سایلار 6 - کتاب مقدس به زبان آذربایجانی جنوبی - نسخه ادبینذئرئلئک آندی 1 رب گئنه موسا ائله دانیشیب اونا ددی: 2 «ائسرایئل اؤولادلارینا دانیش و اونلارا دِه: ”بئر کئشی و یا بئر آرواد مخصوص بئر نذر، نذئرئلئک وعدهسی ادئب اؤزونو ربّه وقف اتسه، 3 گرک شراب و کفلندئرن ائچکئدن چکئنسئن. حتّا شراب سئرکهسی ده، کفلندئرن ائچکئدن حاضیرلانمیش سئرکه ده، اوزوم سویو دا ائچمهسئن؛ نه اوزوم، نه ده کئشمئش یسئن. 4 نذئری اولدوغو مودّتده توخومدان قابیغا قدر مِینهدن آلینمیش هچ بئر شی یمهسئن. 5 نذئری اولدوغو بوتون مودّتده باشینا اولگوج دَیمهسئن. اؤزونو ربّه وقف اتدئیی مودّت قورتارانا قدر موقدّس اولسون؛ ساچینی اوزاتسین. 6 اؤزونو ربّه وقف اتدئیی بوتون گونلرده مِیئته یاخینلاشماسین. 7 آتاسی و آناسی، قارداشی و باجیسی اؤلسه، اونلارا گؤره اؤزونو نجئس اتمهسئن؛ چونکی اؤزونو تارییا وقف اتدئیی اونون باشیندادیر. 8 نذئری اولدوغو بوتون مودّتده او، ربّه وقف ادئلئب. 9 آمّا اگر یانیندا بئر آدام بئردن-بئره قَفلَتَن اؤلسه و نذئرئنئن ساچینی نجئس اِتسه، اوندا تمئز اولدوغو گون باشینی قیرخدیرسین؛ اونو یدّئنجی گون قیرخدیرسین. 10 سکّئزئنجی گون حوضور چادیرینین گئرئشئنده کاهئنه ائکی قومرو قوشو و یا ائکی گؤیرچئن گتئرسئن. 11 کاهئن بئرئنی گوناه قوربانی و او بئرئنی یاندیرما قوربانی تقدئم اتسئن کی، مِیئت اوچون باتدیغی گوناهی کفّاره اولسون. همئن گون تزهدن باشینی تقدئس اتسئن. 12 نذئره کئمی گونلرئنی ربّه وقف اتسئن و تقصئر قوربانی اولاراق بئر-ائلّئک اِرکَک قوزو گتئرسئن. آمّا اَوّلکی گونلر ساییلمایاجاق، چونکی نذئرئلئیی نجئسلَنمئشدئر. 13 نذئرهیه عایید اولان قانون بودور: اؤزونو وقف اتدئیی مودّت قورتاراندا، قوربانی حوضور چادیرینین گئرئشئنه گتئرسئن. 14 اورادا ربّه بو قوربانلاری تقدئم اتسئن: یاندیرما قوربانی اولان بئر-ائلّئک عیبسئز بئر اِرکَک قوزو، گوناه قوربانی اولان بئر-ائلّئک عیبسئز بئر دئشی قوزو، باریش قوربانی اولان عیبسئز بئر قوچ، 15 بئر سبد مایاسیز چؤرک، تاخیل تقدئملری کی، نارین اوندان، یاغلا قاتیلمیش مایاسیز فطئرلردن، و اوستونه یاغ سورتولموش مایاسیز کولچهلردن عئبارتدئر، و مایع تقدئملری. 16 کاهئن ربّئن حوضوروندا اونلاری تقدئم اتسئن و اونون گوناه قوربانینی و یاندیرما قوربانینی گتئرسئن. 17 مایاسیز فطئر سبدی ائله هم ده بئر قوچو ربّه باریش قوربانی کئمی تقدئم اتسئن؛ کاهئن اونون تاخیل تقدئمی ائله مایع تقدئمئنی ده تقدئم اتسئن. 18 سونرا نذئره اولان، حوضور چادیرینین گئرئشئنده، اؤز وقف اتدئیی ساچینی قیرخسین، سونرا ساچینی گؤتوروب باریش قوربانینین آلتینداکی اودا قویسون. 19 نذئره اولان، وقف اتدئیی ساچینی قیرخدیقدان سونرا، کاهئن قوچون پئشمئش بئر قولونو، سبددن گؤتوردویو مایاسیز بئر فطئر و مایاسیز بئر کولچه ائله نذئرهنئن اَللرئنه قویسون. 20 سونرا یِللَتمه تقدئمی کئمی اونلاری ربّئن حوضوروندا یِللَتسئن. اونلار یِللهدئلَن دؤش اَتی و قالدیریلان بودلا بئرلئکده موقدّسدئر، کاهئنه مخصوصدور. اوندان سونرا نذئره شراب ائچه بئلر. 21 اؤزونو نذئره ادن آدام اوچون، قانون بودور. آمّا اگر نذئرهیه مربوط اولان نذردن علاوه بئر شی ده نذر اتمئش اولسا، اگر گوجو چاتیر، نذر اتدئیئنی نذئره تقدئمئندن علاوه تقدئم اده بئلر.“» کاهئنلرئن خیئر-دوعاسی 22 سونرا رب موسایا ددی: 23 «هارون و اوغوللاری ائله دانیشیب اونلارا دِه: ائسرایئل اؤولادلارینا بله برکت ورئن. اونلارا بله دیئن: 24 ”رب سئزه برکت ورئب، سئزی قوروسون؛ 25 رب اؤز نورلو اوزونو سئزه ساچسین. سئزه عئنایت گؤرسدسئن؛ 26 رب اوزونو سئزه طرف چِوئرسئن، سئزه باریش ورسئن.“ 27 بلهجه کاهئنلر منئم آدیملا ائسرایئل اؤولادلارینا برکت ورسئنلر، من ده اونلارا برکت ورهجیم.» |
@ 2022 Korpu Company