متّا 6 - کتاب مقدس به زبان آذربایجانی جنوبی - نسخه ادبیصدقه ورمک 1 دئقّت ادئن کی، یاخشی عمللرئنئز ائنسانلارا اؤزونوزو گؤرسدمک اوچون اولماسین. یوخسا گؤیلرده اولان آتانیزین یانیندا اجرئنئز اولمایاجاق. 2 اونا گؤره، صدقه وردئیئن زامان، اونو شیپورلارلا جار چکمه، نجه کی، رئیاکار آداملار، خالقین یانیندا حؤرمت قازانماق اوچون، کنئسهلر و کوچهلرده ادئرلر. دوغروسونو سئزه دیئرم؛ اونلار بوتون اجرلرئنی آلیبلار. 3 لاکئن سن، صدقه وردئیئن واخت، قوی سول الئن ساغ الئنئن نه اتدئیئنی بئلمهسئن. 4 صدقن گئزلی اولسون؛ گئزلئنی گؤرن آتان دا سنه عوضئنی ورهجک. (لوقا 11:2-4) دوعا اتمک (لوقا 11:2-4) 5 دوعا ادنده رئیاکار آداملار کئمی اولما. چونکی اونلار سوئرلر کی، اؤزلرئنی آیری آداملارا گؤرسدمک اوچون، کنئسهلرده و کوچهلرئن آغزیندا دوروب، دوعا اتسئنلر. دوغروسونو سئزه دیئرم؛ اونلار بوتون اجرلرئنی آلیبلار. 6 لاکئن سن، دوعا اتدئیئن واخت، اؤز اوتاغینا گئر و قاپینی باغلاییب، گئزلئنده اولان آتانا دوعا ات. گئزلئنی گؤرن آتان دا سنه عوضئنی ورهجک. 7 دوعا اتدئیئن واخت، بوتپرستلر کئمی بوش سؤزلر دمه؛ چونکی اونلار اله گومان ادئرلر کی، سؤزلرئنئن چوخلوغو ائله دوعالاری اشئدئلهجک. 8 اونلارا اوخشامایین؛ چونکی آتانیز سئزئن نهلره مؤحتاج اولدوغونوزو، سئز اوندان ائستمهدن، بئلئر. 9 بونون اوچون بله دوعا ادئن: ای گؤیلرده اولان آتامیز، سنئن آدین موقدّس اولسون. 10 سلطنتئن گلسئن. سنئن ائستهدئیئن، گؤیده اولدوغو کئمی، یرده ده اولسون. 11 گوندهلئک چؤرهیئمئزی بو گون بئزه ور. 12 و بئزئم بورجلاریمیزی بئزه باغیشلا، نجه کی، بئز ده، بئزه بورجلو اولانلاری باغیشلاییریق. 13 بئزی ائمتاحانا چکمه، لاکئن شردن خئلاص ات. چونکی سلطنت، قودرت و عئزّت ابده کئمی سنئندئر. آمئن. 14 چونکی اگر ائنسانلارین سئزه اتدئیی گوناهلارینی باغیشلایاسینیز، گؤیلرده اولان آتانیز دا سئزی باغیشلار. 15 آمّا اگر ائنسانلارین سئزه اتدئیی گوناهلارینی باغیشلامایاسینیز، آتانیز دا سئزئن گوناهلارینیزی باغیشلاماز. اوروج 16 اوروج توتدوغونوز زامان رئیاکار آداملار کئمی قاشقاباقلی گزمهیئن؛ چونکی اونلار، اؤزلرئنی ائنسانلارا گؤرسدمک اوچون، گؤرونوشلرئنی دیئشئرلر. دوغروسونو سئزه دیئرم؛ اونلار بوتون اجرلرئنی آلیبلار. 