MARK 15 - AMÜSA BAIBEL (BSI)

Jisu Pilat Yang Norocho

¹ Nyajang bebü ayingtinü dhsüdhsa azibarü, yuzeng adorüti ko ashimükhong lümchung külüpcho. Arühnü ixilihnü Jisu xohcho ko Pilat khyang nowü jücho.

² Pilat-nü abi te tsingdhingcho, “Jihudarü yangthsaba tsü nüh ang?” Jisu-nü lalingcho, “Nühnü yoko.”

³ Bebü ayingtinü yuzi adrongnü Jisu mülangjücho,

⁴ hütsünü Pilat-nü abi te thali tsingdhingcho, “Nühnü mülalingnung mah-o? Arühnü mülangjüba tsü nyidhing!”

⁵ Adesü Jisu-nü tu mülalingcho ko Pilat nyemüyangcho.

Jisu Süsohnung Mülangjücho

⁶ Phungkhu Thsüti müipi arangyohrü yola khüdu müthehnung Pilat tase licho.

⁷ Hütsüde nyüh khüdu anengnü Barabbas akhangtikuh la anyümrü sürünü amülung yübütade nyitsarü müpsehcho, arüh yola licho.

⁸ Khode amülung shibülung Pilat te lede yah roh-i chingcho,

⁹ abinü arüh te yocho, “Nührünü Jihudarü yangthsaba müthehsohnyürü mah-o?”

¹⁰ Bebü ayingtinü Jisu tsü mükohdhingchonü abi khyang khakhuchüjüchoepü abinü müdhe licho.

¹¹ Ta bebü ayingtinü amülung tsü müjühpü, Pilat te, Barabbas uthring müthehng pü züdesohcho.

¹² Pilat-nü anyüpiu arüh te yocho, “Khanglü, Jihudarü yangthsaba chah tsü tu nguchisohnyüro?”

¹³ Arühnü züde yocho, “Abi hamkehng!”

¹⁴ Pilat-nü tsingdhingcho, “Abinü tu thsamehcho?” Ta arühnü alaa züdenü yocho, “Abi hamkehng!”

¹⁵ Pilat-nü amülung tsü künyangsohnyücho, hütsünü abinü Barabbas tsü müthehcho. Hütsüpü abinü Jisu tsü xüpnahsohcho ko hamkehsohnung khakhuchüjücho.

Rothsarütinü Jisu Münyüjücho

¹⁶ Rothsarütinü Jisu tsü yangthsaba kekhüm lang nozüducho ko amülung tsü müjang dsibülungcho.

¹⁷ Arühnü Jisu chah anyahrüm shü phakehjüpü zingshünü yangthsarü kuthri khüdu chehpü athah la thrijücho.

¹⁸ Hütsüpü arühnü abi khyang salüm jo yocho: “Jihudarü yangthsabong, kutsüp lieng!”

¹⁹ Arühnü janü athah la xüpcho, müjü müchokehjücho ko mükhoh thung abi te mükhukehcho.

²⁰ Khode arühnü müthsamünyükacho, arühnü anyahrüm shü tsü khohpehjüpü apu jengki thali khyülisohcho. Hütsüpü arühnü abi hamkehnung nücheh tsicho.

Jisu Hamkehcho

²¹ Langla nyüh khüdu anengnü Simon yanglangnü yangdi lang rochi mütohcho, ko rothsarütinü abi khyang Jisu khala khing dhisohcho. (Simon tsü Syrene lanü ko Alexander e Rufus nyüh au.)

²² Arühnü Jisu tsü Golgotha pü dsiba khüi adüzü, “Thahrü lih” chii norocho.

²³ Hütsüla arühnü abi khyang cikih te akha tungrütapü tinung müküpcho, ta abinü hütsü müyongjücho.

²⁴ Hütsüpü arühnü abi hamkehcho ko arüh yola abi jengki zii thsadhing changtacho.

