MARK 3 - AMÜSA BAIBEL (BSI)

Akheh Sücho Nyitsarü Khüdu

¹ Hütsüpü Jisu-nü Sinagog lang wücho, hütsüla akheh sücho nyüh khüdu licho.

² Hütsüla nyitsarü khürünü Jisu mülangjünyo; abinü Sabath nyümong kyangjü a mahnangpü dee khengyengnü licho.

³ Jisu-nü nyitsarüba te tsü yocho, “Hila kürung.”

⁴ Hütsüpü abinü arüh te tsingdhingcho, “Ihsa yuzengnü Sabath nyümong tu nguchinung müla liro? Rükunung a lerohpehjünung? Nyitsarü akang khüdu khümchonung a mahkhang hütsü changjünung?” Ta arühnü tusü müyocho.

⁵ Jisu-nü arüh dhingde wahcho, ta arüh hongzicho nengdang müinü lümcho. Hütsüpü abinü nyitsarüba te tsü yocho, “Nü kheh müyungchüng.” Abinü hütsü müyungchücho, ko hütsü tsapecho.

⁶ Hütsünü Farisirü-nü khüdupinü amübükuh pehjüpü Herod monoti te shirüta, arühnü Jisu süsohnung rah külüpcho.

Kihdi Müshüm Amülung Khüdu

⁷ Jisu ko abi monoti Galil kihdi lang wücho, ko amülung amülah abi khanglang iiwücho.

⁸ Arüh tsü Galil lanü, Judea lanü, Jerusalem lanü ko Idumea lanü, ko Jordan khüulangnü ko Tyre ko Sidon mükang lanü. Hiri atümung tsü Jisu-nü nguchicho yuchi abi yang rocho.

⁹ Amülung tsü dirachonü abi münyingpehsohnung kihtang khüdu rungnümjüngpü amonoti te yocho.

¹⁰ Abinü adrong kyangjüko, ko füdhsarü atümungnü abi chah thahpünung nyingta abi yanglang rocho.

¹¹ Khodederü amünyi nbü kehrünü abi ngurünang, ajingte khülutsu züde yocho “Nüh Tsingrangba Tsurü!”

¹² Jisu-nü abi tsü sünang sütesü tüyo pü amünyi nbüti te khahkhah yuzengjücho.

Riwürü Dhüreanyüh Throchehcho

¹³ Hütsüpü Jisu-nü azong khüdu chah tuwüpü abinü khyünyücho nyitsarü apu yanglang dsicho. Arühnü abi yanglang rocho,

¹⁴ ko abinü dhüreanyüh throchehcho, ko arüh te riwürüti pü dsicho. Abinü arüh te yocho, “Ihnü nührü Ite linung throchehre, nührü thsingyunungsü wüsohnung,

¹⁵ ko nührünü amünyi nbü iipehnung zii kehnung.”

¹⁶ Abinü throchehcho dhüreanyüh tsü hiri: Simon (Jisu-nü Peter pü dsicho);

¹⁷ Jakob ko ani Johan, Zebede tsurüti (Jisu-nü arüh te Boarneges, adüzü, “Ningki zati pü dsicho”)

¹⁸ Andria, Filip, Bartholomeu, Mathi, Thomas, Alfaeus tsurü Jakob, Thadaeus, Simon suro müirü,

¹⁹ ko Judas Iskariot, sünü Jisu kihyochücho.

Jisu ko Beelzebul

²⁰ Hütsüpü Jisu-nü kulang wücho. Adesü amülung amülah shibülungchonü Jisu ko amonoti tsuyongnungsü bekhyah müngucho.

²¹ Khode kuh la lirünü hütsü yuchicho, abi dhingyehnung wücho, tunüo nyitsarütinü, “Abi mükyangle, pü yocho!”

²² Jerusalem lanü rorüh yuzeng dorü khürünü yocho, “Abi chah Beelzebul zehle, hiba hi motsing yola adiuba sünü abi khyang amünyi nbü iipehnung tase jüre.”

²³ Achotsü Jisu-nü arüh abi yanglang dsi arüh te yukitabanü chotacho: Satan-nü khüta satan iipehchehnung?

²⁴ Limih khüdu ajangjang changnahnü arüh khatakhang, hütsüba limih tsü khülunung.

²⁵ Kukhi khüdu ajangjang changnahnü arüh khatakhang hütsüba kukhi tsü khülunung.

²⁶ Hütsüta, satan yanglih tsü changnahkhang, kumütsüp khülunung ko changkapehnung.

²⁷ “Sünüsü rezeh nyitsarü tsü rah müyohpüde abi kuh rohphoh kohro hitsinung mükohre, ta rezehba tsü akhu rah yohpüpü du abi kuh lanü kengchonung kohnung.

²⁸ “Yutsatsa Ihnü nührü te yore, Nyitsarü münyiti ko Tsingrangba nyüm müchümükehcho apüm mülangpehjünung kohle.

²⁹ Ta sürünü Anbü Amüsa nyüm choro khodesü arüh mülang müpehjünung, tunüo abinü müchangkaba münyi shitpahko.”

³⁰ Jisu-nü hi yoba tsü, nyitsarü khürünü, “Abi chah amünyi nbü kehlepü yocho khu lile.”

Jisu Atpa ko Anirüti

³¹ Hütsüde Jisu atpa ko anirüti rocho. Arüh kuhbete yapü abi dsisohcho.

³² Amülung khüdu abi mükang pümcho, ko arühnü abi te yocho, “Dhing, nü tpa e nü nirüti nüh yangchi kuhbete yale.”

³³ Jisu-nü lalingcho, “Itpa süo? I nirüti sürüo?”

³⁴ Abinü abi mükang pümrü chah dhingnü yocho, “Dhing, hila Itpa ko I nirüti lile.

³⁵ Sünü Tsingrangba-nü abi khyang nguchisohnyüba nguchiro, abi tsü I jünirü ko Itpa lile.”