لاوئلیلر 7 - کتاب مقدس به زبان آذربایجانی جنوبی - نسخه ادبی1 تقصئر قوربانی بارهده قانون بودور؛ او، لاپ موقدّسدئر. 2 تقصئر قوربانی، یاندیرما قوربانلار کَسئلن یرده کَسئلسئن و کاهئن اونون قانینی قوربانگاهین هر طرفئنه سَپسئن. 3 اونون بوتون پئیئنی تقدئم اتسئن: قویروغونو، ائچآلاتی اؤرتَن پئیی، 4 بلئندهکی هر ائکی بؤیرهیئنی اوستوندهکی پئیی ائله، و قارا جئیهرئن قویروغا بَنزهر حئصّهسئنی؛ بونلاری بؤیرهکلری ائله بئرلئکده چیخارتسین. 5 کاهئن بونلاری اودلا ربّه تقدئم اولان قوربان اولاراق قوربانگاهدا توستولهدئب یاندیرسین؛ بو، تقصئر قوربانیدیر. 6 کاهئن نسلئندن اولان هر اِرکَک اوندان یسئن؛ موقدّس بئر یرده یِیئلسئن؛ او، لاپ موقدّسدئر. 7 تقصئر قوربانی دا، گوناه قوربانی کئمیدئر، اونلارین حاقّیندا آنجاق بئر قانون وار؛ قوربانین اَتی کفّاره ادن کاهئنه عاییددیر. 8 بئر آدامین گتئردئیی یاندیرما قوربانینین دَرئسی ده همئن قوربانی تقدئم ادن کاهئنه عاییددیر. 9 تندئرده پئشئرئلمئش هر تاخیل تقدئمی، تاوادا، ساجدا حاضیرلانان هر بئر شی، اونو تقدئم ادن کاهئنه عاییددیر. 10 یاغلا قاتیلمیش، یا دا هر قورو تاخیل تقدئمی بوتون هارون اؤولادلاری آراسیندا برابر پایلارا بؤلونسون. باریش قوربانی 11 ربّه تقدئم اولونان باریش قوربانی بارهده قانون بودور: 12 اگر کئمسه اونو تشکّور اتمک اوچون قوربان گتئرسه، اوندا او، تشکّور قوربانی ائله بئرلئکده، یاغلا قاتیلمیش مایاسیز فطئرلر، اوستونه یاغ سورتولموش مایاسیز کولچهلر و یاغلا قاتیلمیش نارین اوندان کؤکهلر گتئرسئن. 13 تشکّور اوچون باریش قوربانینی تقدئم ادن، گرک تقدئمئنی مایالی چؤرک کؤکهلری ائله گتئرسئن. 14 بونلارین هر جوروندن بئرئنی ربّه قالدیریلان پای کئمی تقدئم اتسئن. او، باریش قوربانینین قانینی سَپَن کاهئنه عاییددیر. 15 تشکّور اوچون باریش قوربانینین اَتی، قوربان کسئلن گون یِیئلسئن. اوندان هچ بئر شی سحره قدر قالماسین. 16 آمّا اگر کئمسه اتدئیی نذره گؤره، و یا اؤز گؤیلو ائله قوربان تقدئم اتسه، قوربانین اَتی، کَسئلدئیی گون یِیئلسئن و قالان حئصّهسی ده صاباحکی گون یِیئله بئلر، 17 لاکئن قوربانلیق اَتئندن قالان هر شی اوچونجو گون اوددا یاندیریلسین. 18 اگر باریش قوربانلارینین اَتئندن اوچونجو گون یِیئلسه، او قوربانی گتئرن آدام مقبول اولماز. قوربانین دا فایداسی اولماز. بو اَت ائیرنج ساییلار و اونو یئین آدامین تقصئری اؤز بوینونا اولار. 