مرقوس 16 - کتاب مقدس به زبان آذربایجانی جنوبی - نسخه ادبی

عئسانین اؤلولردن دئرئلمه‌سی

(متّا 28‏:1-8، لوقا 24‏:1-12، یوحنّا 20‏:1-10)

¹ سبّت گونو کچندن سونرا، مجدللی مریم، یعقوبون آناسی مریم، و سالومه عطئرلر ساتین آلدیلار کی، گدئب عئسانی عطئرله‌سئنلر.

² و هفته‌نئن ائلک گونونده، سحر چوخ اِرکن، گونش دوغان واخت قبئره گلدئلر.

³ و آرالاریندا دیئردئلر: «گؤره‌سن قبئرئن آغزینداکی داشی بئزئم اوچون کئم دئیئرله‌ده‌جک؟»

⁴ لاکئن باشلارینی قالدیریب باخاندا، داشی بئر یانا دئیئرلنمئش گؤردولر. او داش چوخ بؤیوک بئر داش ائدی.

⁵ قبئره گئردئلر و صاغ طرفده آغ پالتار گیئنمئش بئر جاوانی اوتورموش گؤرَ‌نده حیرت اتدئلر.

⁶ جاوان اونلارا ددی: «حیرت اتمه‌یئن! سئز چارمیخا چکلئمئش ناصئره‌لی عئسانی آختاریرسینیز. او دئرئلئب، بورادا دیئل. باخین، اونو قویدوقلاری یر بورادیر.

⁷ ائندی اونون شاگئردلرئنئن و پطروسون یانینا گدئن و اونلارا دیئن کی، او سئزدن قاباق جلئله گدئر. ددئیی کئمی اونو اورادا گؤره‌جکسئنئز.»

⁸ اونلار قبئردن چیخیب قاچدیلار، چونکی تئتره‌مه و حیرت اونلاری بوروموشدو. قورخدوقلاریندان هچ کسه بئر شی دمه‌دئلر.

عئسا شاگئردلرئنه گؤرونور

⁹ هفته‌نئن ائلک گونو سحر ارکن، عئسا دئرئلندن سونرا اوّلجه اؤزونو مجدللی مریمه گؤرستدی. عئسا مریمدن یدّی ناپاک روح قووموشدو.

¹⁰ مریم گدئب عئسا ائله اولانلارا خبر وردی. اونلار یاس توتوب آغلاییردیلار.

¹¹ لاکئن عئسانین دئری اولوب اونا گؤروندویونو اشئدنده ائنانمادیلار.

¹² بو شیلردن سونرا، عئسا اونلاردان ائکئسئنه، آیری بئر صورتده کنده گدن واخت گؤروندو.

¹³ بونلار قاییدیب شاگئردلره خبر وردئلر، آمّا اونلار بونلارا دا ائنانمادیلار.

¹⁴ و اوندان سونرا عئسا اؤزونو او اون‌بئر شاگئرده، اونلار سوفره باشیندا اولاندا ظاهئر اتدی و اونلاری ائمانسیزلیقلاری و داش اورَکلی اولدوقلاری اوچون دانلادی. چونکی اونلار اونون اؤلولردن دئرئلندن سونرا اونو گؤرنلرئن سؤزلرئنه ائنانمامیشدیلار.

¹⁵ عئسا اونلارا ددی: «بوتون دونیایا گدئن و ائنجئلی بوتون خالقا وعظ ادئن.

¹⁶ ائمان گتئرئب تعمئد اولونان نئجات تاپاجاق؛ لاکئن ائمان گتئرمه‌ین محکوم اولاجاقدیر.

¹⁷ بو علامتلر ائمان گتئرنلرله گده‌جک: منئم آدیملا ناپاک روحلاری قوواجاقلار. تزه دئللر‌له دانیشاجاقلار.

¹⁸ ائلانلاری اَللری ائله توتاجاقلار. اؤلدورن زَهَر ده ائچسه‌لر، اونلارا زئیان یتئرمه‌یه‌جک. ناخوشلار اوستونه اللرئنی قویاجاقلار و اونلار صاغالاجاقلار.»

¹⁹ بله‌جه رب عئسا اونلارلا صؤحبت ادندن سونرا گؤیه قالخدی و تارینین صاغیندا اوتوردو.

²⁰ شاگئردلر ده گدئب، تارینین سؤزونو هر یرده یایدیلار. رب اونلارلا ائدی و کلامی آرخادان گلن علامتلرله تصدئق ادئردی.