AMOS 1 - AMÜSA BAIBEL (BSI)

¹ Tekoa yang lanü san-nyahrü Amos, yu tsü hiri lile. Alihyo zingnung kang anyüh li, Juda la Uzziah ko Israel la Jehoash tsurü Jeroboam-nü yangthsa thsade, Tsingrangba-nü Israel nengdang hiri apüm Amos te mishacho.

² Amos-nü yocho, “Abüdongba-nü Zion zong lanü rengre; abinü Jerusalem lanü mütiire. Zanulih kungpehre, ko Karmel zong la za mükure.”

Israel Kurümrüti Chah Yukhacho Syria

³ Abüdongba-nü yore, “Damaskasrünü thali-thali amünyi shitpahko, hütsü ngang Ihnü arüh khingchi riri. Arühnü Gilead-rü khura mütsa bichiko.

⁴ Hütsü ngang Ihnü michang mütheh yangthsarü Hazael-nü thsaba yangthsaba kuh ko yangthsaba Benhadad roshengvi tahpehjünung.

⁵ Ihnü Damaskas yangdi tbükhüm müpnahjünung ko Aven Ngah la lirü ko Betheden yangthsaba khyümüipehjünung. Syria-rü arangyohrü kang Kir lih lang nowünung.”

Filistia

⁶ Abüdongba-nü yore, “Gaza-rünü thali-thali amünyi shitpahko, hütsü ngang Ihnü arüh khingchi riri. Arühnü yucho shünü nowü Edomrü te ayurü kang iko.

⁷ Hütsü ngang Ihnü michang mütheh Gaza tbü ko roshengvi tahpehjünung.

⁸ Ihnü Ashdod ko Ashkelon yangdi yangthsarüti khyümüipehjünung. Ihnü Ekron yangdi khingchinung ko anyingcho Filistiarü atümung sünung.”

Tyre

⁹ Abüdongba-nü yore, “Tyre-nü thali-thali amünyi shitpahko, hütsü ngang Ihnü arüh khingchi riri. Arühnü yucho shünü Edom lih lang yangtsirü thsa nowüko ko arühnü yangtsa külüpcho müyohbü.

¹⁰ Hütsü ngang Ihnü michang mütheh Tyre yangdi tbü ko roshengvi tahpehjünung.”

Edom

¹¹ Abüdongba-nü yore, “Edomrünü thali-thali amünyi shitpahko, hütsü ngang Ihnü arüh khingchi riri. Arühnü arüh jünirü Israelrü iijowücho ko yanglilüm müngusoh. Arüh zichüroba akihcheh mühle, ko arühnü hütsü khodesü münyehlire.

¹² Hütsü ngang Teman yangdi chah Ihnü michang müthehnung ko Bozra roshengvi tahpehjünung.”

Amon

¹³ Abüdongba-nü yore, “Amon-rünü thali-thali amünyi shitpahko, hütsü ngang Ihnü arüh khingchi riri. Arüh lurü alaa janung rothsade, arühnü Gilead la longla lirü khingkurüti mi miinü xaphohcho.

¹⁴ Hütsü ngang Raba tbü chah michang mütheh roshengvi tahpehjünung. Rothsa nyümong khong mohnung, ko rothsa tsü tsingxinyübong rihlong kyo linung.

¹⁵ Arüh yangthsaba ko adirüti yangtsilang nowünung.”