லேவியராகமம் 5 - Saurashtra Bible (BSI)

களை கெரெ பாபுனுகெ பரிஹார பலின்

¹ ஒண்டெதெனொ கெரெ பாபுக் ஸீதி, சலெஸ்தெ காயொ மெனி களையெ பல்சொ மெளி தெகொ விரோத்கன் ஸாக்ஷி ஸங்குனாஸ்தக் ஜ²கி தொவெதி தெனொ பாப் கெரெஸ்தெனொ. தெகொ தண்டன தீ³ ஹொனொ.

² அஸுத்த ஜீவுனும் கோனதி ஒண்டெ மொரி ர:த, தெல்லெ மூகுக் ஒண்டெதெனொ களானாஸ்தக் ஹாத் தெரி ரி:யெதி, தெனொ மொர் ஸந்நிதிக் அவஹோனா. காமெனெதி தெனொ அண்டு லகெ அபராதி.

³ திஸோஸ் அண்டு லகெ ஒண்டெ மெனிகுக்தீ, அஸுத்த வஸ்துனுக்தீ, கோன்தி களானாஸ்தக் ஹாத் தெர்திகி, தெனொ அண்டுக் ஹாத் தெரெஸ்தெ தெக பல்சொ களை ரி:யெத் மெளி தெனொ அபராதீஸ்.

⁴ ஒண்டெதெனொ சொக்கட்யெகீ ஹீன்யெகீ மெனி களைளுனாஸ்தக் அவ்ஸரும் ஸெத்து கெர்திகி, பல்சொ களானாஸ்தக் அவ்ஸரும் ஸெத்து கெர்திகியொ மெனி மெனெத் மெளி தெனொ அபராதீஸ்.

⁵ இஸான் கார்யமுனும் சூக் கெரெஸ்தெனொ அபுல் சூகுக் ஒப்புல்னொ.

⁶ தெனொ கெரெ பாபுக் அபராத்கன் ஸெளி பெண்டுனும்தீ, மெ:டி பெண்டுனும்தீ ஒண்டெ பெய்ல்-பெண்டுக் பகவான்கெ ஸந்நிதிக் கள்ளி அவ்னொ. தெகொ பாபுக் ப்ராயஸித்தம்கன் ப⁴ட்டர் தெல்லெ பெண்டுக் பலி தேய். தெப்பொ பகவான் தெல்லெ மெனிகுகெ பாபுக் க்ஷமொ கெரன்.

⁷ ஹொயெதி பெண்டு க²டஸ்தக் தெகொஜோள் ஹன்னவ் நீ:மெனெதி, தெனொ கெரெ பாபுக் அபராத்கன் தீ³ ராணு கவ்து³னுக்தீ, தீ³ கவ்து³ பில்லானுக்தீ கள்ளி அவாய். தெமாம் ஒண்டெ பக்ஷிக் பாபு பரிஹார பலிகன், அங்குண்டெ பக்ஷிக் தகன பலிகன் தெ³னொ.

⁸ தெனொ தெல்லெ பக்ஷினுக் ப⁴ட்டர்ஜோள் கள்ளி ஜனொ. தெப்பொ பாபுக் பரிஹார்கன் தெனி பொடரிய பக்ஷிகெ கெ³ளாக் ப⁴ட்டர் முல்லொகன் முடவி, தொஸ்கொ செக்குனாஸ்தக் தொவ்துனொ.

⁹ பல்சொ தெல்லெ பக்ஷிகெ ரெகதுக் ஹெடி பலி பீடமுக் சுட்டுர் சொல்லுனொ; உராவ் ஸேஸ்தெ ரெகதுக் பலி பீடமு கா²ல் லுச்சுனொ. எல்லேஸ் பாபு பரிஹார பலி.

¹⁰ தெக பல்சொ தகன பலிகெ நியதின்தானுக் தி³வ பக்ஷிக் மெளி ப⁴ட்டர்ஜோள் ஸமர்பண கெரய். தெல்லெ மெனிகுகெ பாபுக் ப்ராயஸித்தம்கன் ப⁴ட்டர் தெல்லெ பக்ஷிக் பலி தேய். பகவான் தெகொ பாபுக் க்ஷமொ கெரன்.