²⁵ Anyangnyü, düku bekhyah koh arühnü abi hamkehcho.

²⁶ Abi mülangjüba müdhesohba tsü hita thrahcho: “JIHUDARÜ YANGTHSABA!”

²⁷ Arühnü Jisu yola afüashi khüdu tsalang ko khüdu fülilang hamkehcho.

²⁸ Hütsüta, “Abinü afüashi müngu tsü changtacho” pü yoba Amüsa yu tsü tikehsohcho.

²⁹ Alahkhurü nyitsarünü arüh ku ngah Jisu mükhimüngu yocho, “ Hai! Amübükuh thsangnyangpü hütsü nyümong asangla thsachehbong!

³⁰ Ade khala chah tsünü jürung ko nü jangjang khümchoung!”

³¹ Hütsüroh-i bebü ayingti, yuzeng adorütinü Jisu müthsamünyü khüdunü khüdu te yocho, “Abinü aparülü khümchopü, apulü mükhümchochehre!

³² Israelrü yangthsabong, Mesia tsü khala chahnü ade jürokhang, ihrünü abi chah yudsinung.” Ko abi yola hamkehrü anyüh tsünüsü Jisu mükhimüngucho.

Jisu Sücho

³³ Nyüthungla limih apümlang rehtseh asang mapehcho.

³⁴ Asang bekhyahla Jisu-nü yuva amülahnü züdecho, “Eloi, Eloi, lamasabakthani, khüi adüzü, I Tsingrang, I Tsingrang, tuepü nühnü Ih pehjüro?”

³⁵ Hütsüla lirü khürünü hütsü yuchi yocho, “Nyidhing, abi Elija dsichile!”

³⁶ Arüh yola nyüh khüdunü shang wünü, münuhsüp acikih la dhsangpü, tbütphü müle chah rahkehpü Jisu be la nyümjo yocho, “Ying! Khala chahnü abi nüchonung Elija ro a müronang!”

³⁷ Hütsüpü yuva amülah chüro Jisu sücho.

³⁸ Amübükuh la kitiba shü, athahlangnü alih chii anyüh kang rehrüpcho.

³⁹ Rothsarü anüchiba, sü khala yingte yacho, abinü Jisu khüta sücho hütsü ngucho. Abinü yocho, “Hiba nyitsarü hi yuje Tsingrangba Tsurü thsako!”

⁴⁰ Hütsüla khingkurü khürü ashulanü dhingyacho. Arüh yola Mary Magdalin, Jakob azaba e Josef nyüh atpa Mary, ko Salome zehnü licho.

⁴¹ Arühnü Jisu Galil la lide abi khanglang iiwücho ko trocho. Abi yola Jerusalem lang rocho aparü khingkurüsü adrong hütsüla licho.

Jisu Dhrürangcho

⁴² Nyüzeh rode Arimathia-rü Josef ro chihcho. Abi ashimükhongla nyitsarü atsa khüdu, abi Tsingrangba yanglih ronung yingrü khüdu thsacho.

⁴³ Hi arungnümba nyümong thsacho (Sabath nyümong bekhu), achotsü Josef-nü müci mülahnü Pilat te wü Jisu me chingcho.

⁴⁴ Pilat-nü Jisu sükopü yuchi nyemüyangcho. Abinü rothsarü anüchiba dsi Jisu süpü anyahlicho mah-opü tsingcho.

⁴⁵ Anüchiba yusi tsü yuchipü, Pilat-nü me tsü khyünung Josef khyang mülacho.

⁴⁶ Josef-nü shü anana lihpü, me tsü khyüchocho, ko shünü yühpü lung chiphohcho kong la yohpücho. Hütsüpü azüdujila tsü lung arangcheh zehkeh niitipücho.

⁴⁷ Mary Magdalin ko Josef atpa Mary-rünü Jisu me yohpücho tsü ngucho.