17 لاکئن سن، اوروج توتدوغون واخت، باشینا یاغ سورت و اوزونو یو؛ 18 اله کی، آداملارا یوخ، گئزلئنده اولان آتانا اوروجلو گؤرونهسن. و گئزلئنی گؤرن آتان دا سنه عوضئنی ورهجک. گؤیده خزئنهلر 19 یر اوزونده اؤزونوزه خزئنهلر ییغمایین؛ اورادا گووه و پاس اونلاری محو ادر؛ و اوغرولار اورانی یاریب اوغورلارلار. 20 آمّا اؤزونوزه گؤیده خزئنهلر ییغین کی، اورادا نه گووه محو ادر نه پاس؛ نه ده اوغرولار اورایا گئرئب اوغورلارلار. 21 چونکی خزئنهنئز هارادا اولسا، اورهیئنئز ده اورادا اولاجاقدیر. 22 بدنئن چیراغی گؤزدور؛ اونا گؤره، گؤزون صاغ اولسا، بوتون بدنئن ده ائشیقلی اولار. 23 اگر گؤزون پئس اولسا، بوتون بدنئن قارانلیق اولار. بلهجه اگر سندهکی ائشیق قارانلیق اولسا، او قارانلیق نه بؤیوکدور! 24 هچ کئم ائکی آغایا قوللوق اده بئلمز؛ چونکی یا بئرئندن نئفرت ادئب او بئرئسئنی سوهجک، یا دا بئرئنه باغلی قالیب او بئرئسئنه حقارتله باخاجاق. سئز هم تارییا، هم ده پولا قوللوق اده بئلمزسئنئز. (لوقا 12:22-31) نئگاران اولمایین (لوقا 12:22-31) 25 بونون اوچون سئزه دیئرم: جانینیز اوچون نئگاران اولمایین کی، نه ییئب نه ائچهجکسئنئز، یا دا نه گِیهجکسئنئز. مگر جان یمکدن و بدن گیمکدن داها افضل دیئل؟! 26 گؤیون قوشلارینا باخین؛ اونلار نه اکئرلر، نه بئچئرلر، نه ده آنبارلارا ییغیرلار. لاکئن گئنه ده، گؤیلرده اولان آتانیزدیر کی، اونلاری دویورور. مگر سئز اونلاردان داها افضل دیئلسئنئز؟! 27 سئزلردن کئم وار کی، نئگاران اولماقلا عؤمرونه بئر ساعات آرتیرا بئلسئن؟! 28 نه اوچون پالتاردان اؤتری نئگاران اولورسونوز؟ زَمی زانباقلارینین نجه بؤیودوکلرئنه باخین؛ نه زحمت چکئرلر، نه ده ائپلئک اَیئرئرلر. 29 آمّا سئزه دیئرم؛ سولیمان بله، بوتون شؤوکتئنده بونلاردان بئری کئمی گیئنمهمئشدی. 30 اگر تاری بو گون مؤوجود اولوب صاباح اوجاغا آتیلان اوتو بله گیئندئرئر، آیا سئزی داها آرتیق گیئندئرمیهجک، ای آز ائمانلیلار؟! 31 بلهجه ”نه یئهجهیئک؟“، ”نه ائچهجهیئک؟“، ”نه گئیهجهیئک؟“ دیئب، نئگاران اولمایین. 32 چونکی بوتون بو شیلری بوتپرستلر آختاریرلار و گؤیده اولان آتانیز سئزئن بو شیلره مؤحتاج اولدوغونوزو بئلئر. 33 لاکئن سئز اوّلجه تارینین پادشاهلیغینی و اونون صالحلئیئنی آختارین و بونلارین هامیسی سئزه آرتیقلیقلا ورئلهجک. 34 بونا گؤره، صاباح اوچون نئگاران اولمایین؛ چونکی صاباحکی گون اؤزو، اؤز فئکرئنده اولاجاق. هر گونون اؤزو اوچون اؤز نئگارانچیلیغی وار. |
@ 2022 Korpu Company