متّا 8 - کتاب مقدس به زبان آذربایجانی جنوبی - نسخه ادبیعئسا جوذاملی بئر آداما شفا ورئر (مرقوس 1:40-45، لوقا 5:12-16) 1 داغدان اندئیی واخت، عئسانین دالینجا بؤیوک بئر جاماعات گتدی. 2 بو آرادا بئر جوذاملی گلدی و اونون قاباغیندا سجده ادئب ددی: «یارب، اگر ائستیهسن، منی بو ناخوشلوقدان تمئز اده بئلرسن.» 3 عئسا الئنی اوزاتدی و اونا قویوب ددی: «ائستهیئرم، تمئز اول.» جوذاملی آدام فورَن جوذامدان تمئزلندی. 4 عئسا اونا ددی: «باخ، هچ کسه بئر سؤز دمه، آنجاق گت، اؤزونو کاهئنه گؤرسد و موسانین بویوردوغو قوربانی تقدئم ات کی، ائنسانلارا شهادت اولسون.» (لوقا 7:1-10) یوزباشینین ائمانی (لوقا 7:1-10) 5 عئسا کفر ناحوما گئرن واخت، بئر یوزباشی اونا یاخینلاشیب یالواردی: 6 «یارب، نؤکرئم فلج اولوب، اِوده یاتیر و چوخ عذاب چکئر.» 7 عئسا اونا ددی: «گلئب اونو صاغالدارام.» 8 یوزباشی جاواب ورئب ددی: «یارب، لایئق دیئلم کی، سن منئم دامیم آلتینا گئرهسن. آنجاق بئر سؤز بویور و نؤکرئم صاغالار. 9 چونکی من ده امر آلتیندا اولان بئر آدامام و امرئم آلتیندا عسگرلر وار. بئرئنه ”گت“ دِسَم، گدر. او بئرئنه ”گل“ دِسَم، گلر. و قولوما ”بونو ات“ دِسَم، ادر.» 10 عئسا بونو اشئدن واخت تعجّوبلندی و آرخاسیندا گلنلره ددی: «دوغروسونو سئزه دیئرم؛ ائسرایئلده بله، بو قدر بؤیوک ائمانا راست گلمهدئم. 11 سئزه دیئرم کی، شرقدن و قربدن چوخ آدام گلهجک و گؤیلرئن پادشاهلیغیندا ائبراهئم، ائسحاق، و یعقوبلا بئرلئکده سوفرهیه اوتوراجاق، 12 لاکئن بو پادشاهلیغین اوغوللاری چؤل قارانلیغینا آتیلاجاق؛ اورادا آغلاشما و دئش قیجیرتماسی اولاجاقدیر.» 13 سونرا عئسا یوزباشییا ددی: «گت، ائناندیغین کئمی اولسون.» و نؤکر او ساعات یاخشیلاشدی. (مرقوس 1:29-34، لوقا 4:38-41) عئسا چوخ آداما شفا ورئر (مرقوس 1:29-34، لوقا 4:38-41) 14 عئسا پطروسون اِوئنه گئرئب، گؤردو کی، اونون قایناناسی قیزدیرما ائچئنده یاتیب. 15 اونون الئندن توتدو و آروادین قیزدیرماسی کسئلدی. او دا قالخیب، اونلارا خئدمت اتمهیه باشلادی. 16 آخشام اولاندا ناپاک روحلارا اسئر اولموش بئر چوخ آداملاری اونون یانینا گتئردئلر. و عئسا، بئر سؤزله روحلاری قوودو و ناخوشلارین هامیسینا شفا ورئردی کی، 17 اِشَعیا پیغمبرئن واسئطهسئله دیئلن سؤز یرئنه یتئشسئن: «بئزئم ضعئفلئکلرئمئزی او، گؤتوردو، بئزئم ناخوشلوقلاریمیزی او، داشیدی.» (لوقا 9:57-62) عئسایا پِیرَو اولماغین باهاسی (لوقا 9:57-62) 18 عئسا اطرافیندا بؤیوک بئر جاماعاتی گؤرن واخت، بویوردو کی، گؤلون او تایینا کچسئنلر. 19 بو زامان بئر دئن عالئمی گلئب، اونا ددی: «اوستاد! هارایا گدهسن، سنئن دالینجا گلهجهیم.» 20 عئسا اونا ددی: «تولکولرئن یوواسی وار، گؤی قوشلارینین دا یوواسی؛ لاکئن ائنسان اوغلونون باشینی دایاماغا بئر یری یوخدور.» 21 آیری بئر شاگئرد عئسایا ددی: «یارب، منه ائجازه ور، اوّلجه گدئم آتامی باسدیریم.» 22 لاکئن عئسا اونا ددی: «سن منئم دالیمجا گل. قوی اؤلولر، اؤلولرئنی باسدیرسینلار.» (مرقوس 4:35-41، لوقا 8:22-25) عئسا طوفانی یاتیردیر (مرقوس 4:35-41، لوقا 8:22-25) 23 عئسا قاییغا مئندئیی زامان، شاگئردلری ده اونون دالینجا گتدئلر. 24 بئردنبئره گؤلده بؤیوک بئر کولک باشلادی، اله کی، قاییق شپهلرله اؤرتولدو. لاکئن عئسا یاتمیشدی. 25 شاگئردلر یاخینلاشدیلار و عئسانی اویادیب ددئلر: «بئزی خئلاص ات یارب، هلاک اولوروق.» 26 عئسا اونلارا ددی: «ای آز ائمانلیلار! نه اوچون قورخورسونوز؟» سونرا دوروب، کولهیه و گؤله آجیقلاندی و بؤیوک بئر آراملیق دوشدو. 27 آداملار مات قالیب دیئردئلر: «بو، کئمدئر کی، هم کولک، هم ده گؤل اوندان ائطاعت ادئر؟» (مرقوس 5:1-20، لوقا 8:26-39) ائبلئس الئنه توتولموش ائکی آدام (مرقوس 5:1-20، لوقا 8:26-39) 28 عئسا، گؤلون او تاییندا اولان «جَدهرهلیلرئن» دئیارینا گلدئیی زامان، ائکی نفره راست گلدی کی، قبئرلئک ماغارالاردان چیخیردیلار. ائبلئس الئنده اسئر ائدئلر. اونلار چوخ دلی ائدئلر و هچ کئم او یولدان کچه بئلمزدی. 29 بئردن باغیریب ددئلر: «ای تارینین اوغلو، بئزدن نه ائستهیئرسن؟ مگر گلئبسن کی، واختیندان قاباق بئزه عذاب ورهسن؟» 30 اونلاردان اوزاقدا بؤیوک بئر دونگوز سوروسو اوتلاییردی. 31 ائبلئسلر عئسایا یالواردیلار: «اگر بئزی قوواجاقسان، ائجازه ور کی، بو دونگوز سوروسونه گئرک.» 32 عئسا اونلارا ددی: «گئرئن.» اونلار دا چیخیب، دونگوز سوروسونه گئردئلر. او آندا سورونون هامیسی اوچورومدان گؤله آتیلیب، سودا بوغولدولار. 33 اونلاری اوتارانلار قاچدیلار و شهره گئرن واخت، بونلارین هامیسینی و ائبلئس الئنه توتولموشلارین باشینا گلن احوالاتی خبر وردئلر. 34 بونا گؤره، شهرئن بوتون خالقی عئسانین پئشوازینا چیخدیلار و اونو گؤرن زامان یالواردیلار کی، اونلارین دئیاریندان گتسئن. |
@ 2022 Korpu Company