KHIDHINGCHO 1 - AMÜSA BAIBEL (BSI)

Akhudiba Israelrü Mono Khicho

¹ Israelrü Ijip lih pehjüpü kang anyüula choo anyüu chah akhudiba nyümongla, Abüdongba-nü Mosa te Sinai lipilih la abi Shükuh la chotacho. Abinü yocho,

² “Aron nühjünü Israelrü ahung-ahung ko tsutpu-tsutpunü mono khieng.

³ Adhrerü kang mükyü ko amilang rothsala wüxahrü apüm thrahbülung.

⁴ Ahung apüm lanü tsutpula aziba te nührü tronung young.”

^5-16 Hiba nguchi nengdang ahung müipi lanü throchehcho langnürüti tsü hiri licho: Ahung Tsutpu aying Reuben Shedeur tsurü Elizur Simeon Zurishadai tsurü Shelumel Juda Aminadab tsurü Nashon Isakar Zuar tsurü Nethanel Zebulun Helon tsurü Eliab Efraim Amihud tsurü Elishama Manase Pedazur tsurü Gamaliel Benjamin Gideon tsurü Abidan Dan Amishadai tsurü Ahiezer Asher Okran tsurü Pagel Gad Deuel tsurü Eliasaf Naftali Enan tsurü Ahira

Ahung Tsutpu aying

¹⁷ Hiri nyüh dhüreanyüh arüku khu Mosa e Aron nyühnü choo anyüula akhudiba nyümong yucho apüm dsibülungcho ko nyitsarü apüm ahung-ahung ko tsutpu-tsutpunü thrahyohcho.

¹⁸ Abüdongba-nü yuzengjücho kyo, adhrerü kang mükyü ko amilangrü apüm khiyoh thrahyohcho.

¹⁹ Sinai lipilih la Mosa-nü nyitsarü atümung neng thrahyohcho.

^20-46 Adhrerü kang mükyüpü amilang sürü rothsala wüxahcho arüh apüm Jakob tsurü aziba Reuben hung chahnü dikeh ahung ko atsutpunü thrahyohcho. Ayohrüta tsü hiroh-i licho: Ahung Shikhi Reuben 46,500 Simeon 59,300 Gad 45,650 Juda 74,600 Isakar 54,400 Zebulun 57,400 Efraim 40,500 Manase 32,200 Benjamin 35,400 Dan 62,700 Asher 41,500 Naftali 53,400 Yohrüta 603,550

Ahung Shikhi

⁴⁷ Levirü tsü aparü hung yola müthrahyohcho,

⁴⁸ tunüo Abüdongba-nü Mosa te yocho,

⁴⁹ “Khode nühnü rothsala wüxah adhrerü mono khidhingnang, Levirülü tükhiyoh.

⁵⁰ Hütsü mülih, Levirü tsü I Shükuh ko hütsüla zehba xükümsohng, hütsüla dikehsohng ko hütsü mükang arüh lisohng.

⁵¹ Nührü shehmüide, müdongnung müdüm apüm la Levirünü Shükuh tsü dhiwünung ko müdonglinung. Aparü sü Shükuh shündhün ronang süsohnung.

⁵² Israelrü aparünü amülungmülung palu tsutpula palu nisan pohki müdongnung.

⁵³ Ta aparü süsü shündhün ro I zichürosoh Israelrü müchangsohnungthsa, Levirülü Shükuh mükang lisohng.”

⁵⁴ Achotsü Israelrünü Abüdongba-nü Mosa te yocho kyo lüpcho hütsüta nguchicho.