¹¹ ஹொயெதி தீ³ ராணு கவ்து³னுக்தீ, தீ³ கவ்து³ பில்லானுக்தீ க²டஸ்தக் தெகொஜோள் ஹன்னவ் நீ:மெனெதி, தெனொ அபுல் பாபுக் பரிஹார்கன் ஏப்பா மெனரிய ஒண்டெ அட்டா³ம் தெ³ஸ்ஸும் ஒண்டெ வடொ நி:னாவ் பீட் கள்ளி அவ்னொ. ஹொயெதி தெல்லெ பீட் ஹொல்லெ தேல்தீ, வஸ்னா வஸ்துனுக்தீ ஸொடஹோனா. காமெனெதி எல்யெ பாபுக் பரிஹார்கன் தெனி பொடரிய பலி.

¹² பல்சொ தெனொ தெல்லெ பீடுக் ப⁴ட்டர்ஜோள் கள்ளி ஜனொ. தெல்லெ பீட் பூரா பகவானுக் ஸமர்பண மெனி களடஸ்தக் ப⁴ட்டர் தெமாம்ரீ: ஒண்டெ மூட் பீடுக் வரி பலி பீடமும் தகி ஜெள்னொ. பாபுக் பரிஹார்கன் துர்பள்னு தேரிய பலி எல்லேஸ்.

¹³ இஸனி மென்க்யானுகெ பாபுனுக் ப்ராயஸித்தம்கன் ப⁴ட்டர் பலி தேஸ்தவேளு பகவான் தெங்கொ பாபுனுக் க்ஷமொ கெரன். தான்ய பலினும் உராவ் ஸேஸ்தெ பூரா ப⁴ட்டருக் பாத்யம் ஹோரியஸோன் எமாம் உராவ் ஸேஸ்தெ பூரா ப⁴ட்டருக் பாத்யம் ஹோய்.

சூகு பரிஹார பலி

¹⁴ பகவான் மோசேஜோள்,

¹⁵ ஒண்டெதெனொ பகவான்கெ நியதின்தானுக் சல்த கெல்லுனாஸ்தக் பரிஸுத்த டேராகெ வஸ்துனுக் அண்டு கெர்திகியெதி, தெனொ அபுல் சூகுக் பரிஹார்கன் அங்கஹீன் நீ:ஸ்த ஒண்டெ சொக்கட் தல்லொ - பெண்டுக் பெல்லி அவ்னொ. தெல்லெ பெண்டுகெ மோல் பரிஸுத்த டேராம் உபயோக் கெரரிய சேக்கல் மெனரிய ஜோகு லெ:க்காதானுக் ர:னொ. (யாத் 30:13)

¹⁶ தீநா:ஸ்தக் தெல்லெ பெண்டுகெ மோல் கித்ககீ தெல்லெ லெ:க்காம் பாஞ்சும் ஒண்டெ வடொ ஹன்னவ் மெளி அபராத்கன் ப⁴ட்டர்ஜோள் தெ³னொ. பல்சொ தெல்லெ மெனிகுகெ சூகுக் ப்ராயஸித்தம்கன் ப⁴ட்டர் தெல்லெ பெண்டுக் பலி தேய். பகவான் தெகொ சூகுக் க்ஷமொ கெரன்.

¹⁷ ஒண்டெதெனொ பகவான்கெ ஆக்³ஞானுக் ஸெர்ககன் களைளுனாஸ்தக் ஹெதார்துகன் சூக் கெர்திகியெதி தெனொ மெளி அபராதீஸ்.

¹⁸ திஸான் சூகுன் க்ஷமொ கெர்னி பொடஸ்தக் ந்யமுன் கெர்னி பொடெ லெ:க்காதானுக் அங்கஹீன் நீ:ஸ்த ஒண்டெ தல்லொ-பெண்டுக் பெல்லி அவி ப⁴ட்டர்ஜோள் தெ³னொ. தெல்லெ மெனிகுகெ சூகுக் ப்ராயஸித்தம்கன் ப⁴ட்டர் தெல்லெ பெண்டுக் பலி தேய். பகவான் தெகொ சூகுக் க்ஷமொ கெரன்.

¹⁹ களானாஸ்தக் சூக் கெரி ரி:யெத் மெளி தெனொ பகவான்கெ நியதினுக் விரோத்கன் சல்த கெல்லியெஸ்தெனோஸ். தேஹாலிம் தெனொ அபுல் சூகுக் பரிஹார்கன் பலி தெ³னொ.