dan te un kba du ala sani san de fanowdu, un o man tan tnapu.

¹⁴ Seti yusrefi! Teki san tru èn tai en leki wan banti na yu mindribere. Du san bun ini Gado ai, dan dati o de leki wan isri bosroko san e tapu yu borsu.

¹⁵ Yu mus tnapu klar'klari fu go panya a bun nyunsu fu freide. Dati mus de leki wan susu na yu futu.

¹⁶ Boiti den sani disi, yu mus bribi tu. Èn yu mus hori a bribi disi fesi yu skin fu tapu den faya peiri san didibri e sutu kon na yu tapu.

¹⁷ A ferlusu di Gado ferlusu yu mus de leki wan fet'musu tapu yu ede. Èn teki a fet'owru fu a Santa Yeye ini yu anu: dati na a wortu fu Gado.

¹⁸ Tan begi èn dyeme fesi Gado na ini ala okasi di yu kisi èn soleki fa a Yeye e tiri yu. De na ai, èn no tapu fu dyeme fesi Gado gi ala den sma fu Gado.

¹⁹ Begi tu gi mi, taki Gado sa gi mi den yoisti wortu fu taki tapu wan fri fasi abra a kibritori fu a bun nyunsu.

²⁰ Na fu di mi e panya a boskopu gi Masra meki den bui mi. Te un e begi dan mi sa man taki tapu wan fri fasi, soleki fa a musu.

Odi

²¹ Tikikus sa taigi un ala sani fu meki un kon sabi fa a e go nanga mi. A de wan lobi brada èn wan wrokoman fu Masra di un kan fertrow.

²² Na fu dat'ede meki mi seni en kon, fu a ferteri unu fa a e go nanga wi èn fu a gi un dek'ati.

²³ Brada nanga sisa, meki Gado a P'pa, nanga Masra Yesus Kristus, gi unu freide, lobi nanga bribi.

²⁴ Meki a bun-ati fu Gado de nanga ala sma di lobi wi Masra Yesus Kristus nanga lobi di no e kba.