19 نجئس ساییلان هر هانسی بئر شیه توخونان اَت یِیئلمهلی دیئل؛ گرک اوددا یاندیریلسین. هر پاک آدام آیری اَتدن یئیه بئلر؛ 20 آمّا هر کس نجئس حالدا اولارکن ربّه کَسئلن باریش قوربانینین اَتئنی یِسه، گرک اؤز خالقی آراسیندان قووولسون. 21 بئر نفر هر هانسی نجئسه، ائستر ائنسان نجئسلئیی، ائستر نجئس بئر حیوان، و یا هر هانسی نجئس بئر شیه توخونوب، سونرا دا ربّئن باریش قوربانینین اَتئندن یِسه، او گرک خالقی آراسیندان قووولسون.“» خالق اوچون قوربانلار حاقّیندا تعلئمات 22 رب موسایا ددی: 23 «ائسرایئل اؤولادلارینا بله دِه: ”اؤکوز، قویون، یا دا کچی پئیئنی یِمهیئن. 24 اؤلو حیوانین پئیئنی، قوردون پارچالاییب اؤلدوردویو حیوانین پئیئنی هر آیری بئر ائش اوچون ائشلهده بئلرسئنئز، لاکئن اونو اصلا یمیهجکسئنئز. 25 هر کس ربّه یاندیریلیب تقدئم اولونان حیوانین پئیئندن یِسه، خالقی آراسیندان قووولاجاق. 26 بوتون یاشادیغینیز یرلرده هچ واخت قوشلارین و حیوانلارین قانینی یمیهجکسئنئز؛ 27 قان یئین هر کس خالقی آراسیندان قووولاجاق.“» 28 رب موسایا ددی: 29 «ائسرایئل اؤولادلارینا بله دِه: ”ربّه باریش قوربانلاری تقدئم ادن هر کس، باریش قوربانلارینین بئر حئصّهسئنی ربّئن حوضورونا قوربان گتئرسئن. 30 یاندیریلان قوربانینی اؤز الی ائله ربّه تقدئم گتئرسئن؛ حیوانین پئیئنی و دؤشو اَتئنی گتئرئب، دؤشو ربّئن حوضوروندا یِللَتمه تقدئمی ورسئن. 31 کاهئن پئیی قوربانگاهدا توستولهدئب یاندیرسین؛ آمّا دؤش اَتی هارونلا اؤولادلارینا عایید اولسون. 32 باریش قوربانلارینیزین صاغ بودونو قالدیرما تقدئمی اولاراق کاهئنه ورئن؛ 33 هارون اؤولادلارینین آراسیندان او کاهئن کی، باریش قوربانینین قان و پئیئنی تقدئم ادئر، بو صاغ بود اونون پاییدیر. 34 چونکی من یِللَتمه تقدئمئنئن دؤش اَتئنی و قالدیرما تقدئمئنئن بودونو ائسرایئل اؤولادلاریندان، اونلارین باریش قوربانلاریندان گؤتوروب، کاهئن هارونلا اؤولادلارینا ائسرایئللیلردن گلن ابدی پای اولاراق ورمئشم. 35 ربّه یاندیریلان تقدئملردن هارون و اونون اوغوللارینا مخصوص اولان پای بودور کی، هارون اونلاری کاهئنلئیه تعیئن اتدئیی گون، بو پایی اونلارا وردی. 36 رب هارون و اونون اؤولادلارینی مسح اتدئیی گون ائسرایئل اؤولادلارینا امر ورمئشدی کی، نسئلدن-نسئله بو ابدی پایی اونلارا ورسئنلر.“» 37 بو، یاندیرما قوربانی، تاخیل تقدئمی، گوناه قوربانی، تقصئر قوربانی، تقدئس تقدئمی و باریش قوربانلاری بارهده اولان قانوندور 38 کی، رب سئنا داغیندا موسایا امر اتدی. رب بو امری ائسرایئل اؤولادلارینا سئنا چؤلونده، او گون وردی کی، اونلاردان ربّه قوربان گتئرمکلرئنی ائستهمئشدی. |
@ 2022 Korpu Company